Si Apwesa 37 - Buki Tabu Lowaenei 1919

‘UPWA 37.

¹ Ta Besalela dedewaga ‘i bubuna kaiwe akesiega: ‘ana dudura kiubita ‘e rua ta tupwana ‘upwarua, ta ‘ana bababa kiubita ‘e bweuna ta tupwana ‘upwarua, ta ‘ana ketosora kiubita ‘e bweu ta tupwana ‘upwa‐rua:

² ta ‘i bodena gola esasenega gamwana ta guauna, ta ‘eiara gola ‘enega ‘i bubu sakowasiena.

³ Ta manuna giimweiidi gola e ‘ata i ‘e‘urenidi, ‘aena ‘e ata ‘edia; tugama giimweiidi ‘e rua ‘e bweu esena ‘enaia, ta giimweiidi ‘e rua mari esenaia.

⁴ Ta ‘ewa‘ewa ‘i bubudi kaiwe akesiega, ta ‘i bodedi golega.

⁵ Ta ‘ewa‘ewa nidi giimweiidi ‘edia ‘i ‘e‘etoruguiedi dedewaga naanaana ‘edia, be dedewaga ‘ana ‘ebe‘a‘ara.

⁶ Ta ‘ebemi‐nua‘ole‘ole ‘i bubuna gola esasenega: ‘ana dudura kiubita ‘e rua ta tupwana ‘upwa‐rua, ta ‘ana bababa kiubita ‘e bweuna ta tupwana ‘upwarua.

⁷ Ta ierubima ‘e rua ‘i bubudi golega; guinua‐tutuiega ‘i bubudi, ‘ebemi‐nua‘ole‘ole matana ‘e rua ‘edia;

⁸ ierubi ‘e bweu ‘e bweu mata ‘enaia, ta ierubi ‘e bweu mari mata ‘enaia: ierubima ‘i bubudi ‘ebweuna tuga ‘ebemi‐nua‘ole‘ole ma‘ieana ‘e rua matana ‘edia.

⁹ Ta ierubima papedi si tuneasidi tabwanaia, ‘ebemi‐nua‘ole‘ole si lobodebodena papediega, si e‘awatanesinesi; ierubima matadi ‘ebemi‐nua‘ole‘ole ‘enaia.

¹⁰ Ta tebeli ‘i bubuna kaiwe akesiega: ‘ana dudura kiubita ‘e rua, ta ‘ana bababa kiubita ‘e bweuna, ta ‘ana ‘etosora kiubita ‘e bweuna ta tupwana ‘upwa‐rua:

¹¹ Ta gola esasenega ‘i bodena, ta ‘eiara gola ‘i bubuna sakowasi‘ena.

¹² Ta tupitupina ‘i bubuna ‘enaia nimabababana ‘atua ‘i sakowasiena, ta ‘eiara gola tupitupina ‘ena ‘i bubuna ‘i sakowasiena.

¹³ Ta manuna giimweiidi gola ‘e ata i ‘e‘urenina, ta giimweiidi nidi tupitupina ‘e ata ‘edia ‘i sa‘udi taudi ‘aena ‘e ata ‘edia si miami.

¹⁴ Tupitupina serabenaia giimweiidi si miami, ‘ewa‘ewa ‘adi ‘ebesa‘u be tebeli ‘ana ‘ebe‘a‘ara.

¹⁵ Ta ‘ewa‘ewa ‘i bubudi kaiwe akesiega, ta golega ‘i bodedi, be tebeli ‘ana ‘ebe‘a‘ara.

¹⁶ Ta gaeba tebeli ‘enaia si miami ‘i bubudi, ‘ana gaeba dedeadi, ta ‘ana sipuniao, ta ‘ana besoni ao, ta ‘ana kaiokaioao, ‘ebesiwa, gola esasenega.

¹⁷ Ta maieare ‘ana ebesa‘u ‘i bubuna gola esasenega: maieare nina guinua‐tutuiega ‘i bubuna, ‘aena, ta ‘arena; ‘ana keigao, ‘ina mwanamwana‐uanao, ta seninao, ma‘ieana ‘e bweuna tuga:

¹⁸ Ta naanaana ‘ediega narinao ‘e sikisi si apwesa; maieare narina ‘e toi ‘e bweu esena ‘enega, ta maieare narina ‘e toi mariesenega:

¹⁹ Keiga ‘e toi saido senina nadigega ‘i bubuna ‘e bweu nari ‘enaia, mwanamwana‐uana ‘e bweuna ta kaiwe‐senina ‘e bweuna: ta keiga ‘e toi saido‐senina nadigega mari nari ‘enaia, mwanamwana‐uana ‘e bweuna ta kaiwe‐senina ‘e bweuna: nadigega nari ‘e sikisi maieareiega si apweapwesa manudi.

²⁰ Ta maieare nina ‘enaia keiga ‘e ata si miami saido‐senina nadigega ‘i bubudi, ‘ina mwanamwana‐uanao, ta ‘ina kaiwe‐seninao:

²¹ Ta mwanamwana‐uana ‘e bweuna nari ‘e rua ‘agarau ma‘ieana ‘e bweuna tuga, ta mwanamwana‐uana ‘e bweuna nari ‘e rua ‘agaraudia ma‘ieana ‘e bweuna tuga, ta mwanamwana‐uana ‘e bweuna nari ‘e rua ‘agaraudia ma‘ieana ‘e bweuna tuga, nari ‘e sikisi ‘enega si apweapwesa manuna.

²² ‘Idi mwanamwana‐uanao ta ‘idi narinao ‘e bweuna tuga ma‘ieana: maibo‘ana guinua‐tutu gola esasenega ‘e bweuna tuga.

²³ Ta ‘ina maieareao ‘i bubudi, ‘e sebeni, ta ‘adi ‘ebegiiaina, ta ‘adi ‘ebegiekweu, gola esasenega.

²⁴ Taleni gola esasena ‘enega ‘i bubuna, ta ‘ana gaebao iauiauna.

²⁵ Ta mu‘ana ‘ana ‘ebetaria ‘i bubuna kaiwe akesiega: ‘ana dudura kiubita ‘e bweuna, ta ‘ana bababa kiubita ‘e bweuna, esenanao ‘e ata si erererea; ta ‘ana ‘etosora kiubita ‘e rua; kunanao ma‘ieana ‘e bweuna tuga.

²⁶ Ta gola esasenega ‘i bodena, debana, ta esenanao sakowasi, ta kunanao: ta ‘eiara gola ‘ena ‘i bubu sakowasiena.

²⁷ Ta manuna giimweiidi gola ‘e rua ‘i bubudi ‘eiara ‘agaraunaia, lesulesuna ‘e rua ‘edia, ‘e rua esenanao ‘edia, ‘ewa‘ewa ‘adi ‘ebesa‘u manudi be ‘ediega si ‘a‘ara.

²⁸ Ta ‘ewa‘ewa ‘i bubudi kaiwe akesiega, ta golega ‘i bodedi.

²⁹ Ta bunama oroa tabu ‘i bubuna, ta mu‘ana esasena mu‘ana dibidibi ‘ediega, to gianeane ‘ina bubuna ‘atua.