Si Apwesa 40 - Buki Tabu Lowaenei 1919

‘UPWA 40.

¹ Ta Ieoba ‘i ona Mose ‘enaia, ‘i gwae,

² Nawarae ‘e bweuna ‘enega ‘ana asiata ‘e bweuna ‘enega anua ‘ebeeloba ‘ina tabenakele ‘u da gietooro.

³ Ta ‘ebee‘ita ‘ana dedewaga ‘ena ‘u da sa‘u, ta dedewaga nina ‘u da ‘aubodebodena.

⁴ Ta tebeli ‘u da me‘ena, ta iage ‘ena si miami ‘u da sa‘u ‘ai‘ailidi; ta maieare ‘ina ‘ebesa‘u ‘u da me‘ena, ta ‘ana maieare ‘u da loe‘abidi.

⁵ Ta ‘ebetaria gola mu‘ana manuna ‘u da sa‘u ‘ebee‘ita ‘ina dedewaga matanaia, ta ‘awa ‘ana ‘auboda ‘u da sa‘u anua tabenakele ‘enaia.

⁶ Ta ‘ebwaeadaita gabugabuna ‘ana ‘ebetaria ‘u da sa‘u anua ‘ebeeloba ‘ina anua‐tabenakele ‘ana ‘awa matanaia.

⁷ Ta ‘ebe‘utu ‘u da sa‘u anua‐‘ebeeloba ta ‘ebetaria mwatuidia, ta boasi ‘ena ‘u da siwa.

⁸ Ta ‘atamana ‘u da etooro sakowasie, ta ‘atamana ‘ana ‘awa ‘ana ‘auboda ‘u da taraesane.

⁹ Ta bunama ‘ebe‐oroa ‘u da ‘ewa, ta tabenakele ‘u da bwerami, ta iage iauiauna ‘ena si miami, ta si da etabuna, ta ‘ana gwegwe iauiauna; ta ‘i da etabu.

¹⁰ Ta ‘ebwaeadaita gabugabuna ‘ana ‘ebetaria ‘u da bwerami, ta ‘ana gaebao iauiauna, ta ‘ebetaria ‘u da etabuie; ta ‘ebetaria ‘i da tabu wawasae.

¹¹ Ta ‘ebe‘utu ta ‘aena ‘u da bweramidi, ta ‘u da etabuie.

¹² Ta Aarona ta natunao ‘u da me‘edi anua‐‘ebeeloba ‘ana ‘awa ‘enaia, ta boasiega ‘u da e‘esiwedi.

¹³ Ta ‘oama tabu ‘ediega Aarona ‘u da e‘otena; ta ‘u da ‘eorona, ta ‘u da etabuiena, be ‘enega ‘eguia ‘i da guinua totaria ‘ana guinua ‘enaia.

¹⁴ Ta natunao ‘u da me‘edi, ta kotu ‘ediega ‘u da e‘otedi:

¹⁵ Ta ‘u da ‘eorodi, na‘ieana tamadi u ‘eorona, be ‘enega ‘eguia si da guinua to‐taria ‘ana guinua ‘enaia; ta ‘idi oroa ‘i da e‘ebetaria ataia ‘edia ‘adi epata‐tomota ‘edia.

¹⁶ Nadigega Mose ‘i guinua; na‘ieana iage iauiauna Ieoba ‘ena ‘i eona‘ena, na‘ieana ‘i guinuena.

¹⁷ Ta gete ‘i apwesa iakwara ‘e ruena ‘enaia gimi nawarae ‘enaia, nawarae nina ‘ana gimi ‘asiata ‘enega, ga ‘anua‐tabenakele si gietoorona.

¹⁸ Ta Mose anua‐tabenakele ‘i gietoorona, ta ‘ana gaulao ‘i sa‘udi, ta ‘ana kaiwe i ‘etoorodi, ta ‘ana sa‘ubarabara ‘i e‘etoruguiedi, ta ‘ana ‘ora i ‘etoorodi.

¹⁹ Ta anua‐kaleko ‘i lisitu‘eiena tabenakele debanaia, ta anua‐kaleko ‘ana bwasa lo‘etana ‘i sa‘una debanaia; na‘ieana Ieoba ‘i ona Mose ‘enaia.

