Si Apwesa 38 - Buki Tabu Lowaenei 1919

‘UPWA 38.

¹ Ta ‘ebwaeadaita gabugabuna ‘ana ‘ebetaria ‘i bubuna kaiwe akesiega: ‘ana dudura kiubita ‘e nima, ta ‘ana bababa kiubita ‘e nima, esenanao ‘e ata si erererea; ta ‘ana ‘etosora kiubita ‘e toi.

² Ta kunanao ‘i bubudi tupitupina ‘e ata ‘edia; kunanao ‘e bweuna tuga ma‘ieana: ta barasega ‘i bodena.

³ Ta ‘ebetaria ‘ana gaebao iauiaudi ‘i bubudi, ‘urenao be, ‘ebesalao be, besoniao be, esio ‘ana goiowao be, awe ‘ana gaebao be: ‘ana gaebao iauiauna ‘i bubudi barasega.

⁴ Ta ‘ebetaria manuna sa‘usa‘uwenowenona gomana ‘atua lomasamasasarina ‘i bubuna barasega, tupitupina ‘agaraunaia ‘i sakowasiena ‘ubunaia, ‘ana ‘upwarua ‘ena ‘i tu‘e.

⁵ Ta barasa lomasamasasarina matana ‘e ata manudi giimweiidi ‘e ata i ‘e‘urenidi, ‘ewa‘ewa ‘adi ‘ebesa‘u.

⁶ Ta ‘ewa‘ewa ‘i bubudi kaiwe akesiega, ta barasega ‘i bodedi.

⁷ Ta giimweiidi ‘ebetaria naanaana ‘edia ‘ewa‘ewa nidi ‘i e‘etoruguiedi, be ‘ana ‘ebe‘a‘ara; logomwagomwana ‘i bubuna mwadareiega.

⁸ Ta ‘ebe‘utu barasa ‘i bubuna, ta ‘aena barasega, iine toguinua ‘adi ma‘ama‘aiau‐barasa ‘ediega taudi si guinua anua ‘ebeeloba ‘ina ‘awa ‘enaia.

⁹ Ta ‘atamana ‘i bubuna: esena iarasi manuna iarasi ‘enaia ‘atamana ‘ana iage taratara esanena kaleko ionaiona matagidarina ‘enega, kiubita wan anaredi:

¹⁰ ‘Adi ‘ora ‘e tweniti, ta ‘adi gaula ‘e tweniti, barasega; ‘ora ‘adi ‘ebetaraesanana ta ‘adi sa‘ubarabara silebega.

¹¹ Ta esena iaarata manuna kiubita wan anaredi, ‘adi ‘ora ‘e tweniti, ta ‘adi gaula ‘e tweniti, barasega; ‘ora ‘adi ‘ebetaraesanana ta ‘adi sa‘ubarabara silebega.

¹² Ta ‘ebwaga manuna iage loeloesanena kiubita ‘e pipiti, ‘adi ‘ora ‘e teni, ta ‘adi gaula ‘e teni; ‘ora ‘adi ‘ebetaraesanana ta ‘adi sa‘ubarabara silebega.

¹³ Ta ‘esena bomatu manuna bomatu ‘enaia kiubita ‘e pipiti.

¹⁴ ‘Ebweu esena manuna iage loeloesanena kiubita ‘e pipitini; ‘adi ‘ora ‘e toi, ta ‘adi gaula ‘e toi;

¹⁵ Ta nadigega mariesena manuna: gete esena nina ta esena gote ‘atamana ‘ana ‘awa ‘ana ‘auboda iage loeloesanena kiubita ‘e pipitini; ‘adi ‘ora ‘e toi, ta ‘adi gaula ‘e toi.

¹⁶ ‘Atamana ‘ina iage loeloesanena iauiauna si sakowasi kaleko ionaiona matagidarinega.

¹⁷ Ta ‘ora ‘adi gaula barasega; ‘ora ‘adi ‘ebetaraesanana ta ‘adi sa‘ubarabara silebega; ta ‘adi ‘eiara debanaia ‘adi ‘auboda silebega; ta ‘atamana ‘ana ‘ora iauiauna si etubwedi silebega.

