१ थेसलोनिकि 2 - डोटेलिथेसलोनिके सहरमि पावलको काम 1 मेरा प्यारा भाइबिना हो, तमुसितको हामरो भेटघाट खालिसारको भएइन, यो त तमुलाइ थाइ छ। 2 ताँ आउनुभन्ना अगाडि फिलिप्पिका मान्सले हामुलाइ दुःख दियो रे हामरो बेइजत अर्यो, यो कुरा लइ तमुलाइ थाइ छ। तबलाइ परमेस्वरले हामुलाइ साहास दियो रे बिरोधि जति भया लइ हामुले तमुलाइ असल रइबार सुनाइबरइ छाड्याउँ। 3 क्यालाइकि हामरो अर्ति-उपदेस भुल या असुद्दताबटहइ आया होइन्, न त यो छलकपटले भरिया हो। 4 तर परमेस्वरले हामुलाइ योग्य ठानिबरइ असल रइबार सुनाउन्या जिम्मा दियो। तबइलाइ मान्सलाइ खुसि पाड्डाइलाइ हइन, तर हामरो ह्रिदय जाँच्न्या परमेस्वरलाइ खुसि पाड्डलाइ हामु बोल्लाउँ। 5 तमुलाइ थाइ छ, हामुले तमुसँग चाप्लुसि अद्द्या कुरा अरेइन्, न त केइ पाउन्या लोभले अर्यउँ। परमेस्वरइ यइ कुराका साछि छन्। 6 हामुले तमुबटहइ रे अउर मान्सबटहइ प्रसम्सा खोजेइन्। हुना त हामु ख्रिस्टका प्रेरित भया हुनाले हामुलाइ प्रसम्सा पाउन्या हक थ्यो। 7 आफना बालखलाइ हेरबिचार अद्देइ धाइ-इजाकि जसेरि तमरा अगाडि नम्र भयउँ। 8 तबइलाइ परमेस्वरका असल रइबारकि निउति मात्तरइ हइन्, तर हामु तमरि निउति मद्द लइ तयार थ्यउँ। क्यालाइकि तमु हामरि निउति भउतइ प्यारा भयाथ्या। 9 मेरा प्यारा भाइबिना हो, तमुलाइ यादइ छ, कि परमेस्वरको असल रइबार सुनाउन्याबेला लइ हामुले कसइलाइ भार नपणउ भनिबर आफनि निउति दिनरात मरिमेटि काम अर्याउँ। 10 परमेस्वर रे तमु आफइ साछि छउ, कि बिस्वासिका अगाडि हामरो ब्यबहार पबित्तर, धार्मिक रे निर्दोस थ्यो। 11 क्यालाइकि तमुलाइ थाइ छ, बाले आफना चेला-चेलिलाइ जसोइ अरि हामुले तमुलाइ कसेरि परमेस्वरका मनपड्डया बाटामि हिट्टया साहास दियउँ। 12 क्यालाइकि तमरो चालचलन परमेस्वरका योग्यको हउ, जइले तमुलाइ उनरो आफनो राज्य रे महिमामि बोलाया छन्। 13 हामुले तमुलाइ परमेस्वरको बचन सुनाउन्या बेला तमुले त्यो बचन मान्सले जसेरि होइन् तर यो बास्तबमि परमेस्वरइको बचन हो भनिबर ग्रहण अर्या। तइ बचनले तमु बिस्वास अद्द्याका जिबनमि काम अद्दा छ। यइकि निउति हामु परमेस्वरलाइ सदाइँ धन्यवाद दिनाउ। 14 क्यालाइकि मेरा प्यारा भाइबिना हो, तमु लइ इसु ख्रिस्टमि बिस्वास अद्द्या यहुदियामि भया परमेस्वरका मण्डलि जसाइ भया छउ, क्यालाइकि यहुदियाका मण्डलिले इज्राएलबटहइ जसो दुःख-कस्ट भोग्यो तसेरि तमुले लइ आफनाइ जातिका मान्सबटहइ दुःख कस्ट भोग्या। 15 यिनुइ यहुदिले प्रभु इसु ख्रिस्टलाइ रे अगमबक्तालाइ मार्यो, रे तिनुले हामुलाइ लइ सतायो। परमेस्वरलाइ मन नपड्डया काम अर्यो रे सप्पइ मान्सका बिरोधि भया। 16 परमेस्वरको असल रइबार अउरजातिले सुनिबर मुक्ति नपाउन भनिबर तिनुले असल रइबार प्रचार अद्द रोक्द्या कोसिस अर्या छन्। यसेरि तिनरो पाप थुपणिन्ना छ। तर आब त परमेस्वरको क्रोध तिनुमि पण्या छ। थेसलोनिकिलाइ भेट अद्द्या पावलको ठुलो इछ्या 17 मेरा प्यारा भाइबिना हो, तमुबटहइ छुट्टिबर एकइबेरइ निउति सरिलमि धेक्द नपाया लइ मनमि त छुट्टिया आथिनउँ। हामुलाइ तमुसित अज भेट्टया भउतइ ठुलो इछ्या छ। 18 क्यालाइकि हामु तमरा वाँ आउनाइलाइ त खोज्जाथ्या। मु पावल त झिगइ बारम्बार आउन खोज्या तर सइतानले हामुलाइ रोक्यो। 19 हामरा प्रभु इसु जब आउन्या छन्, तइबेला उनरा अगाडि हामरो आसा, आनन्न, रे गउरबको मुकुट तमुइ हइनउ ब? 20 साँच्चि तमुइ हामरा आनन्न रे गउरब हउ। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.