१ थेसलोनिकि 1 - डोटेलि1 मु पावल, सिलास रे तिमोथिबटहइ परमेस्वर पिता रे प्रभु इसु ख्रिस्टमि थेसलोनिके सहरमि भया मण्डलिलाइ यो चिट्ठि लेख्दाछु। तमुलाइ परमेस्वरले अनुग्रह रे सान्ति दिउन्। थेसलोनिकेका बिस्वासिलाइ धन्यबाद 2 हामु सदाइँ तमु सप्पइकि निउति परमेस्वरलाइ धन्यबाद दिनाउ रे जइबेला लइ हामरा प्रार्थनामि तमुलाइ सम्जिन्या अद्दाछु। 3 हामरा प्रभु इसु ख्रिस्टमि तमुले अर्या बिस्वासको काम, पिरिमसित मिहिनत रे आसाको धइर्या हमरा परमेस्वर पिताका अगाडि जइबेला लइ सम्जिन्या अद्दाछउ। 4 मेरा प्यारा भाइबिना हो, हामुलाइ यो कुरा थाइ छ, परमेस्वरलेइ तमुलाइ पिरिम अरिबर छान्या हुन। 5 क्यालाइकि हामुले सुनाया असल रइबार बेकारको थेइन, तर पबित्तर आत्मामि रे सक्तिसित सुनाइया एकदमइ साँचो कुरा थ्यो। हामु तमुसित हुन्याबेला तमरि निउति हामरो जिबन कसो थ्यो भन्न्या कुरा तमुले निकेरि जान्या छउँ। 6 तमु प्रभु रे हामरा नमुनामि चल्या भया, क्यालाइकि पबित्तर आत्माले दिया आनन्नसित तमुले भउतइ कस्टमि बचन ग्रहण अर्या। 7 तबइलाइ तमु माकेडोनिया रे अखइयामि भया सप्पइ बिस्वासिकि निउति एक उदारण भया छउँ। 8 क्यालाइकि तमुबटहइ परमेस्वरको बचन माकेडोनिया रे अखइयामि मात्तरइ फइलिया हइन। तर परमेस्वरमि भया तमरो बिस्वास चारइतिर फइलिया छ, यइ बिसयमि हामुले अउर केइ भुन्न आथिन्। 9 क्यालाइकि जइ तरिकाले हामरो स्वागत तमरा वाँ भयो। परमेस्वरको सेबा अद्दाइलाइ तमुले मुर्तिलाइ छाडिबर जिउना परमेस्वरतिर फर्क्या। यो कुरा तिनु सप्पइ मान्सले आफुइ बताउनाछन्। 10 उनुले भुन्यो कि तमु स्वर्गबटहइ आउन्या परमेस्वरका चेलाको बाटो हेरि बसिरइछउ। परमेस्वरले मर्याबटहइ जिउना पाड्या इसु उनुइ हुन्। आउन्नारया परमेस्वरका न्यायबटहइ हामुलाइ छुट्कारा दिन्या उनुइ हुन्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.