Si Apwesa 35 - Buki Tabu Lowaenei 1919

‘UPWA 35.

¹ Ta Mose Iseraela tubunao ‘idi boda maibo‘ana ‘i egogonedi, ta ‘edia ‘i ona, Gete ona nidi Ieoba ni‘atu ‘i oneonedi, be wa da guinuedi.

² Asiata ‘e sikisi guinua wa da eguinue, ta asiata e sebeni nina ‘emia asiata tabu ‘i da miami, ‘eiawai‘ata mwau ‘ina sabate Ieoba ‘enaia: tauna guinua ‘e bweu ‘ena ‘i guinua wa da loemwawasina.

³ Gea‘abo awe wa loeloe‘abi ‘imi anua ‘edia asiata sabate ‘ena.

⁴ Ta Mose ‘i ona Iseraela tubunao ‘idi boda maibo‘ana ‘edia, ‘i gwae, Gete iage nina Ieoba ‘i ona, ‘i gwae,

⁵ ‘Emiega ‘ebwaeadaita wa da ‘ewa Ieoba ‘enaia: tauna ‘ate‐tagwatagwarina, ‘i da me‘ena, Ieoba ‘ana ‘ebwaeadaita; gola, sileba be, barasa be;

⁶ Karakarawina be, papele be, bweabwearina be, kaleko matagidarina be, gote unuununa be;

⁷ Ta sipi me‘olotodi bwaradi ‘e‘urenina bweabwearina, kulikuliaa bwaradi be, kaiwe akesia be;

⁸ Bunama maieare manuna be, mu‘ana bunamaoroa manuna be, mu‘ana dibidibi manuna be;

⁹ Gurewa onikisa be, gurewa sa‘usa‘u be, tara‘apwara manuna, ta ‘ailumaluma manuna.

¹⁰ Ta tai iauna ‘emiega ‘ate‘atesinasinapudi ‘i da mai, ta iage iauiauna Ieoba i ‘eonena si da bubudi;

¹¹ Anua tabenakele nina, ‘ana anua‐kaleko, ‘ana bwasa ‘etanaia be, ‘ana ‘etoiainao be, ‘ana mwadareao be, ‘ana sa‘ubarabaraiao be, ‘ana ‘orao be, ‘ana gaulao be;

¹² Dedewaga nina, ‘ana ‘ewa‘ewao be, ‘ebemi‐nua‘ole‘ole nina, ‘ana lobodaboda be;

¹³ Tebeli nina, ‘ana ‘ewa‘ewao be, ‘ana gaebao iauiauna be, palaua‐‘ebee‘ita be;

¹⁴ maieare ‘ana ‘ebesa‘u wate ma‘edana manuna, ‘ana gaebao be, ‘ana maieareao be, bunama maieare manuna be;

¹⁵ Mu‘ana ‘ana ‘ebetaria be, ‘ana ‘ewa‘ewao be, bunama orooroa be, mu‘ana dibidibi be, ‘auboda ‘awa manuna be, anua tabenakele ‘ana ‘awa ‘enaia;

¹⁶ ‘Ebwaeadaita gabugabu ‘ana ‘ebetaria, ma‘ina barasa lomasamasarina, ‘ana ‘ewa‘ewao be, ‘ana gaebao iauiauna be, ‘ebe‘utu ta ‘aena be;

¹⁷ ‘Atamana ‘ana iage tarataraesanedi be, ‘ana ‘orao, ta ‘adi gaulao, ta atamana ‘ana lobodaboda ‘ana ‘awa manuna;

¹⁸ Anua tabenakele ‘ana ‘etoiainao be, ‘atamana ‘ana ‘etoiainao be, ‘adi baraeiao be;

¹⁹ ‘Oama si guinuena matagidaridi be, esena tabu ‘ediega ‘ena si guinua manuna be, ‘oama tabu Aarona to taria manuna, ta natunao me‘olotodi ‘adi ‘oama, be si guinua to taria ‘ina guinua ‘enaia.

²⁰ Ta Iseraela tubunao ‘idi boda maibo‘ana Mose matanega si sawara.

