१ थेसलोनिकि 5 - डोटेलिप्रभु आउन्या दिनकि निउति तयार होय 1 तर मेरा प्यारा भाइबिना हो, यिनु कुरा कब हुन्याहुन् भन्न्या समय रे दिनका बिसयमि तमरि निउति लेखिरनु जरुणि आथिन्। 2 क्यालाइकि रात चोर आया जसेरि प्रभु आउन्या दिन अचानक आउन्या छ, यो कुरडि तमुलाइ थाइ छ। 3 जबइ मान्स “सान्ति रे सुरछ्या” भुन्नारया हुन्याछन्, तबइ बच्चा पाउनेइ स्वाइनिलाइ बेथा लाग्या जसेरि अचानक तिनुमि बिनास आउन्या छ, रे तिनु तइ कुराबटहइ बच्च्या आथिन्। 4 तर भाइबिना हो, तमु अन्धकारका मान्स हइनउ तसोभया हुनतग प्रभु आउन्या दिन तमरि निउति चोर आया जसेरि अचानक आउन्या आथिन्। 5 क्यालाइकि तमु सप्पइ ज्योति रे दिनका सन्तान हउ। हामु रात रे अन्धकारका सन्तान हइनउ। 6 तबइलाइ हामु अउर मान्सकि जसेरि जनसिउ, तर जागा होइबर सचेत हउँ। 7 क्यालाइकि सिन्या त रातइमि सिनाछन्, रे जँड्या लइ रातइमि मात्तिनाछन्। 8 तर हामु दिनका सन्तान भया हुनाले होस अरिबर बसु। हामुले बिस्वास रे पिरिमलाइ सुरछ्या अद्द्या बिस्वासको छातिपाता लाउँ रे मुक्तिका आसालाइ सुरछ्या दिन्या टोपि लाया जसेरि लाउँ। 9 क्यालाइकि परमेस्वरले हामुलाइ आफनो रिस खण्याउनाइलाइ छान्या हइनन्, तर प्रभु इसु ख्रिस्टबटहइ मुक्ति दिनाइलाइ छान्या हुन्। 10 उनु हामरि निउति मर्या, ताकि हामु जागा बसु या सिउँ हामु सप्पइ उनसितइ जिउन् सकउ। 11 तबइलाइ अइल अर्या जसरि तमुले एक-अर्खालाइ हउसला दिन्या रे बलियो बनाउन्या काम अर। अन्तिम सिछ्या 12 भाइबिना हो हामु तमुलाइ बिन्ति अद्दाछउ, तमरा बिचमि भउतइ दुःख अद्द्या, रे सिछ्या दिन्या अगुवालाइ आदर अर। 13 तिनुले अर्या कामकि निउति पिरिमले तिनरो ठुलो आदर अर, रे आपसमि मिलिबर बस। 14 भाइबिना हो, हामु तमुलाइ अर्ति दिनाउ कि अल्छि मान्सलाइ चेतावनि दिय, हरेस खान्यालाइ दिलासा दिय, कमजोरलाइ साहेता अर, रे तिनु सप्पइ मान्ससित सहनसिलता धेकाय। 15 याद राख, खराबि अद्द्यालाइ खराबि जनअरउ, तर एकले अर्खालाइ रे सप्पइ मान्सको भलाइ अद्द्या बिचार अर। 16 जइबेला लइ आनन्न अर। 17 निरन्तर प्रार्थना अरिरय। 18 जसाइ अबस्थामि लइ परमेस्वरलाइ धन्यबाद दिय, क्यालाइकि ख्रिस्ट इसुमि तमरि निउति परमेस्वरको इछ्या यइ हो। 19 पबित्तर आत्माका कामलाइ जनरोक। 20 अगमबाणिलाइ हेला जनअर। 21 तर सप्पइ कुराको जाँच अर रे जो कुरा असल छ तसइ कुरामि लागिरय। 22 सप्पइ किसिमका खराब कुराबटहइ अलग बस। 23 सान्ति दिन्या परमेस्वर आफुइले तमुलाइ पुरा रुपले पबित्तर राखउन्। हामरा प्रभु इसु ख्रिस्ट नआउन्ज्यासम्म तमरो आत्मा, परान रे सरिल निर्दोस हउ। 24 तमुलाइ बोलाउन्या परमेस्वर बिस्वासयोग्य छन्, उनुलेइ तमुलाइ यिनु सप्पइ कुरा पुरा अरिदिन्या छन्। 25 भाइबिना हो, हामरि निउति लइ प्रार्थना अरिदिय। 26 ताँ भया सप्पइ भाइबिनालाइ पिरिमसित मेरो अभिबादन सुनाइदिय। 27 सप्पइ भाइबिनालाइ यो चिट्ठि पडिबर सुनाइदिय भनि प्रभुका नाउँमि मु तमुलाइ अनुरोध अद्दछु। 28 हामरा प्रभु इसु ख्रिस्टको अनुग्रह तमुमि रइउ। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.