Si Apwesa 36 - Buki Tabu Lowaenei 1919

‘UPWA 36.

¹ Ta Besalela be Ooliaba si da guinua, ta tai ‘ate sinasinapu iauna, taudi Ieoba sinasinapu ta mwaratoni ‘edia ‘i sa‘u be si pana‘ita be guinua maibo‘ana si guinue anua tabu ‘ana guinua manuna, na‘ieana iauiauna Ieoba ni‘atu ‘i onena.

² Ta Mose Besalela ta Ooliaba ‘i bwauiedi, ta tai ‘ate‐sinasinapu iauna, taudi Ieoba ‘atedia sinasinapu ‘i sa‘una, tugama iauna ‘atedi si loniuiedi be si da mai guinua ‘ena be si guinuena:

³ Ta Mose ‘enega ‘ebwaeadaita maibo‘ana si ‘ewena, tauna Iseraela tubunao ni‘atu si me‘ena anua tabu ‘ana guinua ‘ana ‘ebebubuna manuna, be ‘enega si da bubuna. Ta wate muriega gonagona iauna ‘ebwaeadaita tagwara si me‘eme‘edi ‘enaia.

⁴ Ta to sinasinapu iauiaudi, taudi anua tabu ‘ana guinua maibo‘ana si guinue, tai ‘e bweuna ‘e bweuna ‘i mema ‘ina ‘ebeguinuega tauna si guiguinua;

⁵ Ta Mose ‘ena si ona, si gwae, Tomota iage sinabwa wawasae si me‘ena guinua manuna, taudi Ieoba ‘i ona si da bubuna.

⁶ Ta Mose ‘i ona, ta ‘asaia si loina be si bwau, si gwae, Gea‘abo tai nai waine wate iage si bubu anua tabu ‘ana ‘ebwaeadaita manuna. Ga tomota si ‘etobodedi be gea‘abo si da me‘eme‘e.

⁷ Iage ni‘atu si ‘ewena, sawesawenaia ta ‘enega guinua maibo‘ana manuna be si bubu, ta ‘i sinabwa wawasae.

⁸ Ta tai ‘ate‐sinasinapu iauna ‘edia taudi guinua si guinuena anua tabenakele si ‘abina ma‘ana ‘auboda loesane ‘e sanau; kaleko ioniionina matagidarina ‘enega, karakarawina be, papele be, bweabwearina be, ma‘ana ierubima to guinua panapana‘isina ‘ana guinua ‘i bubudi.

⁹ ‘Auboda‐loesane nina ‘e bweuna ‘e bweuna ‘ana dudura kiubita ‘e tweniti eta, ta ‘auboda‐loesane ‘e bweuna ‘e bweuna ‘ana bababa kiubita ‘e poa: ‘auboda‐loesane iauiaudi ‘adi ‘etopwapwa ‘e bweuna.

¹⁰ Ta ‘auboda‐loesane ‘e nima i ‘etoetubwedi ‘e bweuna ‘e bweuna ‘enaia: ta ‘auboda‐loesane ‘e nima ‘i tubwedi ‘e bweuna ‘e bweuna ‘enaia.

¹¹ Ta losinebulu karakarawinega ‘i bubudi ‘auboda ‘e bweuna tupitupina ‘enaia ‘ebetubwe ‘ina ‘ebelosa‘uiega; nadigega ‘i bubuna ‘auboda tupitupina ‘enaia tauna ‘ana ‘ebelosa‘u ‘ebetubwe ‘e ruena ‘enaia.

¹² Losinebulu ‘e pipiti ‘i bubudi ‘auboda ‘e bweuna ‘enaia, ta losinebulu ‘e pipiti ‘i bubudi ‘auboda tupitupina ‘enaia tauna ‘ebetubwe ‘e ruena ‘enaia; losinebulu si mia rua.

¹³ Ta ‘etoiaina gola ‘e pipiti ‘i bubudi, ta ‘auboda i ‘etoetubwedi ‘e bweuna ‘e bweuna ‘enaia ‘etoiaina ‘ediega: nadigega anua tabenakele ‘e bweuna ‘atua.

¹⁴ Ta bwasa gota unuununa ‘enega ‘i bubuna anua kaleko manuna anua tabenakele nina debanaia: bwasa ‘e elebeni ‘i bubudi.

¹⁵ Bwasa ‘e bweuna ‘e bweuna ‘ana bababa kiubita e tati, ta bwasa ‘e bweuna ‘e bweuna ‘ana bababa kiubita e ‘ata: bwasa ‘e elebeni ‘adi ‘etopwapwa ‘e bweuna tuga.

¹⁶ Ta bwasa ‘e nima i ‘etoetubwe dumedumedi, ta bwasa ‘e sikisi dumadumadi.

