Si Apwesa 32 - Buki Tabu Lowaenei 1919

‘UPWA 32.

¹ Ta ni‘atu tomota si ‘itena ‘aene Mose ‘ina mwa‘utama oega ‘i so‘iwawasae, ga tomota si egogonedi Aarona ‘enaia, ta si ona ‘enaia, Ta da tooro, eaubadao ta da mweruruidi manuda, taudi si da tauia nuganeda; Mose gete manuna, tai nina ‘asa Aigupitoega i ‘au‘ewedima, nigea ta mwaratoni mwa‘onai tauna.

² Ta Aarona ‘edia ‘i ona, Komokomo gola wa da e gita‘i, taudi mwanemiao tenadiega, natumiao me‘olotodi tenadiega, natumiao me wainedi tenadiega, ‘edia si miami, ta ‘eguia wa da me‘edi.

³ Ta tomota iauiauna komokomo gola tenadi ‘edia si miamiana si egita‘idi, ta si me‘edi Aarona ‘enaia.

⁴ Ta nimadiega i ‘ewena, ta ‘ebedaiagiega ‘i iagena, ta ‘i bubuna bulomakau menonoiana dogadogana: ta si gwae, Iseraela ie, getedi si da ‘imi eaubadao, taudi ‘asa Aigupitoega si ‘au‘ewemi.

⁵ Ta ni‘atu Aarona i ‘itena, ga ‘ebetaria i ‘abina matanaia; ta Aarona ‘i bwaubwau, ‘i gwae, Gibua‘i ‘i da sagari Ieoba ‘enaia.

⁶ Ta ‘i ulisina ga si unuboi, ta ‘ebwaeadaita gabugabudi si ‘ebwaea, ta ‘ebwaeadaita guguia si me‘edi; ta tomota si miatoa sabi ‘e‘ai ta sabi numa, ta si tooro sabi ‘eesaesasara.

⁷ Ta Ieoba ‘i ona Mose ‘enaia, ‘U da tauia, ‘u da mwa‘uta; ‘imu tomota ta ‘enega, taudi u ‘au‘ewedima ‘asa Aigupitoega, ni‘atu si gieto‘umaliedi:

⁸ Ni‘atu ‘eda ia ona ‘edia ‘enega si tauia dumaduma manini: ni‘atu bulomakau menonoiana dogadogana si bubuna, ta ni‘atu ‘ena si bwagobwago, ta ‘ena si taritaria, ta si gwae, Getedi si da e ‘imu eaubadao, Iseraela ie, taudi si ‘au‘ewatu‘eiemi ‘asa Aigupitoega.

⁹ Ta Ieoba ‘i ona Mose ‘enaia, Tomota gete ni‘atu ia ‘itedi, ta, u ‘ita, tomota ‘otopa‘ara:

¹⁰ Gete ‘enega ‘u da gisinegu, be ‘enega ‘igu gamwasoara ‘i da iaiiai ‘edia, ta ia da loegumwaridi: ta ‘emuiega ‘ebeloina sinabwana ia da bubuna.

¹¹ Ta Mose Ieoba ‘ina Eaubada ‘ena ‘i sida, ta ‘i gwae, Ieoba, to‘ase manuna ‘imu gamwasoara ‘i iaiiai ‘imu tomota ‘edia, taudi ‘asa Aigupitoega u ‘au‘ewedima waiwai sinabwanega ta nima waiwaiega?

¹² To‘ase manuna me Aigupito si da gwae, si da ona, To‘umalina manuna ‘i ‘au‘ewedi, be ‘i unudi ‘oea ‘edia, ta bare‘u matanega ‘i loegumwaridi? ‘Imu gamwasoara didiga ‘enega ‘u da sana‘ilama, ta to‘umalina gete ‘imu tomota ‘edia manuna nuaio ‘i da ‘ebuni.

¹³ Aberaamo, Isaako, Iseraela be, ‘imu toguinuao, ‘u da nua‘i‘isidi, taudi ‘edia ‘u ona‘upa‘upa taumumo ‘emuiega, ta ‘u eonedi, Tubumuao ia da gieiau garewa ‘ina kwadima ‘atua, ta ‘asa gete maibo‘ana ni‘atu manuna ia gwaegwae tubunao ‘edia ia da ‘ebwaea, ta si da ‘ewa be ‘idi iage ataia.

¹⁴ Ta Ieoba nuana i ‘ebunina to‘umali nina manuna tauna ‘i ona ‘i da guinua ‘ina tomota ‘edia.

¹⁵ Ta Mose ‘i sana‘ila, ta ‘oega ‘i mwa‘utama, ‘ebee‘ita ‘ina tebeli ‘e rua nimanaia; tebeli ‘eto‘etoladidi ‘e rua dei ‘edia; mari dei ta mari dei ma‘idi ‘etoladi.

¹⁶ Ta tebeli nidi Eaubada ‘ina guinua, ta ‘etoladi nina Eaubada ‘ina ‘etoladi, tebeli ‘edia i ‘etoladi.

