Si Apwesa 34 - Buki Tabu Lowaenei 1919

‘UPWA 34.

¹ Ta Ieoba ‘i ona Mose ‘enaia, Tebeli gurewa ‘e rua ‘u da sapidi ‘emuia nadigega gimi tebeli: ta ona si miami gimi tebeli ‘edia taudi ‘u wearidi, ia da ‘etoladi tebeli ‘edia.

² Ta gonagona ‘enega ‘u da tooro, ta gonagonaia ‘u da tu‘ema ‘oea Sinai ‘enaia, ta ‘eguia ‘u da gieapweseio ‘oea debanaia.

³ Ta gea‘abo ‘e bweu tai ‘i da tu‘ema ma‘ieaio, ta gea‘abo ‘e bweu tai ia da ‘itena ‘oea maibo‘ana ‘enaia; ta sipi ta bulomakau gea‘abo si da ‘e‘ai ‘oea matanaia.

⁴ Ta tebeli gurewa ‘e rua ‘i sapidi nadigega gimi tebeli; ta Mose gonagonaia ‘i tooro manini, ta ‘i tu‘e ‘oea Sinai ‘enaia, na‘ieana Ieoba ‘i ona ‘enaia, ta nimanega tebeli gurewa ‘e rua i ‘ewedi.

⁵ Ta Ieoba ‘i mwa‘uta poana ‘ena, ta ‘ena ‘i tooro ma‘ieana, ta Ieoba ‘ana esana i ‘inana.

⁶ Ta Ieoba ‘i sakowasi matanaia, ta i ‘inanena, Ieoba, Ieoba, Eaubada ‘i maa nua‘ole‘oleiega ta ‘i oboboma, sabi gamwasoara ‘i so‘iso‘i, nua‘ole‘ole ta ona ‘ai‘aila ‘ediega ‘i maa‘apu‘apu;

⁷ Tausanao manudi nua‘ole‘ole i ‘ita‘i‘isina, bubuna geiogeioi ta li‘oa‐loina ta loegesi nigea ‘i e‘isa: ta nigea sa‘i toto‘umalidi ‘i da ‘awabobo‘anedi; tamadiao ‘idi bubuna geiogeioi ‘i e‘ita natudiao ‘edia, ta natudiao natudiao ‘edia, ga ‘epata‐tomota ‘etonina ‘enaia ta e‘atana ‘enaia.

⁸ Ta Mose ‘i lomanini, ta debana ‘i giekopu bare‘uia, ta ‘i bwagobwago.

⁹ Ta ‘i gwae, ‘Inapwana ie, ‘Abo gete ‘enega ni‘atu nua‘ole‘ole matamuia ia lobena, ia sideio, ‘Inapwana ‘i da tauia gamwagamwanimaia; tomota ‘otopa‘ara ta ‘enega; ta ‘ima bubuna geiogeioi ta ‘ima loegesi ‘u da kweuna, ta ‘u da ‘au‘ewema be ‘a da ‘imu tomotai.

¹⁰ Ta ‘i gwae, U ‘ita, ona‘upa‘upa ia sa‘ui; ‘imu tomota iauiaudi matadia ‘ebenuaowana ia da guinuedi, nadigega nigea si mwerurua bare‘u maibo‘ana ‘enaia, nai ‘asa ‘e bweu ‘enaia: ta tomota iauiaudi taudi gamwagamwanidia ‘u miami Ieoba ‘ina guinua si da ‘itena, tauna iage didiga ia guinua ma‘ieaio ta ‘enega.

¹¹ Iage ‘emuia ia ona batua ‘u da ‘ita: U ‘ita, matamuiega me Amori ia pa‘idi, me Kanania be, me Eta be, me Perisi be, Ibite be, me Iebusi be.

¹² ‘U da ‘ita‘i‘isio, ‘abona nai ona‘upa‘upa ‘u bubuna ‘asa ‘ena ‘u tautauia ‘ana tomianao ma‘emuao, ‘abona nai ‘i da ‘e sikwa gamwagamwanimi:

¹³ Ta ‘idi ‘ebetaria ‘u da ‘ula mwa‘utedi, ta ‘idi ‘ora‐gurewa ‘u da ‘e‘auweawearidi, ta ‘idi Aserima ‘u da tara separedi:

¹⁴ Gea‘abo ‘u da bwagobwago mari eaubada ‘enaia ta ‘enega: Ieoba ta ‘enega, tauna ‘ana esana E‘ipi‘ipi, tauna Eaubada e‘ipi‘ipi:

¹⁵ ‘Abona nai ona‘upa‘upa ‘u bubuna ‘asa ‘ana tomianao ma‘edi, ta ‘idi eaubadao ‘edia si eiarakwaia, ta ‘idi eaubadao ‘edia si da taria, ta ‘e bweu ‘i da bwauieio ta ‘ina taria ‘enega u ‘e‘ai;

¹⁶ ta natudi me wainedi u ‘ewa be natumuao me‘olotodi ‘edia, ta natudi me wainedi ‘idi eaubadao ‘edia si eiarakwaia, ta natumuao me‘olotodi si bubudi be ‘idi eaubadao ‘edia si eiarakwaiedi.

