Si Apwesa 8 - Buki Tabu Lowaenei 1919

‘UPWA 8.

¹ Ta Ieoba ‘i ona Mose ‘enaia, Parao ‘ena ‘u da rugu, ta ‘ena ‘u da gwae, Ieoba gete nadigega ‘i gwae, ‘Igu tomota ‘u da tagwaredi be si da tauia, be ‘enega ‘eguia si da guinua.

² Ta ‘abo geanuaio ‘u da tagwaredi be si da tauia, u ‘ita, ‘imu esena iauiauna ia da unudi kwekwe ‘ediega:

³ ta boasi‘awa ‘i da maa kwekwe ‘ediega, taudi si da tu‘e be ‘imu anuaia si da rugu, ‘imu anua‐‘ebe‘eno ‘ena be, ‘imu ‘ebe‘eno ‘ena be, ‘imu toguinuao ‘idi anua ‘ena be, ta ‘imu tomota ‘edia be, ‘imu ‘ebegabu ‘edia be, ‘imu gaeba‘ebebibi ‘edia be:

⁴ ta kwekwe si da tu‘e ‘emuia be, ‘imu tomota ‘edia be, ‘imu toguinua iauiaudi ‘edia be.

⁵ Ta Ieoba ‘i ona Mose ‘enaia, Aarona ‘ena ‘u da gwae, Nimaio ma‘imu keweliwelili ‘u da iasitoto boasi‘awadi debadia be, boasitaitaidi debadia be, boasi‐gomwagomwadi debadia be, ta kwekwe ‘u da bubudi be si da tu‘e ‘asa Aigupito ‘enaia.

⁶ Ta Aarona nimana ‘i iasitotona Aigupito boasinao debadia; ta kwekwe si tu‘ema, ta ‘asa Aigupito si teteuiosina.

⁷ Ta to oba si guinua nadigega ‘adi obaiao ‘ediega, ta kwekwe si ‘au‘ewatu‘edima ‘asa Aigupito ‘enaia.

⁸ Ga Parao Mose ta Aarona, ‘i bwauiedi, ta ‘i gwae, Ieoba wa da sidei, be kwekwe ‘eguiega ‘i da ‘ewedi, ta ‘igu tomota ‘ediega; ta tomota ia da tagwaredi be si da tauia, be ‘enega si da taria Ieoba ‘enaia.

⁹ Ta Mose ‘i ona Parao ‘enaia, ‘Imu loina ‘eguia ia da nonona: to tuta ‘enega manuio ia da sidasida, ‘imu toguinua manudi be, ‘imu tomota manudi be, be ‘enega kwekwe si da saoora ‘emuiega ta ‘imu anua ‘ediega, ta boasi‘awa namo ‘ena si da miami?

¹⁰ Ta ‘i gwae, Gibua‘i ‘enega. Ta ‘i gwae, ‘Imu ona nadigega ‘i da apwesa: be ‘enega ‘u da mwaratoni ‘aene nigea ‘e bweu Ieoba ‘ima Eaubada nadigega.

¹¹ Ta kwekwe ‘emuiega si da tauia, ta ‘imu anuao ‘ediega, ta ‘imu toguinuao ‘ediega, ta ‘imu tomota ‘ediega; boasi‘awa namo ‘ena si da miami.

¹² Ta Mose be Aarona Parao ‘enega si tauiawa: ta Mose ‘i bwa‘u Ieoba ‘ena kwekwe manudi taudi ‘i me‘edi Parao ‘enaia.

¹³ Ta Ieoba ‘i guinua nadigega Mose ‘ina ona; ta kwekwe si mwawasa anua ‘edia ta, ‘atamanaia ta, baguraia ta.

¹⁴ Ta maribwasa ta maribwasa si ‘esiwa‘etupwedi: ta ‘asa ‘i mwa‘ulu.

¹⁵ Ta ni‘atu Parao i ‘itena ‘aene si eiawai‘ata, ga ‘atena ‘i giemwauna, ta nigea ‘edia ‘i da nono; na‘ieana Ieoba ni‘atu ‘i ona.

¹⁶ Ta Ieoba ‘i gwae Mose ‘enaia, ‘Aarona ‘ena ‘u da ona, ‘Imu keweliwelili ‘u da iasitotona, ta bwa‘a kauna ‘u da ununa, be ‘i da e‘utu ‘asa Aigupito maibo‘ana ‘enaia.