¹⁷ Ta ni‘atu Iosua tomota enadi ‘i nonona si bwaubwau toitoila, ga ‘i ona Mose ‘enaia, Saia ‘enana ‘asaia.

¹⁸ Ta ‘i gwae, Nigea ‘enadi taudi si bwaubwau waiwai manuna, ta nigea ‘enadi taudi si bwaubwau ‘esilae manuna: ta ‘enadi taudi si wari ia nonona.

¹⁹ Ta gete ‘i apwesa, ni‘atu ‘i mai ‘asa serabenaia, ga bulomakau menonoiana ta lausa i ‘itedi: ta Mose ‘ina gamwasoara ‘i iaiiai, ta tebeli i ‘uledi nimanega, ta ‘oea ‘agaraunaia ‘i elowearidi.

²⁰ Ta bulomakau menonoiana ni‘atu si bubuna i ‘ewena, ta awe ‘ena i gabuna, ta ‘i daina, ta boasi ‘ena ‘i lolelewanena, ta Iseraela tubunao ‘enega ‘i enumedi.

²¹ Ta Mose ‘i ona Aarona ‘enaia, To‘ase tomota gete si guinua ‘emuia, ta ‘enega loegesi sinabwana ni‘atu ‘u me‘ena ‘edia?

²² Ta Aarona ‘i gwae, Gea‘abo ‘igu ‘inapwana ‘ina gamwasoara ‘i da iaiiai: tomota ‘u mwaratonidi, nuadi to‘umalina ‘enaia.

²³ ‘Eguia si gwae ta ‘enega, Eaubadao ‘u da bubudi ‘emaia, taudi si da tauia nuganidaia: Mose gete manuna, tai nina ‘asa Aigupitoega i ‘au‘ewedima, nigea ‘a mwaratoni mwa‘onai tauna.

²⁴ Ta ia ona ‘edia, Taudi ma‘idi gola ‘e bweuna, si da gita‘inama; ‘enega si ‘ebwaegu: ta awe ‘ena ia ‘ulena, ta bulomakau menonoiana gete ‘i apwesama.

²⁵ Ta ni‘atu Mose i ‘itena tomota si ‘eli‘ama toilidi; Aarona ‘i li‘amidi ta ‘enega be si da ‘eawaonaona ‘adi tarauwara gamwagamwanidia:

²⁶ Ga Mose ‘i tooro ‘asa ‘ana ‘auboda ‘enaia, ta ‘i gwae, Tauna Ieoba ‘ina boda ‘ena ‘i miami, ‘eguia ‘i da mai. Ta Lebi tubunao iauiaudi si deriegogona ‘enaia.

²⁷ Ta ‘i eonedi, Gete nadigega Ieoba ‘i gwae, Iseraela ‘ina Eaubada, Tai iauna ‘ina sisi‐saia ‘i da sa‘u bwadagana ‘enaia, ta ‘i da tauia dadana ‘auboda ga ‘auboda ‘enaia ‘asa maibo‘ana ‘enaia, ta tai iauna tasina, ta tai iauna ‘ana ‘arau, ta tai iauna gosiana, ‘i da ununa.

²⁸ Ta Lebi tubunao si guinua na‘ieana Mose ‘ina ona: ta tomota ‘ediega si be‘u ‘asiata gote ‘enega tai ‘e teri tausana.

²⁹ Ta Mose ‘i gwae, Batua wa da tagwaremi Ieoba ‘enaia, tamo, tai iauna natuna matanaia, ta tasina matanaia; be ‘enega onaoboboma ‘i da sa‘u ‘emia batua.

³⁰ Ta ‘i ulisina ga gete ‘i apwesa, Mose ‘i ona tomota ‘edia, Loegesi sinabwana wa loegesiena: ta gete ‘enega ia da tu‘e Ieoba ‘enaia; nai ia da ginua‘ebweu ‘imi loegesi manuna.

³¹ Ta Mose i ‘ila Ieoba ‘enaia, ta ‘i gwae, Oioi, tomota gete loegesi sinabwana si loegesiena, ta eaubadao gola si bubudi ‘edia.

³² Ga gete ‘enega, ‘abo ‘idi loegesi ‘u kweuna; ta ‘abo nigea, ia sideio, ‘imu buki tauna ni‘atu ‘u ‘etoladina, ‘enega ‘u da kweugu.

³³ Ta Ieoba ‘i ona Mose ‘enaia, Tauna ‘eguia ‘i loegesi, tauna ‘igu bukiega ia da kweuna.

³⁴ Ta gete ‘enega ‘u da tauia, tomota ‘u da nuganedi esena nina ‘enaia ni‘atu manuna ia onaona ‘emuia; u ‘ita, ‘igu anelose ‘i da tauia nuganimuia: ta asiata nina ‘enega ia da tauia sabi ‘ita, ‘idi loegesi ia da e‘ita ‘edia

³⁵ Ta Ieoba tomota ‘i unudi, bulomakau menonoiana si bubuna manuna, tauna Aarona ‘i bubuna.