¹⁷ Ta losinebulu ‘e pipiti ‘i bubudi bwasa tupitupinaia tauna ‘ebelosa‘u ‘ena ‘i miami ‘ebetubwe ‘enaia, ta losinebulu ‘e pipiti ‘i bubudi bwasa tupitupinaia tauna ‘ebelosa‘u ‘ebetubwe ‘e ruena ‘enaia.

¹⁸ Ta ‘etoiaina barasa ‘e pipiti ‘i bubudi be anua‐kaleko si da tubwena, be ‘i da ‘e bweunamo.

¹⁹ Ta anua‐kaleko ‘ana lobodaboda ‘etaninaia ‘i bubuna sipi me‘olotodi bwaradi si ‘e‘urenina bweabwearina, ta debanina ‘ana lobodaboda kulikuliaa bwaradiega.

²⁰ Ta anua tabenakele ‘ana mwadare ‘i bubudi kaiwe akesiega, be si tooromo.

²¹ Kaiwe ‘e bweuna ‘ana dudura kiubita ‘e teni, ta kaiwe ‘e bweuna ‘e bweuna ‘ana bababa kiubita ‘e bweuna ta tupwana ‘upwarua.

²² Kaiwe ‘e bweuna ‘e bweuna matana ‘e rua, si tubwe ‘e bweuna ‘e bweuna ‘enaia: nadigega ‘i bubudi anua tabenakele ‘ana mwadare maibo‘ana manuna.

²³ Ta mwadare ‘i bubudi anua tabenakele manuna; kaiwe ‘e tweniti esena iarasi manuna iarasi ‘enaia:

²⁴ Ta kaiwe ‘e tweniti ‘aredia gaula sileba ‘e poti ‘i bubudi; gaula ‘e rua kaiwe ‘e bweuna ‘arenaia matana ‘e rua manudi, ta mari kaiwe ‘arenaia gaula ‘e rua matana ‘e rua manudi.

²⁵ Ta anua tabenakele senana ‘e ruena manuna, esena iaarata ‘enaia, kaiwe ‘e tweniti ‘i bubudi.

²⁶ Ta ‘adi gaula sileba ‘e poti; gaula ‘e rua ‘e bweu kaiwe ‘arenaia, ta mari kaiwe ‘arenaia gaula ‘e rua.

²⁷ Ta anua tabenakele guauna manuna esena ‘ebwaga ‘enaia kaiwe ‘e sikisi ‘i bubudi.

²⁸ Ta kaiwe ‘e rua ‘i bubudi anua tabenakele tupitupina manudi guauna manuna.

²⁹ Ta ‘aredi si mia rua, ta nadigega si maibo‘ana ga debanaia giimweiina ‘e bweuna ‘enaia: nadigega ‘i guinua ruedi tupitupinao ‘e rua ‘edia.

³⁰ Ta kaiwe nidi ‘e eta, ta ‘idi gaula sileba, gaula ‘e sikitini; kaiwe ‘e bweuna ‘e bweuna ‘arenaia gaula ‘e rua.

³¹ Ta sa‘u barabara ‘i bubudi kaiwe akesiega; ‘e nima anua tabenakele esenana ‘e bweu ‘ana kaiwe manudi.

³² Ta sa‘ubarabara ‘e nima anua tabenakele mariesena ‘ana kaiwe manudi, ta sa‘ubarabara ‘e nima anua tabenakele ‘ana kaiwe manudi guauna manuna ‘ebwaga ‘enaia.

³³ Ta sa‘ubarabara gamwanaia ‘i bubuna be kaiwe gamwagamwanidiega ‘i e ‘etoruguiena ga si sasa‘a ruarua ‘arena ta garuna.

³⁴ Ta kaiwe ‘i bodedi golega, ta ‘adi giimweiiao ‘i bubudi sa‘ubarabara ‘adi ‘ebesa‘u manudi, ta sa‘u barabara ‘i bodedi golega.

³⁵ Ta ‘aubodaboda ‘i bubuna karakarawinega, papele be, bweabwearina be, kaleko ionaiona matagidarina be: ma‘ana ierubima to guinua panapana‘isina ‘ana guinua ‘i bubuna.

³⁶ Ta ‘ora akesia e ‘ata ‘edia ‘i bubudi, ta golega ‘i bodedi: ‘adi ‘ebeloesaneao gola; ta gaula sileba e ‘ata i ‘e‘urenina manudi.

³⁷ Ta anua ‘ana ‘awa manuna ‘auboda ‘i bubuna, karakarawinega, papele be, bweabwearina be, kaleko ionaiona matagidarina be, to eiara ‘ana guinua;

³⁸ Ta ‘ana ‘ora ‘e nima ma‘adi ‘ebetaraesanana; ta debadi be ‘adi sa‘ubarabara golega ‘i bodedi: ta ‘adi gaulao ‘e nima barasega.