१ थेसलोनिकि 3 - डोटेलि1 तबइलाइ तमुसित छुट्टिबर बस्न निको नलाग्या हुनाले हामुलाइ एथेन्समि तिमोथि बिना मात्तरइ बस्न ठिकइ होलो भन्न्या लाग्यो। 2 रे हामरा भाइ तिमोथि ख्रिस्टको असल रइबार सुनाउन्या परमेस्वरका सेबक हुन्। तमुलाइ हउसला दिबर बिस्वासमि बलिया बनाउनाइलाइ हामुले तिमोथिलाइ तमरा वाँ पठाया हउँ। 3 ताकि यिनु दुःख-कस्टले अद्दा कोइ हरेस जनखाउ। तमु आफुइलाइ थाइ छ, कि यसाइ दुःख-कस्ट भोग्दाइलाइ हामु खटाइया हउ। 4 क्यालाइकि जबइ हामु तमुसित थ्या, तबइ तमुले दुःख-कस्ट भोग्दुइ पडन्छ भुनि हामुले अगाडिबटहइ भन्या थ्या। यो साँच्चि लइ भयो, रे तमुलाइ थाइ छ। 5 तबइलाइ मुइले अज रन नसकिबर तमरो बिस्वास बुज्जाइलाइ तिमोथिलाइ पठाया थ्या। क्यालाइकि सइतानले तमुलाइ परिछ्या अरिबर हामुले अर्या मिहिनत बेकार हुन्छ कि भनिबर मु डराया थ्या। 6 तर अइल तिमोथि तमुलाइ भेटिबर हामरा वाँ आयापइतर तमरो बिस्वास रे पिरिमको असल रइबार हामुलाइ सुनायो। तमुले हामुलाइ भिट्टया ठुलो इच्छा राखिबर सदाइँ पिरिमसित हामरो सम्झना अरन्छउ भुन्न्या रइबार तिनुले हामुलाइ सुनायो हामु लइ तमुलाइ भिट्टया तसोइ चाहाना अद्दाउ। 7 तबइलाइ मेरा प्यारा भाइबिना हो, तमु बिस्वासमि बलिया रइछउ भन्न्या रइबार सुनिबर हामरा सारा दुःख रे निरासामि सान्तोना पायउँ। 8 क्यालाइकि तमु प्रभुमि बलिया भया कुरा सुन्न्याबेला हामुले साँच्चि जिबन पाया जसो भयो। 9 तमरि निउति हामुले परमेस्वरलाइ जति धन्यबाद दिया लइ कम हुन्छ। क्यालाइकि तमरा खातिर हामु परमेस्वरका अगाडि आनन्न मनाउनाउ। 10 तमुसित भिट हुन सकउ भनिबर हामु रात-दिन परमेस्वरसित प्रार्थना अद्दाछउँ। भेट हुन पायो भन्या तमरा बिस्वासमि ज्या ज्या कुराको खाँचो छ, त्यो पुरा हुनेइथ्यो। 11 आब हामरा परमेस्वर पिता र प्रभु इसुलेइ हामुलाइ तमरा वाँ आउन्या बाटो खोलिदिन्या छन्। 12 जसेरि हामु तमुलाइ पिरिम अद्दाउ तसेरि प्रभुले तमुलाइ एक-अर्खासित रे सप्पइ मान्ससित पिरिममि बड्डइ जान सक भनिबर हामु तमरि निउति प्रार्थना अद्दाउ। 13 यसेरि उनरा सप्पइ पबित्तर जनसित हामरा प्रभु इसु ख्रिस्ट दोसर्या आउन्याबेला उनुले हामरा परमेस्वर पिताका अगाडि तमरो ह्रिदय पबित्तर रे निस्खोट बनाइ इस्तिर अराउन्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.