Si Apwesa 9 - Buki Tabu Lowaenei 1919

‘UPWA 9.

¹ Ga Ieoba ‘i ona Mose ‘enaia, Parao ‘ena ‘u da rugu, ta ‘ena ‘u da simana, Ieoba me Eberu ‘idi Eaubada, gete nadigega ‘i gwae ‘Igu tomota ‘u da tagwaredi be si da tauia, be ‘enega ‘eguia si da guinua.

² ‘Abo geanuaio ‘u tagwaredi be si da tauia ta ‘enega, ta ‘u egagaredi ‘ataia,

³ U ‘ita, Eaubada nimana ‘imu bulomakau baguraia ‘edia, oseiao ‘edia, ‘aseiao ‘edia, kameliao ‘edia, bulomakau iau ‘edia, sipi iau ‘edia: muia didiga sinabwana ‘i da apwesa.

⁴ Ta Ieoba Iseraela ‘ina bulomakau ta Aigupito ‘ina bulomakau gamwagamwanidia ‘i da raba: ta Iseraela tubunao ‘idi iage iauiauna gea‘abo ‘e bweu ‘ediega ‘i da mwawamwawasa.

⁵ Ta Ieoba tuta ‘e bweuna i ‘aseiena, ‘i ona, Gibua‘i Ieoba iage gete ‘i da guinua ‘asa ‘enaia.

⁶ Ta ulisia Ieoba iage gote ‘i guinuena, ta Aigupito ‘ina bulomakau iauiaudi si ‘elomwawasa: ta Iseraela tubunao ‘idi bulomakau ‘ediega nigea ‘e bweu ‘i mwawamwawasa.

⁷ Ta Parao i ‘etune, ta, wa ‘ita, me Iseraela ‘idi bulomakau ‘ediega nigea ‘e bweu ‘i mwawamwawasa. Ta Parao ‘atena ‘i mwau, ta nigea tomota ‘i da tagwaredi be si da tauia.

⁸ Ta Ieoba ‘i ona Mose ‘ena ta Aarona ‘ena, ‘Ebe‘egabu karikauiega nimamiega wa da sapwari, ta Mose ‘i da ulaesaware garewa ‘enaia Parao matanaia.

⁹ Ta ‘i da e kau matagidarina ‘asa Aigupito maibo‘ana ‘enaia, ta ‘i da ‘elalawaa pulu iaiiai ‘ediega ‘i da tabwama tai ‘enaia ta bulomakau ‘enaia, ‘asa Aigupito maibo‘ana ‘enaia.

¹⁰ Ta ‘ebe‘egabu karikaunega si ‘ewena, ta Parao matanaia si tooro; ta Mose ‘i ulasawarena garewa ‘enaia; ta ‘i elalawaa pulu iaiiai ‘ediega ‘i tabwama tai ‘enaia ta bulomakau ‘enaia.

¹¹ Ta to oba nigea kapekapeana si tooro Mose matanaia lalawaa manudi; lalawaa si miami to oba ‘edia ta ‘enega, ta me Aigupito iauiaudi ‘edia.

¹² Ta Ieoba Parao ‘atena ‘i giepa‘arina, ta nigea ‘edia ‘i nonono; na‘ieana Ieoba ‘i ona Mose ‘enaia.

¹³ Ta Ieoba ‘i ona Mose ‘enaia, Gonagonaia ‘u da tooro manini, ta Parao matanaia ‘u da tooro, ta ‘ena ‘u da ona, Ieoba, me Eberu ‘idi Eaubada, gete nadigega ‘i ona, ‘Igu tomota ‘u da tagwaredi be si da tauia, be ‘enega ‘eguia si da guinua.

¹⁴ Tuta gete ‘enega ‘igu muia iauiauna ia da ‘etunedi ‘ateio ‘enaia ta ‘enega, ‘imu toguinuao ‘edia be, ‘imu tomota ‘edia be; be ‘enega ‘u da mwaratoni ‘aene nigea ‘e bweu ‘abo‘agu nadigega gabura maibo‘ana ‘enaia.

¹⁵ Gete tuga ni‘atu nai nimagu ia da iasitoto ta ‘enega, ta ni‘atu nai ia unuio ta ‘imu tomota le‘ossega, ta bare‘uiega ni‘atu nai ia da ‘upwaiaulemu:

¹⁶ Ona ‘ai‘aila gete manuna ia gietooromu, be ‘enega ‘igu waiwai ia da e‘ita ‘emuia, ta ‘aene ‘agu esana si da ‘inana gabura maibo‘ana ‘enaia.

¹⁷ Gete ‘enega ‘u gitu‘eiemu nai ‘igu tomota ‘edia, be ‘enega gea‘abo ‘u da tagwatagwaredi be si tautauia?

