Si Apwesa 31 - Buki Tabu Lowaenei 1919

‘UPWA 31.

¹ Ta Ieoba ‘i ona Mose ‘enaia, ‘i gwae,

² U ‘ita, Besalela Uri natuna, tauna ‘Ura natuna, Iuda ‘ina susu ‘enega, ni‘atu ia bwauiena ‘ana esanega:

³ Ta ni‘atu ia loemaena Eaubada iaruiaruanega, sinasinapu ‘ena, pana‘ita ‘ena, mwaratoni ‘ena be, guinua ‘ana bubuna iauiauna be,

⁴ be guinua panapana‘isidi ‘i da bubudi, be ‘i da guinua gola ‘ena be, sileba ‘ena be, barasa ‘ena be,

⁵ daba gurewa sa‘usa‘una manuna be, daiagi kaiwe be, be ‘i iagena guinua ‘ana bubuna iauiauna ‘edia.

⁶ Ta ‘Abo‘agu, u ‘ita, ni‘atu ia aseiena ma‘ieana Ooliaba, Aisamaka natuna, Dana ‘ina susu ‘enega; ta iauiaudi ‘atesinasinapu ‘atedia sinasinapu ia sa‘u, be ‘enega iage iauiauna ia oneone ‘emuia si da bubudi:

⁷ Anua egogona ‘ebeloba, ‘ebee‘ita ‘ana dedewaga be, ‘ebeminua‘ole‘ole ‘ena ‘i miami be, Anua ‘ana gwegwe iauiauna be;

⁸ Tebeli ta ‘ana gaebao be, maieare ‘ana ‘ebesa‘u esasena ma‘ina gaebao iauiaudi be, mu‘ana ‘ana ‘ebetaria be;

⁹ ‘Ebwaeadaita gabugabu ‘ana ‘ebetaria ma‘ina gaeba iauiaudi be, ‘ebe‘utu ta ‘aena be;

¹⁰ Ta ‘oama bubuna matagidarina be, ‘oama tabu Aarona totaria manuna be, natunao ‘adi ‘oama be, to taria ‘ina guinua ‘ena si da guinua;

¹¹ Bunama orooroa be, mu‘ana dibidibidi esena tabu manuna be: iage iauiauna ia ona ‘emuia nadigega si da guinua.

¹² Ta Ieoba ‘i ona Mose ‘enaia, ‘i gwae,

¹³ Wate ‘u da ona Iseraela tubunao ‘edia, ‘u da gwae, Ona ‘ai‘aila, Igu sabate ‘u da ‘ita‘i‘isidi: tauna ‘i we‘iwe‘iiaia ‘eguia ta ‘emia ‘imi epata‐tomota ‘edia; be ‘enega wa da mwaratoni ‘Abo‘agu Ieoba taugu ia etabuiemi.

¹⁴ Sabate wa da ‘ita‘i‘isi ta ‘enega; tauna ‘i tabu ‘emia: tauna ‘i gibesobesona si da loemwawasina: tauna guinua ‘e bweu ‘ena ‘i guinua, iaruiarua gote ‘ina tomota ‘ediega si da ‘upwa‐iaulena.

¹⁵ Asiata ‘e sikisi si da guinua; ta asiata ‘e sebeni nina tauna ‘eiawai‘ata mwau ‘ina sabate, tabu Ieoba ‘enaia: tauna iage ‘e bweuna ‘i guinuena asiata sabate ‘ena, tauna si da loemwawasina.

¹⁶ Ta ‘enega Iseraela tubunao sabate si da ‘ita‘i‘isi, be sabate si da nuena ‘idi epata‐tomota ‘edia, ‘ona‘upa‘upa ‘ataia manuna.

¹⁷ Tauna we‘iwe‘iiaia ‘eguia ta Iseraela tubunao ‘edia ta gea‘abo ‘i gumwagumwara: asiata ‘e sikisi ‘ediega Ieoba garewa ta bare‘u ‘i mweruruidi ta ‘enega, ta asiata ‘e sebeni nina ‘i eiawai‘ata, ga oona ‘i nua.

¹⁸ Ta ni‘atu ‘idi eonaona ma‘ieana ‘Oea Sinai ‘enaia ‘i losa‘u, ga ‘ebee‘ita ‘ina tebeli ‘e rua i ‘ebwaea Mose ‘enaia, tebeli gurewaiao, Eaubada nimamatagiginega i ‘etoladidi.