Si Apwesa 5 - Buki Tabu Lowaenei 1919

‘UPWA 5.

¹ Ta muriega Mose ta Aarona si mai, ta Parao ‘ena si ona, Ieoba, Iseraela ‘ina Eaubada, gete nadigega ‘i gwae, ‘Igu tomota ‘u da tagwaredi be si da tauia, be si da losagari ‘eguia mitawaia.

² Ta Parao ‘i ona, Ieoba iaita, be ‘enega ‘enana ia da nono be Iseraela ia da giisine? Ieoba nigea ia mwaramwaratoni, ta wate gea‘abo Iseraela ia da giisinedi.

³ Ta si gwae, Me Eberu ‘idi Eaubada ni‘atu ma‘ema ‘a elobaloba: ‘a sideio, ‘u da tagwarema be ‘a da tauia mitawaia ga asiata ‘e toi, ta ‘a da taria Ieoba ‘ima Eaubada ‘enaia; ‘abona nai ‘i unuma muiega, nai sisisaiega.

⁴ Ta Aigupito ‘ana king ‘i ona ‘edia, To‘ase manuna ‘omi, Mose ta Aarona, tomota wa giisinedi ‘idi guinua ‘ediega? ‘imi guinua ‘edia wa da tauia.

⁵ Ta Parao ‘i ona, Wa ‘ita, ‘asa ‘ana tomota ni‘atu si iau, ta ‘adi ‘a‘ara ‘ediega wa li‘amidi be si eiawai‘ata.

⁶ Ta asiata gote Parao ‘i ona tomota ‘adi to‐loina‐guinua ‘edia, ta ‘adi tonuganao, ‘i gwae,

⁷ Gea‘abo wate tomota ‘edia nedu wa da ‘ebwa‘ebwa‘edi nadigega lowa be bwa‘a gabugabuna si da bubu: wa da giisinedi be si da tauia be nedu si da bwagili taudimo.

⁸ Ta bwa‘a‐gabugabuna ‘adi sawasawa taudi lowa si guinuedi, nadigega ‘edia wa da sa‘udi; gea‘abo ‘e bweu iage gidarina ‘ediega wa da giimwa‘ute: si miamiadaita ta ‘enega; ‘enega si bwau, si ona, ‘U da tagwarema be ‘a da tauia ta ‘ima Eaubada ‘ena ‘a da taria.

⁹ Guinua mwauwawasae tai ‘edia wa da sa‘u, be ‘ena si da guinua; ta gea‘abo ona kabokabo si da nuanua.

¹⁰ Ta tomota ‘idi to‐loina‐guinua si apwesa, ta ‘idi tonuganao, ta si ona tomota ‘edia, si gwae, Gete nadigega Parao ‘i ona, Gea‘abo nedu ia ‘ebwa‘ebwa‘emi.

¹¹ Taumimo wa da tauia, be nedu wa da ‘ewena ‘ena wa lobena: nigea ‘e bweu ‘imi guinua ‘i mwa‘umwa‘uta ta ‘enega.

¹² Ta ‘enega tomota si sawara dadana ‘asa Aigupito maibo‘ana ‘enega be sumwana si egogone nedu manuna.

¹³ Ta to‐loina‐guinua si ona pa‘arina, si gwae, ‘Imi guinua wa da loegumwaridi, guinua asiata ta asiata, na‘ieana ‘ena nedu ‘i miami.

¹⁴ Ta Iseraela tubunao ‘idi to‐nuganao, taudi Parao ‘ina to‐loina‐guinua si aseiedi ‘edia, si esilae sapiega, ta si gwae, To‘ase manuna ‘imi guinua boga ta batua nigea wa loegumwari, bwa‘a‐gabugabuna wa da bubudi lowa ‘atua?

¹⁵ Ga Iseraela tubunao ‘idi tonuganao si mai ta Parao ‘ena si bwau, si gwae, To‘ase manuna nadigega ‘u iagena ‘imu to‐guinuao ‘edia?

¹⁶ Nigea nedu si da ‘ebwaea ‘imu to‐guinua ‘edia, ta ‘emaia si ona, Bwa‘a‐gabugabuna wa da bubui: ta, u ‘ita, ‘imu to‐guinuao si esilae sapiega; ta ‘arena tauio ‘imu tomota.

¹⁷ Ta ‘i gwae, Wa miamia daita, wa miamia daita: ta ‘enega wa ona, ‘U da tagwarema be ‘a da tauia ta Ieoba ‘ena ‘a da taria.

¹⁸ ‘Enega wa da tauia, ta wa da guinua; gea‘abo nedu si ‘ebwa‘ebwa‘emi ta ‘enega, ta bwa‘a‐gabugabuna ‘adi sawasawa wa da sa‘u.

¹⁹ Ta Iseraela tubunao ‘idi tonuganao si ‘itena ‘aene si miami to‘umalina, ‘ena si gwae, Gea‘abo bwa‘a gabugabuna ‘ana iau ‘ediega wa giimwa‘ute, guinua asiata be asiata.

²⁰ Ta Mose be Aarona si lobedi, taudi ‘edaia si tootooro, Parao ‘enega si apwesama:

²¹ Ta si ona ‘edia, Ieoba ‘emia ‘i da ‘ita, be ‘i da loina; ‘omi ta ‘enega wa bubuna be maima ‘i to‘umali Parao matanaia, ta ‘ina ‘ari‘eiao matadia, be ‘enega sisisaia nimadia ‘i sa‘u be si loemwawasima.

²² Ta Mose i ‘ila Ieoba ‘enaia, ta ‘i gwae, ‘Inapwana, to‘ase manuna tomota gete wa gieto‘umaliedi? To‘ase manuna u ‘etunegu?

²³ Tuta ‘enega ia mai Parao ‘ena be ‘amu esanega ia ona, tomota gete ‘i gieto‘umaliedi ta ‘enega; wate nigea ‘imu tomota u ‘eto‘etoseedi gidarina.