¹⁸ Ta ‘auboda ‘atamana ‘ana ‘awa manuna to ‘eiara ‘ana guinua, karakarawinega, papele be, bweabwearina be, kaleko ionaiona matagidarina be: ta ‘ana dudura kiubita ‘e tweniti, ta ‘ana ‘etosora ‘ana bababa ‘enaia kiubita ‘e nima, na‘ieana ‘atamana ‘ana iage loeloesanena.

¹⁹ Ta ‘adi ‘ora ‘e ata, ta ‘adi gaula ‘e ata, barasega; ‘adi ‘ebetaraesanena silebega, ta ‘adi ‘eiara debanaia ta ‘adi sa‘ubarabara ‘adi sa‘uboda silebega.

²⁰ Ta anua tabenakele nina, ta ‘atamana ‘i sakowasi ‘adi ‘etoiaina iauiauna, barasega.

²¹ Gete tabenakele ‘ana iage ‘adi iau, tugama ‘ebee‘ita ‘ana tabenakele, nadigega ‘adi sawa, Mose ‘ina ona na‘ieana, me Lebi ‘idi guinua manuna, Itamara nimanega, Aarona totaria natuna.

²² Ta Besalela Uri natuna me‘olotona, tauna ‘Ura natuna, susu Iuda ‘enega, iage iauiauna Ieoba ‘i ona Mose ‘ena ‘i bubudi.

²³ Ta ma‘ieana Ooliaba, Aisamaka natuna, susu Dana ‘enega, to daiagi, ta toguinua nuanua sinasinapuna, ta to ‘eiara karakarawinega be, papeleiega be, bweabwearinega be, kaleko matagidarinega be.

²⁴ Gola maibo‘ana si ‘ewena guinua manuna anua tabu ‘ana guinua maibo‘ana ‘enaia, tugama ‘ebwaeadaita ‘ana gola, taleni tweniti‐naine, ta sekeli sebeni anaredi ta tati, anua tabu ‘ana sekeli na‘ieana.

²⁵ Ta taudi egogona boda ‘ediega si sawedi ‘idi sileba taleni wan anaredi, ta sekeli e wan tausana seben anaredi ta sebeniti paibe, anua tabu ‘ana sekeli ‘atua:

²⁶ Beka ‘e bweuna tai ‘e bweuna, nate, sekeli ‘ana ‘upwarua, anua tabu ‘ana sekeli na‘ieana, ‘e bweuna ‘e bweuna manuna si mai ‘edia taudi si sawedi, ‘adi iakwara ‘e tweniti ta ‘i tu‘e, tai ‘e sikisi anaredi tausana ta teri tausana ta paibe anaredi ta pipiti.

²⁷ Ta taleni sileba ‘e wan anaredi si ‘e‘urenidi anua tabu ‘ana gaula manudi, ta ‘auboda ‘ina gaula manudi; gaula ‘e wan anaredi taleni ‘e wan anaredi manuna, taleni ‘e bweuna gaula ‘e bweuna manuna.

²⁸ Ta sekeli ‘e wan tausana sebeni anaredi ta sebeniti paibe ‘ediega ‘ebetaraesanana ‘i bubudi ‘ora manudi, ta ‘adi ‘eiara debadia i ‘e sa‘ubodedi, ta sa‘ubarabara ‘i bubudi manudi.

²⁹ Ta ‘ebwaeadaita ‘ana barasa taleni ‘e sebeniti, ta sekeli e tu tausana ta poa anaredi.

³⁰ Ta ‘ediega gaula ‘i bubudi anua‐‘ebeeloba ‘ana ‘awa ‘ana ‘auboda ‘enaia, ta ‘ebetaria barasa, ta ‘ana barasa lomasamasasarina, ta ‘ebetaria ‘ina gaebao iauiauna,

³¹ Ta ‘atamana ‘i sakowasi ‘ana gaulao ta, ‘atamana ‘ana ‘awa ‘ana ‘auboda ‘ana gaulao ta, tabenakele ‘ana ‘etoiainao iauiauna ta, ‘atamana ‘i sakowasi ‘ana ‘etoiainao iauiauna.