Si Apwesa 7 - Buki Tabu Lowaenei 1919

‘UPWA 7.

¹ Ta Ieoba ‘i ona Mose ‘enaia, U ‘ita, ‘oio ia bubumu eaubada ‘e bweuna Parao ‘enaia: ta tasio Aarona ‘i da ‘imu paropita.

² Iage iauiauna ia ‘eona‘ena ‘emuia ‘u da ‘egwaeiedi: ta tasio Aarona ‘i da gwae Parao ‘enaia, ‘aene Iseraela tubunao ‘i da tagwaredi be ‘ina ‘asega si da tauiawa.

³ Ta Parao ‘atena ia da giepatu, ta ‘igu we‘iwe‘iiaia ta ‘igu guinua‐‘ebenuaowana ia da gieiau ‘asa Aigupito ‘enaia.

⁴ Ta Parao gea‘abo ‘emia ‘i da nonono, ta nimagu ia da sa‘u Aigupito ‘enaia, ta ‘igu bodao, ‘igu tomota Iseraela tubunao, ia da ‘au‘ewedima ‘asa Aigupito ‘enega loina sinabwadi ‘ediega.

⁵ Ta ‘ena nimagu ia iasitoto Aigupito ‘enaia, ta Iseraela tubunao ia ‘au‘ewedima gamwagamwanidiega, ga me Aigupito si da mwaratoni ‘aene ‘abo‘agu Ieoba.

⁶ Ta Mose ta Aarona si guinua nadigega; na‘ieana Ieoba ‘i eonedi, na‘ieana si guinua.

⁷ Ta tuta ‘enega si gwae Parao ‘enaia Mose ‘ana iakwarao ‘e eti, ta Aarona ‘ana iakwara ‘e eti teri.

⁸ Ta Ieoba ‘i ona Mose ‘ena ta Aarona ‘ena, ‘i gwae,

⁹ ‘Ena Parao ‘i ona ‘emia, ‘i gwae, ‘Ebenuaowana ‘e bweu wa da e‘ita manumi: ga Aarona ‘ena ‘u da ona, ‘Imu keweliwelili ‘u da ‘ewa, ta ‘u da ula‐mwa‘ute Parao matanaia, be ‘i da emoata.

¹⁰ Ta Mose ta Aarona si rugu Parao ‘enaia, ta si guinua nadigega, na‘ieana Ieoba ‘i onaona: ta Aarona ‘ina keweliwelili ‘i ula‐mwa‘utena Parao matanaia ta ‘ina to‐guinuao matadia, ta ‘i emoata.

¹¹ Ga Parao wate tosinasinapu be to barau ‘i bwauiedi: ta taudi wate, Aigupito ‘ina to oba, si guinua nadigega ‘adi obaiao ‘ediega.

¹² Tai ‘e bweuna ‘e bweuna ‘ina keweliwelili ‘i ula‐mwa‘utena ta ‘enega, ta si emoata: ta Aarona ‘ina keweliwelili ‘idi keweliweliliao i ‘etonedi.

¹³ Ta Parao ‘atena ‘i pa‘ara, ta ‘edia nigea ‘i nonono: na‘ieana Ieoba ‘i gwae ni‘atu.

¹⁴ Ta Ieoba ‘i gwae Mose ‘enaia, Parao ‘atena ‘i mwau, geanuana tomota ‘i tagwaredi be si da tauia.

¹⁵ Gonagonaia Parao ‘ena ‘u da tauia; u ‘ita, boasi ‘ena ‘i tautauia; ta boasi ‘awa tupitupinaia ‘u da tooro sabi lobena; ta keweliwelili tauna i ‘eemoatana nimamuiega ‘u da ‘ewena.

¹⁶ Ta ‘ena ‘u da gwae, Ieoba, me Eberu ‘idi Eaubada, ni‘atu i ‘etunegu ‘emuia, ‘i ona, ‘Igu tomota ‘u da tagwaredi be si da tauia, be ‘eguia si da guinua mitawaia: ta, u ‘ita, ni‘atu nigea ‘u nonono.

¹⁷ Gete nadigega Ieoba ‘i gwae, Gete ‘ena ‘u da mwaratoni ‘abo‘agu Ieoba: u ‘ita, Keweliwelili nimagu ‘ena ‘i miami ‘enega boasiao taudi boasi ‘awa ‘ena si miami ia da unudi, ta si da erara.

¹⁸ Ta iana boasi‘awa ‘ena si miami si da mwawasa, ta boasi‘awa ‘i da mwa‘ulu; ta me Aigupito numa boasi boasi‘awanega si da lo‘ubusutooroe.

¹⁹ Ta Ieoba ‘i ona Mose ‘enaia, Aarona ‘ena ‘u da gwae, ‘Imu keweliwelili ‘u da ‘ewa, ta Aigupito boa‘inao ‘edia nimaio ‘u da iasitoto, ‘adi boasi‘awa ‘edia, ‘adi boasisalasala ‘edia, ‘adi boasi‐gaula ‘edia, ‘adi boasi‐gomwagomwadi iauiauna ‘edia, be si da erara; ta ‘asa Aigupito maibo‘ana ‘ena rara ‘i da miami, gaeba kaiwe ta gaeba gurewa ruarua ‘edia.

²⁰ Ta Mose ta Aarona si guinua nadigega, na‘ieana Ieoba ‘i onaona; ta keweliwelili ‘i gilagasina, ta boasiao si miami boasi‘awa ‘enaia ‘i ununa, Parao matanaia, ta ‘ina toguinuao matadia; ta boasi iauiauna boasi‘awa ‘ena si miamiana si erara.

²¹ Ta iana boasi‘awa ‘ena, si ‘elo‘amasa; ta boasi‘awa ‘i mwa‘ulu, ta me Aigupito nigea kapekapeana boasi‘awanega si da numa boasi; ta rara ‘asa Aigupito maibo‘ana ‘ena ‘i miami.

²² Ta Aigupito to obao si guinua nadigega ‘adi obaobaiao ‘ediega: ta Parao ‘atena ‘i patu, ta nigea ‘edia ‘i da nono: na‘ieana Ieoba ‘i gwae.

²³ Ta Parao ‘i sana‘ila ga ‘ina anuaia ‘i rugu, ta iage gete nigea ‘atena ‘ena ‘i sa‘usa‘u.

²⁴ Ta me Aigupito iauiaudi boasi sabi numa manuna si taitai boasi‘awa serabenaia; nigea kapekapeana boasi‘awa boasina ‘enega si da numa ta ‘enega.

²⁵ Ta Ieoba boasi‘awa ‘i ununa murinaia, ga asiata ‘e sebeni si gumwara.