Si Apwesa 39 - Buki Tabu Lowaenei 1919

‘UPWA 39.

¹ Ta karakarawinega, papeleiega be, bweabwearinega be, ‘oama ionaiona matagidarina si bubudi, esena tabu ‘ana guinua manuna, ta ‘oama tabu si bubudi Aarona manuna; na‘ieana Ieoba ‘i ona Mose ‘enaia.

² Ta tara‘apwara ‘i bubuna golega be, karakarawina be, papele be, bweabwearina be, kaleko ionaiona matagidarina be.

³ Ta gola si tutuna be ‘enega ‘i dedea, ta si dabena ga ‘i emarakwa, ta si guinuena karakarawina ‘ena be, papele ‘ena be, bweabwearina ‘ena be, kaleko matagidarina ‘ena be, to‐guinua sinasinapuna ‘ina guinua.

⁴ ‘Ebe‘a‘ara si bubuna manuna, si tubwedi: mata ‘e rua ‘edia si tubwe.

⁵ Ta ‘ebepaima ionaiona‐sinasinapuna, tauna ‘ena ‘i miami, be ‘enega ‘ana ‘ebepaima, ‘ebesaara ‘e bweuna tuga ta ‘ana guinua nadigega; golega, karakarawinega, papeleiega be, bweabwearinega be, kaleko ionaiona matagidarina be; na‘ieana Ieoba ‘i ona Mose ‘ena.

⁶ Ta gurewa onikisa si bubudi, ‘ebesa‘u gola ‘edia si e sa‘ugamwausanedi, Nimakusikusi ‘ana daiagi ‘edia si dadaiagidi, Iseraela tubunao ‘adi esena na‘ieana.

⁷ Ta tara‘apwara ‘ina ‘ebesaara ‘edia ‘i sa‘udi, be si da e gurewa ‘ebenua‘i‘isi Iseraela tubunao manudi; na‘ieana Ieoba ‘i ona Mose ‘enaia.

⁸ Ta ailumaluma ‘i bubuna, to guinua nuanua sinasinapuna ‘ana guinua, tara‘apwara ‘ana guinua nadigega; golega, karakarawinega be, papeleiega be, bweabwearinega be, kaleko ionaiona matagidarina be.

⁹ Esenanao ‘e ata si erererea; ailumaluma si giruena: ‘ana dudura ‘e bweuna nimana, ta ‘ana bababa ‘e bweuna nimana, si giruena.

¹⁰ Ta gurewa raba ‘e ata ‘ena si sa‘udi: raba ‘e bweuna saredia, topasa, gurewa tuiaiarina tauna gimi raba.

¹¹ Ta raba ‘e ruena, emeralida, sapaira, ta paku.

¹² Ta raba ‘e tonina, iakina, agate, ta ametusa.

¹³ Ta raba ‘e atana, berula, onikisa, iasipa: ‘ebesa‘u gola ‘edia si sa‘udi ‘adi ‘ebesa‘u ‘edia.

¹⁴ Ta gurewa nidi Iseraela tubunao ‘adi esana ‘atua, ‘e twelu, ‘adi esanao nadigega; nimakusikusi ‘ana daiagi nadigega, ‘e bweuna ‘e bweuna ‘ana ‘esana na‘ieana, susu ‘e twelu manudi.

¹⁵ Ta ailumaluma ‘enaia aupa si bubudi barae ‘atua, guinua wasiwasi ‘enega gola esasenega.

¹⁶ Ta ‘ebesa‘u gola si bubudi, ta giimweiidi gola ‘e rua; ta giimweiidi ‘e rua nidi ailumaluma matana ‘e rua ‘edia si sa‘udi.

¹⁷ Ta aupa gola wasiwasina ‘e rua nidi giimweiidi ‘e rua ‘edia si sa‘udi ailumaluma matanao ‘edia.

¹⁸ Ta aupa wasiwasidi ‘e rua nidi matadi wate ‘e rua ‘ebesa‘u ‘e rua ‘edia si sa‘udi, ta tara‘apwara ‘ana ‘ebesaara ‘edia si sa‘udi, esena matanega.

¹⁹ Ta giimweiidi gola ‘e rua si bubudi, ta si sa‘udi ailumaluma matanao ‘e rua ‘edia, tupitupina ‘enaia, tara‘apwara ‘ana sena ganwanega matanaia.

²⁰ Ta giimweiidi gola ‘e rua si bubudi, ta si sa‘udi tara‘apwara ‘ana ‘ebesaara ‘e rua ‘edia ‘agarauna, esena matanaia, ‘ina ‘ebetubwe deinaia, tara‘apwara ‘ana ‘ebepaima ionaiona sinasinapuna ‘etanaia.

²¹ Ta ailumaluma si tarae‘ewena ‘ana giimweiiao ‘ediega tara‘apwara ‘ana giimweiiao ‘edia lesi karakarawina ‘enega, be ‘enega tara‘apwara ‘ana ‘ebepaima ionaiona sinasinapuna ‘ena ‘i miami, ta ailumaluma nina gea‘abo ‘i da eli‘ami tara‘apwarega; na‘ieana Ieoba ‘i ona Mose ‘enaia.