¹⁷ Gea‘abo eaubadao dogadoga ‘emuia ‘u da bubudi.

¹⁸ Palaua nigea malebeninamo ‘ana sagari ‘u da ‘ita‘i‘isi. Aaiata e sebeni palaua nigea malebeninamo ‘u da ‘e‘ai, nadigega ia ona ‘emuia, tuta aseiana ‘enega nawarae Abiba: nawarae Abiba ‘enega Aigupitoega ‘u apwesama ta ‘enega.

¹⁹ Iauiaudi gamwa si gigegena ‘igu iage; ta ‘imu lagolagowao iauiauna me‐‘olotodi, togimi tubua bulomakau ta sipi.

²⁰ Ta ase ‘ina togimi tubua ‘u da sa‘ugelasi gota menonoiana ‘enega: ta ‘abo nigea ‘u da sa‘usa‘ugelasi, ‘otona ‘u da lasena. Natumuao me‘olotodi tomatua iauiaudi ‘adi sa‘ugelasa ‘u da sa‘u. Ta gea‘abo ‘e bweu ‘i da apwesa mataguia kakaena.

²¹ Asiata ‘e sikisi ‘u da guinua, ta asiata ‘e sebeni nina ‘u da eiawai‘ata: tuta gesoa ta tuta sesoi ‘u da eiawai‘ata.

²² Ta sagari‐wiki ‘u da ‘ita‘i‘isi, tauna sesoi‐witi ‘ina gimi uanao, ta sagari‐egogona iakwara ‘ana ‘ebelosaroni ‘enaia.

²³ ‘Imu oloto iauiauna iakwara ‘enaia matoi si da apwesa ‘Inapwana Eaubada, Iseraela ‘ina Eaubada, matanaia.

²⁴ Matamuia ‘ebeloinao ia da ‘eula iaule, ta ‘imu rabao ia da giesinabwa: ta gea‘abo tai ‘e bweu ‘imu ‘asa ‘i da iatoiatoai, ‘ena ‘u tu‘e sabi apwesa Ieoba ‘imu Eaubada matanaia matoi iakwara ‘enaia.

²⁵ ‘Igu taria rarana gea‘abo ‘u da ‘ebwa‘ebwaeae palaua malebeninina ma‘ieana; ta gea‘abo taona ‘ana sagari ‘ana taria ‘i da miami ga gonagonaia.

²⁶ ‘Imu bwa‘a ‘ina gimi‐uanao ‘ina nugana ‘u da me‘ena Ieoba ‘imu Eaubada ‘ina anua ‘enaia. Gota menonoiana gea‘abo ‘u e‘ureni sinana susuna ‘enaia.

²⁷ Ta Ieoba ‘i ona Mose ‘enaia, Ona gete ‘u da ‘etoladidi: ona gete ‘idi bubuna ‘atua ni‘atu ona‘upa‘upa ia bubuna ma‘ieaio ta Iseraela ma‘ieana ta ‘enega.

²⁸ Ta nada ‘i miami Ieoba ma‘ieana asiata ‘e poti ta guguioi ‘e poti; nigea i ‘e‘ai palaua, ta nigea ‘i numa boasi. Ta tebeli ‘edia ona‘upa‘upa i ‘etoladidi, ‘ona sanau nidi.

²⁹ Ta gete ‘i apwesa, ‘ena Mose ‘i mwa‘utama ‘oea Sinaiega ‘ebee‘ita ‘ana tebeli ‘e rua Mose nimanaia, ‘ena ‘oega ‘i mwa‘utama, ga Mose nigea ‘i mwaramwaratoni maninina bwarana ‘i tuiaiarina ‘ina ona ma‘ieana manuna.

³⁰ Ta ni‘atu Aarona ta Iseraela tubunao iauiaudi Mose si ‘itena, wa ‘ita, maninina bwarana ‘i tuiatuiaiarina; ta doro deinaia si matautena.

³¹ Ta Mose ‘i bwau ‘edia; ta Aarona ta deriegogona ‘ana ‘inapwanao si ‘ila ‘enaia: ta Mose ‘i ona ‘edia.

³² Ta muriega Iseraela tubunao iauiaudi si mai serabenaia: ta ona ‘enega iage iauiauna Ieoba ni‘atu si onaona ma‘ieana ‘oea Sinai ‘enaia i ‘ebwaedi.

³³ Ta ni‘atu Mose ‘ina ona ma‘edi ‘i gumwara, ga nugwega maninina i ‘aubodebodena.

³⁴ Ta ni‘atu Mose ‘i rugu Ieoba matanaia sabi ona ma‘ieana, ga nugwa i ‘ewena, ga tuta ‘enega ‘i apwesama; ta ‘i apwesama, ta tauna ona nina ‘i nonona Iseraela tubunao ‘edia ‘i eonae;

³⁵ Ta Iseraela tubunao Mose maninina si ‘itena, ga Mose maninina bwarana ‘i tuiaiara: ta Mose nugwa ‘i sa‘u limena maninina ‘enaia, ga tuta ‘enega ‘i rurugu sabi eonaona ma‘ieana.