²¹ Ta si mai, ‘e bweuna ‘e bweuna ‘atena ‘i loniuiena, ta ‘e bweuna ‘e bweuna iaruiaruana ‘i tagwatagwarena, ta Ieoba ‘ana ‘ebwaeadaita ‘i me‘ena, anua ‘ebeeloba ‘ana guinua manuna, ‘ana guinua maibo‘ana manuna, ta ‘oama tabu manudi.

²² Ta si mai, tai be iine ruarua, iauiaudi si ‘atetagwara, ta taramaga ‘ana ‘etoiainao be, komokomoiao be, nimakusikusi ‘ebetu‘epa‘iao be, nipunaiao be, si me‘edi, iauiaudi oesi gola; tauna tai ‘e bweuna ‘e bweuna ‘ebwaeadaita gola i ‘ebwaea Ieoba ‘enaia.

²³ Ta tai ‘e bweuna ‘e bweuna, ‘ena karakarawina ‘i miami, papele be, bweabwearina be, kaleko matagidarina be, gota unuununa be, sipi me‘olotodi bwaradi si ‘e‘urenidi bweabwearina, kulikuliaa bwaradi be, si me‘edi.

²⁴ ‘E bweuna ‘e bweuna ‘ebwaeadaita sileba ta barasa i ‘ebwaea Ieoba ‘ana ‘ebwaeadaita ‘i me‘ena: ta tai ‘e bweuna ‘e bweuna, tauna ‘ena kaiwe akesia ‘i miami guinua ‘ana ‘ebebubuna ‘e bweuna manuna, ‘i me‘ena.

²⁵ Ta iine iauiaudi ‘ate sinasinapudi nimadiega si ionaiona, ta iage ni‘atu si ioniionina si me‘edi, karakarawina ta, papele, bweabwearina, ta kaleko matagidarina.

²⁶ Ta iine iauiaudi taudi ‘atedi i ‘eloniuiedi sinasinapuiega gota unuununa si ionaiona.

²⁷ Ta ‘inapwanao gurewa onikisa si me‘edi, ta gurewa sa‘usa‘u, tara‘apwara manuna, ta ‘ailumaluma manuna;

²⁸ ta mu‘ana, ta bunama; ma‘edana manuna be, bunama oroa manuna be, mu‘ana dibidibi manuna be.

²⁹ Iseraela tubunao ‘ebwaeadaita tagwara si me‘ena Ieoba ‘enaia; tai be waine iauiaudi, taudi ‘atedi ‘i gietagwarina be guinua iauiauna manuna gwegwe si me‘edi, guinua nina Ieoba ni‘atu ‘i onaona‘edi ‘aene Mose nimanega ‘i da guinua.

³⁰ Ta Mose ‘i ona Iseraela tubunao ‘edia, Wa ‘ita, Ieoba ni‘atu Besalela Uri natuna me‘olotona ‘i bwauiena ‘ana esanega, tauna ‘Ura natuna, Iuda ‘ina susuiega;

³¹ Ta Eaubada iaruiaruana ‘enega ‘i loema‘ena, sinasinapuiega, nonoega, mwaratoniega, ta ‘ebeguinua ‘ana bubuna maibo‘anega;

³² Ta guinua pana‘ita ‘i da enuadi, be ‘i da guinua golega, ta silebega, ta barasega,

³³ Ta gurewa sa‘usa‘u leleni ‘adi daba manuna, ta kaiwe ‘ana daiagiega, be ‘ebe guinua pana‘ita ‘ana bubuna iauiauna ‘ena ‘i da guinua.

³⁴ Ta ‘atenaia ‘I sa‘una ‘aene ‘i da e‘ita, tauna be, Ooliaba be, tauna Aisamaka natuna, Dana ‘ina susuiega.

³⁵ Taudi ‘i loema‘edi ‘ate‐sinasinapuiega, be ‘ebeguinua ‘ana ‘ebebubuna iauiauna si da guinue, to daiagi ‘ana iage ta, to guinua panapana‘isina ‘ana iage ta, to ‘ebeeiara ‘ana iage, karakarawina ‘ena, ta papele ‘ena, bweabwearina ‘ena, ta kaleko matagidarina ‘ena, ta to ‘ebeiona ‘ana guinua, tugama taudi ‘ebeguinua ‘e bweuna si guinua ‘idi guinua, ta taudi guinua panapana‘isina si nuedia ‘idi guinua.