²² Ta tara‘apwara ‘ina ‘oama ‘i bubuna ‘ebeguinua ionaionana ‘enega, maibo‘ana karakarawinega;

²³ ta ‘oama nina ‘ana gaula gamwagamwanega, ‘atua kotu tuiaiarina ‘ana gaula, si saisaila nunumina sakowasi maibo‘ana be gea‘abo ‘i e sabu.

²⁴ Ta ‘oama nina ‘ana dobe gemula ‘ena si bubudi karakarawinega, papele be, bweabwearina be, kaleko ionaiona be.

²⁵ Ta pate gola esasena si bubudi, ta pate nidi si esa‘u iomwaredi gemula mwatuidia ‘oama ‘ana dobe si tabe sakowasiena, gemula mwatuidia;

²⁶ Pate ta gemula, pate ta gemula, ‘oama ‘ana dobe si tabe sakowasiena, be ‘ena si guiguinua; na‘ieana Ieoba ‘i ona Mose ‘enaia.

²⁷ Ta kotu kaleko matagidarina ‘ebeguinua ionaionana ‘enega si bubudi Aarona manuna, ta natunao manudi,

²⁸ Ta peaula kaleko matagidarinega, ta peaula bobo‘adi kaleko matagidarinega, ta tarausesa kaleko ionaiona matagidarinega,

²⁹ Ta diapwata kaleko ionaiona matagidarinega, karakarawina ta, papele ta, bweabwearina ta, to ‘eiara ‘ana guinua; na‘ieana Ieoba ‘i ona Mose ‘enaia.

³⁰ Ta peaula‐esaesa tabu ‘ana bababa si bubuna gola esasenega, ta ‘etoladi ‘e bweu ‘ena si ‘etoladina, nimakusikusi ‘ana ‘etoladi ‘atua, Tabu Ieoba ‘enaia.

³¹ Ta lesi karakarawina ‘ena si losipwena, be ‘i da ‘auiai peaula ‘ena ‘etanaia: na‘ieana Ieoba ‘i ona Mose ‘enaia.

³² Nadigega anua ‘ebeeloba ‘ina anua‐tabenakele ‘ana guinua maibo‘ana ‘i gumwara: ta Iseraela tubunao si guinua nadigega iage iauiauna Ieoba ‘i ona Mose ‘enaia, nadigega si guinuena.

³³ Ta tabenakele si me‘ena Mose ‘enaia, Anua‐kaleko, ta ‘ana gwegwe iauiauna, ‘ana ‘etoiainao, ‘ana mwadareao, ‘ana sa‘ubarabaraiao, ta ‘ana ‘orao, ta ‘ana gaulao;

³⁴ Ta bwasa lo‘etana sipi bwaradi si ‘e‘urenina bweabwearina ‘ediega, ta bwasa‐lo‘etana kulikuliaa bwaradi ‘ediega, ta ‘etobode ‘ana ‘ari‘upa:

³⁵ ‘Ebee‘ita ‘ana dedewaga, ta ‘ana ‘ewa‘ewa, ta ‘ebeminua‘ole‘ole;

³⁶ Tebeli, ‘ana gaeba iauiauna, ta palaua ‘ebee‘ita;

³⁷ Maieare ‘ana ‘ebesa‘u esasena, ‘ana maieareao, tugama maieare si da esa‘u ‘ai‘ailidi, ta ‘ana gaebao iauiauna, ta bunama ma‘edana manuna;

³⁸ Ta ‘ebetaria gola, bunama oroa ta, mu‘ana dibidibi ta, ta ‘auboda Anua‐kaleko ‘ana ‘awa manuna;

³⁹ ‘Ebetaria barasa, ta ‘ana lomasamasasara barasa, ‘ana ‘ewa‘ewaiao, ta ‘ana gaeba iauiauna, ‘ebe‘utu ta ‘aena;

⁴⁰ ‘Atamana ‘ana iage loeloesanena, ‘ana ‘orao, ta ‘ina gaulao, ta ‘auboda ‘atamana ‘ana ‘awa manuna, ‘ana baraeao, ta ‘ana ‘etoiainao, anua‐tabenakele ‘ana guinua ‘ana ‘ebeguinua iauiauna, anua ‘ebeeloba manuna;

⁴¹ ‘Oama ionaiona ‘ai‘ailidi esena tabu ‘ana guinua manuna, ta ‘oama tabu Aarona totaria manuna, ta natunao ‘adi ‘oamao, be si guinua totaria ‘ina guinua ‘enaia.

⁴² Na‘ieana iage iauiauna Ieoba ‘i eona‘ena Mose ‘enaia, na‘ieana Iseraela tubunao guinua maibo‘ana si guinuena.

⁴³ Ta Mose guinua maibo‘ana i ‘itena, ta, wa ‘ita, ni‘atu si eguinuena; na‘ieana Ieoba ‘i eona‘ena, nadigega ni‘atu si eguinuena; ta Mose ‘i onaobobomedi.