¹⁷ Ta si guinua nadigega; ta Aarona nimana ma‘ina keweliwelili ‘i iasitotona, ta bwa‘a kauna ‘i ununa, ta ‘utu si apwesa tai ‘enaia ta, bulomakau ‘enaia ta: bwa‘a kauna maibo‘ana ‘i e ‘utu ‘asa Aigupito maibo‘ana ‘enaia.

¹⁸ Ta to‐obao si guinua nadigega ‘adi obaiao ‘ediega be ‘utu si da ‘ewedima, ta nigea kapekapeana si da ‘ewedima: ta ‘utu si miami tai ‘enaia ta, bulomakau ‘enaia ta.

¹⁹ Ga to obao si gwae Parao ‘enaia, Gete Eaubada nimamatagigina: ta Parao ‘atena ‘i pa‘ara, ta nigea ‘edia ‘i da nono; na‘ieana Ieoba ‘i ona.

²⁰ Ta Ieoba ‘i ona Mose ‘enaia, Gonagonaia ‘u da tooro manini, ta Parao matanaia ‘u da tooro; u ‘ita, ‘i apwesama boasi ‘enaia; ta ‘ena ‘u da gwae, Ieoba gete nadigega ‘i gwae, ‘Igu tomota ‘u da tagwaredi be si da tauia, be ‘enega ‘eguia si da guinua.

²¹ ‘Abona nai, ‘abo nigea ‘igu tomota ‘u da tagwaredi be si da tauia, u ‘ita, nenewara iau ia da ‘etunena ‘emuia, ‘imu to guinua ‘edia be, ‘imu tomota ‘edia be, ‘imu anua ‘edia be: ta me Aigupito ‘idi anua si da maa nenewara iau ‘ediega, ta wate bare‘u ‘ena si miami.

²² Ta asiata gote ‘asa Gosena ‘ena ‘igu tomota si miami, ia da lorabena, be ‘enega gea‘abo nenewara iau ‘ena si da miami; ‘arena ‘u da mwaratoni ‘aene ‘abo‘agu Ieoba bare‘u gamwagamwaninaia.

²³ Ta ‘igu tomota ta ‘imu tomota gamwanidia raba ia da sa‘u: gibua‘i tuga we‘iwe‘iiaia gete ‘i da miami.

²⁴ Ta Ieoba ‘i guinua nadigega; ta nenewara iaudidigadi si mai Parao ‘ina anua ‘enaia, ta ‘ina toguinua ‘idi anua ‘edia: ta ‘asa Aigupito maibo‘ana ‘enaia ‘asa ‘i saoora nenewara iaudi manudi.

²⁵ Ta Parao Mose ta Aarona manudi ‘i bwau, ta ‘i ona, Wa da tauia, wa da taria ‘imi Eaubada ‘enaia ‘asaia.

²⁶ Ta Mose i gwae, Nigea sawesawenaia nadigega ‘a da guinua; me Aigupito ‘idi iage gadilulu ‘a da tarie Ieoba ‘ima Eaubada ‘enaia ta ‘enega: u ‘ita, me Aigupito ‘idi iage gadilulu ‘a da tarie matadia, be ‘enega si da lo‘ibwe‘ibwema?

²⁷ ‘A da tauia mitawaia ga asiata ‘e toi, ta ‘a da taria Ieoba ‘ima Eaubada ‘enaia, na‘ieana ‘i da eonema.

²⁸ Ta Parao ‘i gwae, Ia da tagwaremi be wa da tauia, be ‘enega wa da taria mitawaia Ieoba ‘imi Eaubada ‘enaia; ta gete namo gea‘abo wa tautauia ‘edasora wawasae: manugu ‘u da sida.

²⁹ Ta Mose ‘i gwae, U ‘ita, ‘emuiega ia tauia, ta Ieoba ‘ena ia da sida be nenewara iau gibua‘i si da sawara Parao ‘enega, ‘ina toguinuao ‘ediega; ‘ina tomota ‘ediega: gete tuga gea‘abo Parao ‘i da bubuna kabokabo wate be tomota nigea ‘i tagwaredi be si da tauia be si da taria Ieoba ‘enaia.

³⁰ Ta Mose Parao ‘enega ‘i apwesa, ta Ieoba ‘ena ‘i sida.

³¹ Ta Ieoba ‘i guinua nadigega Mose ‘ina ona; ta nenewara iauna ‘i tauiedi Parao ‘enega, ‘ina toguinua ‘ediega, ta ‘ina tomota ‘ediega; nigea ‘e bweu ‘i miami.

³² Ta Parao ‘atena ‘i giemwau tuta gete wate, ga nigea tomota ‘i tagwatagwaredi be si da tauia.