¹⁸ U ‘ita, gibua‘i tuta gete nadigega ‘usana‐patuna mwauwawasae ia da gie‘usana, nadigega nigea Aigupito ‘ena ‘i miami asiata ‘enega ‘ana ‘autu si sa‘u ununa ga batua.

¹⁹ Gete ‘enega ‘u da ‘etune ta ‘enega, ‘imu bulomakau ta ‘imu iage iauiauna bagurega ‘u da lomaniniedima; tai ta bulomakau iauna baguraia si miamiana, ‘abo nigea si ‘au‘ewedima anuaia, ‘usanapatuna ‘edia ‘i da mwa‘utama, ta si da mwawasa.

²⁰ Tauna Parao ‘ina toguinua ‘ediega Ieoba ‘ina ona ‘i matautena ‘ina toguinuao ta ‘ina bulomakau i ‘edenedi anua ‘edia:

²¹ Ta tauna Ieoba ‘ina ona nigea i ‘ama‘amaiabe ‘ina toguinuao ta ‘ina bulomakau ‘i pilisinedi baguraia.

²² Ta Ieoba ‘i ona Mose ‘enaia, Nimaio ‘u da iasitoto garewa ‘enaia, be ‘enega ‘usanapatuna ‘i da miami ‘asa Aigupito maibo‘ana ‘enaia, tai ‘enaia, bulomakau ‘enaia be, bagura pwaturina iauna ‘enaia be, ‘asa Aigupito maibo‘ana ‘ena.

²³ Ta Mose ‘ina keweliwelili ‘i e‘etotu‘eiena garewa ‘enaia: ta Ieoba weparara ta ‘usana patuna i ‘etunedi, ta ‘awesabelulu ‘i pili mwa‘uta bare‘u ‘enaia; ta Ieoba ‘usana‐patuna ‘i gie‘usana ‘asa Aigupito ‘enaia.

²⁴ Ta ‘enega ‘usana patuna ‘i apwesama, ta ‘awesabelulu ‘usana‐patuna ma‘ieana gamwanaia, mwau‐wawasae, nadigega nigea ‘i apwesa ‘asa Aigupito maibo‘ana ‘enaia tuta ‘enega ‘i e ‘asa.

²⁵ Ta ‘usana patuna iage iauiauna baguraia si miami, tai ta bulomakau ruarua, ‘i unudi ‘asa Aigupito maibo‘ana ‘enaia; ta ‘usana‐patuna bagura pwaturina iauna ‘i mutudi, ta bagura ‘ina kaiwenao iauna ‘i pe‘udi.

²⁶ ‘Asa Gosena namo ‘enaia, ‘ena Iseraela tubunao si miami, ‘ena nigea ‘e bweu ‘usana‐patuna.

²⁷ Ta Parao i ‘etune, ta Mose be Aarona manudi ‘i bwau, ta ‘i eonedi, Tuta gete ni‘atu ia loegesi: Ieoba ‘i paruparuna, ta ‘abo‘agu ta ‘igu tomota ‘a to‘umali.

²⁸ Ieoba ‘ena ‘u da sida; weparara waiwai ta ‘usana‐patuna ni‘atu sawesawenaia ta ‘enega; ta ia da tagwaremi be wa da tauia, ta gea‘abo wate wa da miami.

²⁹ Ta Mose ‘i ona ‘enaia, Tuta ‘enega ‘asega ia tauiawa, nimagu ia da tuweiari Ieoba ‘enaia; weparara si da losa‘u, ta ‘usana‐patuna gea‘abo wate; be ‘enega ‘u da mwaratoni ‘aene gabura Ieoba ‘ina gabura.

³⁰ Ta manuio ta ‘imu toguinuao manudi, ia mwaratoni gea‘abo gete ‘enega Ieoba Eaubada matanaia wa da matamatauta.

³¹ Ta marakwa ta baali si esilae: baali masoluna ta ‘enega, ta marakwa masenina.

³² Ta witi be betia nigea si esilae: nigea si sinasinabwa ta ‘enega.

³³ Ta Mose Parao ‘enega ‘asega ‘i tauiawa, ta nimana ‘i tuweiarina Ieoba ‘enaia: ta wepararaiao be ‘usana‐patuna si losa‘u, ta ‘usana nigea ‘i daudau bare‘uia.

³⁴ Ta ni‘atu Parao i ‘itena ‘aene ‘usana ta ‘usana‐patuna ta weperaraiao si losa‘u, ga ‘i loegesi sinabwawawasae, ta ‘atena ‘i giemwau, tauna ta ‘ina to‐guinuao.

³⁵ Ta Parao ‘atena ‘i pa‘ara, ta Iseraela tubunao nigea ‘i tagwatagwaredi be si da tauia; na‘ieana Ieoba Mose ‘ena ni‘atu ‘i gwae.