१ थेसलोनिकि 4 - डोटेलिपरमेस्वरलाइ मनपड्या जिबन जिउनु 1 अन्त्यमि मेरा भाइबिना हो, प्रभु इसुमि हामु तमुलाइ बिन्ति अरि अर्ति दिनाउ कि तमुले कसेरि जिउनु पड्डछ रे परमेस्वरलाइ खुसि पाड्डु पड्ड छ भन्न्या तमुले सिक्या छउ रे तसो अद्द लइ लाछउ, तसइमि तमु अजइ बड्डइ जाय। 2 क्यालाइकि हामुले तमुलाइ प्रभु इसुबटहइ पाया क्या क्या आग्या दिया थ्या त्यो त तमुलाइ थाइ छ। 3 क्यालाइकि परमेस्वरको इछ्या जो तमु पबित्तर होउ भन्या छ, तबइलाइ ब्यबिचारबटहइ अलगइ बस। 4 पबित्तर रे आदरसित आफना सरिललाइ अधिनमि राख्दु पड्न्छ भन्न्या कुरा तमु सप्पइले जान्नु पड्न्छ। 5 तर परमेस्वरलाइ नचिन्या अउर मान्सका जसेरि ब्यबिचार अद्द्या फुचेरो चाहाना अद्दु हुनइन्। 6 यइ बिसयमि कसइले लइ आफना दाइभाइकि स्वाइनिसित ब्यबिचार अरिबर आफना दाइ भाइका बिरुद्दमि पाप जनअरउ। हामुले तमुलाइ यइ बिसयमि अगाडिबटहइ चेतावनि दिसक्या छउँ। 7 क्यालाइकि परमेस्वरले हामुलाइ असुद्द हुनाइलाइ हइन, तर पबित्तर जिबन जिउनाइलाइ बोलाया हो। 8 तबइलाइ जइले यइ कुराको अबहेलना अरन्छ, तइले मान्सको हइन तर परमेस्वरको अबहेलना अरन्छ, जइले तमुलाइ आफना पबित्तर आत्मा दियो। 9 बिस्वासि भाइबिनालाइ पिरिम अद्द्या बिसयमि त तमुलाइ कसइले लेख्दु आबस्यक आथिन्, क्यालाइकि एक-अर्खामि पिरिम अद्दु भन्न्या तमु आफुइले लइ परमेस्वरबटहइ सिछ्या पाया छउ। 10 साँच्चि तमुले सारा माकेडोनिया छेत्रका सप्पइ बिस्वासि भाइबिनालाइ पिरिम अर्या छउँ। भाइबिना हो, अज बर्ता तसोइ अर भनि हामु तमुलाइ हउसला दिनाउ। 11 हामुले तमुलाइ भन्या जसेरि सान्तिमि जिबन जिउनाइलाइ तमरो जिबनको लछ्य बना। आफना आफनाइ काममि ध्यान दिय रे आफना हातले काम अर। 12 ताकि तमुलाइ अउर मान्सले आदर अद्द्या छन्। रे तमुलाइ खाँचो पड्डयाबेला अउरमि भर पड्डु पड्डया आथिन्। प्रभु दोसर्या आउन्या बिसयमि 13 तर भाइबिना हो, मर्या बिस्वासिका बिसयमि तमु अजानमि बस भन्न्या हामु इछ्या अद्दाइन्, रे तमुले आसा नहुन्या मान्सकि जसेरि सोक अद्दु जनपडउ। 14 क्यालाइकि हामु बिस्वास अद्दाउ कि, इसु मर्या रे अज जिउना भया रे तसेरि परमेस्वरमि बिस्वास अरिबर मर्या बिस्वासिलाइ लइ इसुसितइ जिउना बनाइबर लइजान्या छन्। 15 प्रभुले भन्या अन्सारइ हामु तमुलाइ भुन्नाउ कि प्रभु अज आउन्या दिनसम्म हामु जिउना हुन्या कोइ लइ मर्या मान्सभन्ना अगाडि उनुलाइ भेट्टया आथिनउ। 16 क्यालाइकि प्रभु आफुइले हुकुमका गर्जनसित, प्रधान स्वर्गदुतका स्वारमि रे परमेस्वरका तुरहिका आवाजमि स्वर्गबटहइ ओरलिबर आउन्या छन्, रे ख्रिस्टमि मर्याहुन्या पइल्लि जिउना भइबर उठ्या छन्। 17 तइपाछा हामु जिउनाइ सन्सारमि रयाहुन्या लइ प्रभुलाइ भिट्ट अगास तिनुसङइ बादलमि उठाइ लइगिन्या छउँ, रे यसेरि हामु सदाइँ प्रभुसित रन्याछउँ। 18 तबइलाइ यिनु कुराले एक अर्कालाइ हउसला दिय। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.