Si Apwesa 3 - Buki Tabu Lowaenei 1919

‘UPWA 3.

¹ Ta Mose, bwasiana Ietoro, Midiana ‘ina to‐taria, ‘ina sipi i ‘ita‘ita‘i‘isi: ta sipi i ‘au‘ewedi mitawa soranaia, ta Eaubada ‘ina ‘oea ‘ena ‘i mai, Oreba ‘enaia.

² Ta Ieoba ‘ina anelose ‘ena ‘i apwesa awesabelulu ‘enaia kaiwe soranega: ta i ‘ita, ta, wa ‘ita, kaiwe i ‘ara‘arata, ta kaiwe ‘awe nigea ‘i da ‘enina.

³ Ta Mose ‘i gwae, Gete tuga ia da nao, ta ‘ebe‘ita sinabwana gete ia da ‘itena, to‘ase manuna kaiwe nigea i ‘ara‘arasi.

⁴ Ta ni‘atu Ieoba i ‘itena ‘i tauiawa sabi ‘ita, Eaubada kaiwe gamwanega ‘ena ‘i bwau, ta ‘i ona, Mose, Mose. Ta ‘i ona, ‘Abo‘agu.

⁵ Ta ‘i gwae, Gea‘abo gete ‘ena ‘u mema serabenaia: ‘amu ‘aeiapaiapa ‘aemuiega ‘u da gimoni, sena nina ‘ena ‘u tootooro bwa‘a tabu ta ‘enega.

⁶ Wate ‘i gwae, ‘Abo‘agu tamaio ‘ina Eaubada, Aberaamo ‘ina Eaubada, Isaako ‘ina Eaubada, Iakobo ‘ina Eaubada be. Ta Mose maninina i ‘aubodebodena; ‘ita Eaubada ‘i matautena ta ‘enega.

⁷ Ta Ieoba ‘i ona, ‘Igu tomota Aigupito ‘ena ‘idi elo‘uia ni‘atu ia ‘ita ‘ai‘ailina, ta ‘idi bwau ‘idi to‐loina‐guinua manudi ni‘atu ia nonona; ‘idi ‘ate‘uia‘uia ia mwaramwaratoni ta ‘enega;

⁸ Ta ia mwa‘utama be ia da ‘etoseedi me Aigupito nimadiega, be ia da ‘au‘ewatu‘eiedima ‘asa gote ‘enega ga ‘asa bobo‘ana ‘enaia ta ‘asa sinabwana, ‘asa ‘enaia susuta oni ‘ena si daudau; me Kanania ‘idi esena ‘ena be, me Eta be, me Amori be, me Perisi be, me Ibite be, me Iebusi be.

⁹ Ta gete, u ‘ita, Iseraela tubunao ‘idi bwau ‘i mai ‘eguia: wate iage mwau ‘enega me Aigupito si unudi ni‘atu ia ‘itena.

¹⁰ ‘U da mai ta ‘enega, be Parao ‘ena ia ‘etuneio, be ‘enega ‘igu tomota Iseraela tubunao ‘u da ‘au‘ewedima Aigupitoega.

¹¹ Ta Mose Eaubada ‘ena ‘i gwae, ‘Abo‘agu iaita, be ia da tauia Parao ‘enaia, ta Iseraela tubunao ia da ‘au‘ewedima Aigupitoega?

¹² Ta ‘i gwae, Abo‘agu ai‘aila ma‘ieaio; ta gete we‘iwe‘iiaia ‘emuia, ‘aene ni‘atu ia ‘etunemu: ni‘atu tomota u ‘au‘ewedima Aigupitoega, ‘oea gete ‘ena Eaubada ‘ena wa da guinua.

¹³ Ta Mose Eaubada ‘ena ‘i gwae, U ‘ita, ‘ena ia wai Iseraela tubunao ‘edia, ta ‘edia ia da gwae, Tamamiao ‘idi Eaubada ni‘atu i ‘etunegu ‘emia; ta ‘eguia si da ona; Mwa‘adega ‘ana esana? to‘ase ia da ona ‘edia?

¹⁴ Ta Eaubada ‘i ona Mose ‘enaia, Abo‘agu Taugu: ta ‘i ona, Gete nadigega ‘u da ona Iseraela tubunao ‘edia, ‘Abo‘agu i ‘etuneguma ‘emia.

¹⁵ Ta Eaubada wate ‘i ona Mose ‘ena, Gete nadigega ‘u da ona Iseraela tubunao ‘edia, Ieoba, tamamiao ‘idi Eaubada, Aberaamo ‘ina Eaubada, Isaako ‘ina Eaubada, Iakobo ‘ina Eaubada be, ni‘atu i ‘etuneguma ‘emia: gete ‘agu esana ‘ataia, ta gete ‘agu ‘ebenua‘i‘isi ga epata‐tomota iauiauna.

¹⁶ ‘U da tauia, ta Iseraela ‘ina ‘inapwanao ‘u da egogonedi, ta ‘edia ‘u da ona, Ieoba, tamamiao ‘idi Eaubada, Aberaamo ‘ina Eaubada, Isaako ‘ina Eaubada, Iakobo ‘ina Eaubada be, ni‘atu ‘i apwesa ‘eguia, ‘i gwaegwae, ‘Abo‘agu ni‘atu ia ‘itemi, ta iage si guinuena ‘emia Aigupito ‘enaia:

¹⁷ Ta ni‘atu ia gwae, Aigupito ‘ina ‘elo‘uiaega ia da ‘au‘ewa tu‘eieio ga me Kanania ‘idi ‘asa ‘enaia, me Eta be, me Amori be, me Perisi be, me Ibite be, me Iebusi be, ‘asa ‘enaia susu ta oni ‘ena si daudau.

¹⁸ Ta ‘enaio si da nonona: ta ‘u da mai, ‘oio ta Iseraela ‘ina ‘inapwanao, Aigupito ‘ina king ‘enaia, ta ‘ena wa da gwae, ‘Ieoba, me Eberu ‘idi Eaubada, ni‘atu ‘i apwesa ‘emaia: ta ‘u da tagwarema, ‘a sideio, be ‘a da tauia ga asiata ‘e toi mitawa ‘enaia, be Ieoba ‘ima Eaubada ‘ena ‘a da taria.

¹⁹ Ta ia mwaratoni Aigupito ‘ana king nigea ‘i da tagwaremi be wa da tauia, nigea, nigea nima waiwaiega.

²⁰ Ta nimagu ia da iasitoto, ta Aigupito ia da ununa ‘igu guinua didiga iauiauna ‘ediega taudi ia da guinua gamwagamwanaia: ta muriega ‘i da tagwaremi be wa da tauia.

²¹ Ta tomota gete me Aigupito matadia ‘atenua‘ole‘ole ia da ‘ebwaea: ta gete ‘i da apwesa, ‘aene, ‘ena wa tauia, gea‘abo wa da tauia kakaemi:

²² ta waine ‘e bweuna ‘e bweuna gosiana ‘enega, ta tauna ‘ina anua ‘ena ‘i miamiana ‘enega, ‘i da eona gwegwe sileba be, gwegwe gola be, ‘oama be: ta natumiao me‘olotodi, ta natumiao me wainedi, ‘edia wa da sa‘udi; ta me Aigupito wa da ‘oaedi.