²⁰ Ta ‘ebee‘ita i ‘ewena ta dedewaga gamwanaia ‘i sa‘una, ta ‘ewa‘ewa ‘i sa‘una dedewaga ‘enaia, ta dedewaga debanaia ‘ebemi‐nua‘ole‘ole ‘i sa‘una:

²¹ Ta dedewaga ‘i me‘ena anua‐tabenakele ‘enaia, ta ‘aubodaboda ‘ana ‘auboda ‘i etoorona, ta ‘ebee‘ita ‘ana dedewaga i ‘aubodebodena; na‘ieana Ieoba ‘i ona Mose ‘enaia.

²² Ta tebeli nina anua‐‘ebeeloba ‘ena ‘i sa‘una, tabenakele esenana iarasi ‘enaia, ‘ari‘upa guaunaia.

²³ Ta palaua ‘i sa‘u ‘ai‘ailina ‘enaia Ieoba matanaia; na‘ieana Ieoba ‘i ona Mose ‘enaia.

²⁴ Ta maieare ‘ina ‘ebesa‘u anua‐‘ebeeloba ‘ena ‘i sa‘una, tebeli matanaia, tabenakele ‘ana esena iarasi ‘enaia.

²⁵ Ta Ieoba matanaia maieare ‘i loe‘abidi; na‘ieana Ieoba ‘i ona Mose ‘enaia.

²⁶ Ta ‘ebetaria gola anua‐‘ebeeloba ‘ena ‘i sa‘una ‘auboda matanaia:

²⁷ Ta mu‘ana dibidibi ‘i gabudi ‘enaia; na‘ieana Ieoba ‘i ona Mose ‘enaia.

²⁸ Ta ‘awa ‘ana ‘auboda tabenakele ‘ena ‘i sa‘una.

²⁹ Ta ‘ebwaeadaita gabugabu ‘ana ‘ebetaria anua‐‘ebeeloba ‘ina tabenakele ‘ana ‘awa ‘ena ‘i sa‘una, ta ‘ebwaeadaita gabugabu be ‘ebwaeadaita palaua i ‘ebwaeadaita ‘enaia; na‘ieana Ieoba ‘i ona Mose ‘enaia.

³⁰ Ta ‘ebe‘utu ‘i sa‘una anua ‘ebeeloba ta ‘ebetaria mwatuidia, ta boasi ‘ena ‘i siwena, be ‘enega ‘idi ‘utu.

³¹ Ta Mose ta Aarona ta natunao nimadi ta ‘aedi si e‘utudi ‘enaia;

³² ‘Ena anua‐‘ebeeloba ‘ena si rurugu, ta ‘ena ‘ebetaria si dodoro deinaia, si u‘utu nugana; na‘ieana Ieoba ‘i ona Mose ‘enaia.

³³ Ta ‘atamana ‘i gietooro anua‐tabenakele ta ‘ebetaria ‘i sakowasiedi, ta ‘atamana ‘ana ‘awa ‘ana ‘auboda ‘i etoorona. Nadigega Mose guinua ‘i loegumwarina.

³⁴ Ga poana anua‐‘ebeeloba ‘i lobodebodena, ta Ieoba ‘ina esaesa tabenakele ‘i loema‘ena.

³⁵ Ta Mose nigea ‘i ewaiwai be anua‐‘ebeeloba ‘ena ‘i da rugu, poana ‘ena ‘i toatoa ta ‘enega, ta Ieoba ‘ina esaesa anua‐tabenakele ‘i loemaena.

³⁶ Ta ni‘atu poana ‘i tu‘e tabenakele debanega, ga Iseraela tubunao si tautauiawa, ‘idi tautauia iauiauna ‘ediega:

³⁷ Ta ‘abo poana nigea ‘i tu‘etu‘e, ga gea‘abo si tautauia ga asiata ‘enega ‘i tutu‘e.

³⁸ Ieoba ‘ina poana anua‐tabenakele ‘ena ‘i miami asiataia, ta boiboia awe sabelulu ‘ena ‘i miami, Iseraela ‘ina boda maibo‘ana matanaia, ‘idi tautauia iauiauna ‘ediega.