Si Apwesa 33 - Buki Tabu Lowaenei 1919

‘UPWA 33.

¹ Ta Ieoba ‘i ona Mose ‘enaia, ‘U da tauia, gete ‘enega ‘u da tu‘e, ‘oio ta tomota nidi ni‘atu u ‘au‘ewedima ‘asa Aigupitoega, ‘asa tauna ia ona‘upa‘upa Aberaamo ‘enaia, Isaako ‘ena, ta Iakobo ‘ena, ia ona, Tubumuao ‘edia ia da ‘ebwaea‘ena:

² Ta anelose ‘e bweuna ia da ‘etunena matamuia; ta me Kanania, me Amori, me Eta be, me Perisi be, Ibite, me Iebusi be, ia da pa‘idi:

³ ‘Asa ‘i daudau susu ta mu‘awa ‘ediega ‘enaia: ‘Abo‘agu nigea ia da tu‘e gamwagamwanio ta ‘enega; ‘omi tomota ‘otopa‘ara ta ‘enega: ‘abona nai ‘edaia ia loegumwario.

⁴ Ta tomota ni‘atu tetera to‘umalina getedi si nonona, ga si dedoi; ta nigea ‘e bweu tai ‘ana iiaiiara ‘i da iiarenaia.

⁵ Ta Ieoba ‘i ona Mose ‘enaia, Iseraela tubunao ‘edia ‘u da ona, ‘Omi tomota ‘otopa‘ara: ‘abo ia tu‘e gamwagamwanimuia minite ‘e bweunega, Ia da loegumwario: ta ‘enega ‘amu iiaiiara ‘u da ‘ewa iaulei ‘emuiega, be ‘enega ia da mwaratoni to‘ase nai ia da guinua ‘emuia.

⁶ Ta Iseraela tubunao ‘adi iiaiiara si elo‘ewa iaulei ‘oea Orebega ta ‘idi tautauia ‘enega.

⁷ Ta Mose ‘ina bubuna anua‐kaleko i ‘ewena ta i ‘abina ‘asa etaulunaia, ‘edasora ‘asega; ta ‘i eesena, ‘Anua ‘ebeeloba. Ta gete ‘i apwesa, iauna Ieoba i ‘ebesa ‘i tauiawa anua ‘ebeeloba ‘enaia, tauna ‘asa etaulunaia ‘i miami.

⁸ Ta gete ‘i apwesa, ‘ena Mose ‘i tauiawa Anua‐kaleko nina ‘enaia, tomota iauiaudi si tooro, ta si tooromo, tai iauna ‘ina anua‐kaleko ‘ana ‘awa ‘enaia, ta Mose murina si duneduneie, ga Anua‐kaleko ‘ena ‘i rugu.

⁹ Ta gete ‘i apwesa, ni‘atu Mose Anua‐kaleko ‘ena ‘i rugu, ga ‘ora poana ‘i mwa‘uta, ta ‘i tooro Anua‐kaleko ‘ana ‘awa ‘enaia: ta Ieoba ‘i ona Mose ma‘ieana.

¹⁰ Ta tomota iauiaudi ‘ora poana si ‘itena ‘i tootooro Anua‐kaleko ‘ana ‘awa ‘enaia: ta tomota iauiaudi si tooro ta si bwagobwago, tai ‘e bweuna ‘e bweuna ‘ina anua‐kaleko ‘ana ‘awanaia.

¹¹ Ta Ieoba ‘i onaona Mose ‘enaia si eawatanesinesi, ‘atua tai ‘i onaona gosiana ‘enaia. Ta i ‘ila limana ‘asaia: ta ‘ina ‘ari‘ei Iosua, Nuni natuna, tubuau, Anua‐kaleko nina nigea ‘enega ‘i tauia.

¹² Ta Mose ‘i ona Ieoba ‘enaia, U ‘ita, ‘eguia ‘u ona, Tomota gete ‘u da ‘au‘ewedima: ta nigea ‘u simana ‘eguia iaita ‘u da ‘etunena ma‘ieagu. Ta ‘u ona ni‘atu, ‘Amu esanega ia mwaratonio, ta wate mataguia nua‘ole‘ole ‘u lobena.

¹³ Ta gete ‘enega, ia sideio, ‘abo matamuia nua‘ole‘ole ia lobena, ‘imu ‘edao ‘u da e‘ita ‘eguia gete ‘enega, be ia da mwaratonio, be ‘enega nua‘ole‘ole ia da lobena: ta ‘u da nuena ‘asa gete ‘imu tomota.

¹⁴ Ta ‘i gwae, ‘Abo‘agu ia da tauia ma‘ieaio, ta ia da gieiawai‘ateio.

¹⁵ Ta ‘i eonena, ‘Abo ‘oio nigea ‘u tauia ma‘ieagu, gea‘abo gete ‘enega ‘u da ‘au‘au‘ewatu‘eienama.

¹⁶ Mane ‘enega tuta gete si da mwaratoni ‘aene ‘abo‘agu matamuia nua‘ole‘ole ia lobena, ‘abo‘agu ta ‘imu tomota? Nigea nai ‘aene ‘oio ‘u tauia ma‘ema, ta ‘enega ‘abo‘agu ta ‘imu tomota, tomota iauiauna bare‘u matanaia ‘ediega ‘a mia dumaduma.

¹⁷ Ta Ieoba ‘i ona Mose ‘enaia, Iage gete wate ‘u oneone ia da guinua: mataguia nua‘ole‘ole ‘u lobena ta ‘enega, ta ‘amu esanega ia mwaratonio.

¹⁸ Ta ‘i gwae, Ia sideio, ‘imu esaesa ‘u da e‘itegu.

¹⁹ Ta ‘i gwae, ‘Igu bobo‘ana maibo‘ana ia da gitaonena matamuia, ta Ieoba ‘ana esena ia da ‘inana matamuia; ta ia da nuabobo‘ana taudi nuagu ia da nuabobo‘ana ‘edia, ta ia da e‘ita nua‘ole‘ole taudi nuagu ia da e‘ita nua‘ole‘ole ‘edia.

²⁰ Ta ‘i gwae, Matagu nigea kapekapeana ‘u da ‘itena: tai gea‘abo ‘i da ‘itegu be iawasina ‘i da miami ta ‘enega.

²¹ Ta Ieoba ‘i gwae, U ‘ita, deiguia ‘e bweu esena, ta gurewa ‘ena ‘u da tooro:

²² Ta gete ‘i da apwesa, tuta ‘enega ‘igu esaesa ‘i sakowasi, gurewa gaulinaia ‘ena ia da sa‘uio, ta nimaguiega ia da lobodebodeio ga ia da sakowasi bei:

²³ Ta nimagu ia da ‘ewena, ta guaugu ‘u da ‘itena: ta matagu gea‘abo ‘e bweu ‘i da ‘itena.