Si Apwesa 6 - Buki Tabu Lowaenei 1919

‘UPWA 6.

¹ Ta Ieoba ‘i ona Mose ‘ena, Gete ‘u da ‘ita iage ia da guinua Parao ‘enaia; nima waiwaiega ‘i da tagwaredi be si da tauia ta ‘enega, ta nima waiwaiega ‘ina ‘asega ‘i da pa‘idi.

² Ta Eaubada ‘i gwae Mose ‘ena, ta ‘i eonena, ‘Abo‘agu Ieoba:

³ ta ia apwesa Aberaamo ‘ena, Isaako ‘ena, ta Iakobo ‘ena, Eaubada Toewaiwaisana nadigega, ta ‘agu esana Ieoba ‘enega nigea si mwaratonigu.

⁴ Ta wate ‘igu ona‘upa‘upa ma‘edi ia giepa‘arina, be ‘asa Kanania ia da ‘ebwaedi, ‘idi miamia ‘ana ‘asa, ‘ena si miamia.

⁵ Ta wate Iseraela tubunao ‘idi dedoi ni‘atu ia nonona, taudi me Aigupito si ionidi; ta ‘igu ona‘upa‘upa ia nua‘i‘isina.

⁶ Ta ‘enega Iseraela tubunao ‘edia ‘u da gwae, ‘Abo‘agu Ieoba, ta me Aigupito ‘idi ‘a‘ara ‘ediega ia da ‘au‘ewemi, ta ‘idi iona ‘enega ia da ‘etoseemi, ta ia da li‘amimi nima iasitotoega, ta loina sinabwadi ‘ediega:

⁷ ta ia da ‘au‘ewemi ‘eguia ‘igu tomota, ta ‘Abo‘agu Eaubada ‘emia; ta wa da mwaratoni ‘aene ‘abo‘agu Ieoba ‘imi Eaubada, tauna me Aigupito ‘idi ‘a‘ara ‘agaraunega i ‘au‘ewemi.

⁸ Ta ‘asa ‘ena ia da ‘au‘ewemi, tauna manuna nimagu ia gilagasina be ia da ‘ebwaea‘ena Aberaamo ‘enaia, Isaako ‘enaia, ta Iakobo ‘enaia; ta ia da ‘ebwaea‘ena ‘emia gwegwe manuna: ‘Abo‘agu Ieoba.

⁹ Ta Mose ‘i ona nadigega Iseraela tubunao ‘edia; ta Mose nigea si da nonona ‘ate‘uia‘uia manuna, ta iona elo‘uia manuna.

¹⁰ Ta Ieoba ‘i gwae Mose ‘enaia, ‘i ona,

¹¹ ‘U da rugu, Parao Aigupito ‘ana king ‘ena ‘u da gwae, be Iseraela tubunao ‘i da tagwaredi be ‘ina ‘asega si da tauia.

¹² Ta Mose Ieoba matanaia ‘i gwae, ‘i ona, U ‘ita, Iseraela tubunao nigea ‘eguia si nono; ga mwa‘adega Parao ‘i da nonogu, ‘abo‘agu sopagu nigea si lodabenamo?

¹³ Ta Ieoba Mose ‘ena ta Aarona ‘ena ‘i gwae, ta ona i ‘ebwaedi Iseraela tubunao manudi, ta Parao Aigupito ‘ana king manuna, Iseraela tubunao si da ‘au‘ewedima ‘asa Aigupito ‘enega.

¹⁴ Tamadi ‘idi anuao ‘idi tomatua getedi: Rubena Iseraela ‘ina tomatua natunao me‘olotodi; Anoka, Palu be, Eserona, Kaami be: getedi Rubena ‘ina susuiao.

¹⁵ Ta Simeona natunao me‘olotodi; Iemuela, Iamina be, Oada be, Iakina be, Soara be, Siaula waine Kanania natuna be: getedi Simeona ‘ina susuiao.

¹⁶ Ta getedi ‘adi esana Lebi natunao me‘olotodi ‘idi tubua ‘atua; Gerisona, Koiata be, Merari be; ta Lebi iawasina ‘ana iakwarao e wan anaredi ta tati sebeni.

¹⁷ Gerisona natunao me‘olotodi be; Libenii ta Simei, ‘idi susuiao ‘atua.

¹⁸ Ta Koiata natunao me‘olotodi; Amarama, Isiara be, Eberona be, Usaela be: ta Koiata iawasina ‘ina iakwarao e wan anaredi ta tati teri.

¹⁹ Ta Merari natunao me‘olotodi: Maali ta Musii. Getedi me Lebi ‘idi susuiao ‘idi tubua ‘atua.

²⁰ Ta Amarama tamana Iokebeda nuuna ‘i aina; ta Aarona ta Mose ‘ena si enatunedi: ta Amarama iawasina ‘ana iakwarao e wan anaredi ta tati sebeni.

²¹ Ta Isiara natunao me‘olotodi; Kora, Nepega be, Sikiri be.

²² Ta Usaela natunao me‘olotodi; Misaela, Elisapani be, Sitiri be.

²³ Ta Aarona Eliseba, Aminadaba natuna me wainena, Nasona nuuna, ‘i aina; ta ‘ena si enatunedi Nadaba ta Abiu, Eleasara ta Itamara.

²⁴ Ta Kora natunao me‘olotodi; Asira, Elakana be, Abiasapa be; getedi me Kora ‘idi susuiao.

²⁵ Ta Eleasara Aarona natuna Putiela natunao me wainedi ‘e bweuna ‘ediega ‘i aina; ta Pineasa ‘ena ‘i enatunena. Getedi me Lebi tamadi ‘idi anuao ‘idi tomatuao ‘idi susuiao ‘atua.

²⁶ Getedi taudi Aarona ta Mose, taudi ‘edia Ieoba ‘i gwae, Iseraela tubunao ‘asa Aigupito ‘enega wa da ‘au‘ewedima ‘adi iau ‘atua.

²⁷ Getedi taudi Parao Aigupito king ‘ena si gwaegwae, be Iseraela tubunao Aigupitoega si da ‘au‘ewedima: getedi taudi Mose ta Aarona.

²⁸ Ta asiata ‘enega Ieoba Mose ‘ena ‘i ona ‘asa Aigupito ‘enaia gete ‘i apwesa,

²⁹ Ieoba Mose ‘ena ‘i gwae, ‘i ona, ‘Abo‘agu Ieoba: ona iauiauna ia ‘egwaeiena ‘emuia ‘u da eonae Parao Aigupito ‘ana king ‘enaia.

³⁰ Ta Mose ‘i gwae Ieoba matanaia, U ‘ita, ‘Abo‘agu sopagu nigea lodabanamo, ta mwa‘adega Parao ‘eguia ‘i da nono?