Si Apwesa 29 - Buki Tabu Lowaenei 1919

‘UPWA 29.

¹ Ta gete iage nina ‘u da guinua ‘edia be ‘u da etabudi, be ‘eguia si da guinua to‐taria ‘ina guinua ‘ena: bulomakau me‘olotona menonoiana ta sipi me‘olotodi ‘e rua nigea ma ‘idi to‘umalinamo,

² ta palaua nigea malebeninamo keke nigea malebeninamo si ilia bunama ma‘ieana, ta iage dedeadi nigea malebeninamo si bunabunamina: palaua witi matagidarina ‘enega ‘u da bubudi.

³ Ta kodo ‘e bweu ‘ena ‘u da sa‘udi, ta kodo nina ‘enega ‘u da me‘edi, bulomakau ta sipi me‘olotodi ‘e rua ma‘ediao.

⁴ Ta Aarona ta natunao me‘olotodi ‘u da me‘edi anua egogona ‘ana ‘awa ‘enaia, ta ‘u da ‘utudi boasiega.

⁵ Ta ‘oama ‘u da ‘ewedi, ta kotu, tara‘apwara be, ‘ailumaluma be, Aarona ‘enega ‘u da e‘otena, ta tara‘apwara ‘ana ‘ebepaima wasiwasi ‘ai‘ailina ‘enega ‘u da elogadiwanina:

⁶ Ta peaula ‘u da sa‘u debanaia, ta peaula ‘esaesa tabu ‘u da sa‘u peaula ‘enaia.

⁷ Ga bunama ‘ebe‘oroa ‘u da ‘ewena, ta debanaia ‘u da siwa, ta ‘u da e‘orona.

⁸ Ta natunao ‘u da me‘edi, ta kotuiega ‘u da e‘otedi.

⁹ Ta gadiwana ‘ediega ‘u da elogadiwanidi, Aarona ta natunao me‘olotodi, ta peaula ‘edia ‘u da paima: ta taria si da ‘ewena loina ataia ‘enega; ta Aarona ta natunao ‘u da sa‘u ‘ai‘ailidi.

¹⁰ Ta bulomakau ‘u da me‘ena anua egogona matanaia: ta Aarona ta natunao nimadi si da sa‘u bulomakau debana ‘enaia.

¹¹ Ta bulomakau ‘u da ununa loemwawasina Ieoba matanaia, anua egogona ‘ana ‘awa ‘enaia.

¹² Ta bulomakau rarana ‘enega ‘u da ‘ewa, ta nimamata gigimuiega ‘ebetaria kunana ‘ena ‘u da sa‘ui; ta rara maibo‘ana ‘u da siwa ‘ebetaria ‘arenaia.

¹³ Ta iapa maibo‘ana diana ‘i bodena, ta tana ‘ate ‘enaia, ta nuakwaia ‘e rua, ta iapa ‘i miami ‘edia, ‘u da ‘ewedi, ta ‘ebetaria ‘ena ‘u da gabudi.

¹⁴ Ta bulomakau esiona, bwarana be, bi‘ina be, ‘asa guinaia ‘u da gabudi awesabeluluiega: tauna bubuna to‘umalina ‘ana ‘ebwaeadaita.

¹⁵ Wate sipi me‘olotona ‘e bweuna ‘u da ‘ewa; ta Aarona ta natunao nimadi si da sa‘u sipi me‘olotona debana ‘enaia.

¹⁶ Ta sipi me‘olotona ‘u da ununa loemwawasina, ta rarana ‘u da ‘ewa, ta ‘u da siwaroro dadana ‘ebetaria ‘enaia.

¹⁷ Ta sipi me‘olotona ‘u da daba ‘u da ‘auweari maesenaana, ta diana ‘u da ‘utui, ta ‘aena, ta maesenaana ‘u da sa‘udi, mabulubuluna.

¹⁸ Ta sipi me‘olotona maibo‘ana ‘u da gabuna ‘ebetaria ‘enaia: tauna ‘ebwaeadaita gabugabuna Ieoba ‘enaia: tauna maina dibidibina, ‘ebwaeadaita si bubuna ‘aweiega Ieoba ‘enaia.

¹⁹ Ta sipi me‘olotona ‘e ruena ‘u da ‘ewa; ta Aarona ta natunao nimadi si da sa‘u sipi me‘olotona debana ‘enaia.

²⁰ Ga sipi nina ‘u da loemwawasina, ta rarana ‘u da ‘ewa, ta Aarona tenana ataina matagaruna ‘ena ‘u da sa‘u, ta natunao tenadi ‘ataidi matagaruna ‘enaia, ta ataidi ‘ina nimamatapou ‘enaia, ta ‘aedi ‘ataina ‘ina ‘aematapounina ‘enaia, ta rara ‘ebetaria ‘u da siwaroro sakowasie ‘enaia.

²¹ Ta rara tauna ‘ebetaria ‘ena ‘i miami, ta bunama oroa, ‘ediega ‘u da ‘ewa, ta ‘u da siwaroro‘ena Aarona ‘enaia, ‘ana ‘oama ‘edia be, natunao me‘olotodi ‘edia be, natunao ‘adi ‘oama ‘edia ma‘enao: ta ‘i da etabuna, ‘ana oama be, natunao be, natunao ‘adi oama be, ma‘enao.

²² Wate sipi me‘olotona nina ‘enega iapa ‘u da ‘ewena, iuiuna iapa be, iapa ‘atena ‘i bodena be, ‘ate ‘ina tana be, nuakwaia ‘e rua be, iapa ‘edia ‘i miami be, bwadaga ataina be; tauna sa‘udumaduma ‘ina sipi me‘olotona ta ‘enega:

²³ Palaua puli ‘e bweuna be, keke palaua bunabunamina ‘e bweuna be, iage dedeana ‘e bweuna be, kodo palaua nigea malebeninamo tauna Ieoba matanaia ‘enega:

²⁴ Ta maibo‘ana ‘u da sa‘u Aarona nimanao ‘edia, ta natunao nimadiao ‘edia: ta ‘u da lo‘uio‘edi ‘ebwaeadaita lo‘uio Ieoba matanaia manuna.

²⁵ Ta nimadiega ‘u da ‘ewedi, ta ‘u da ‘arasidi ‘ebetaria ‘enaia ‘ebwaeadaita gabugabu debanaia, maina dibidibi manuna Ieoba matanaia: tauna ‘ebwaeadaita si bubuna ‘aweiega Ieoba ‘enaia.

²⁶ Ta Aarona ‘ina sa‘udumaduma ‘ina sipi me‘olotona lumalumana ‘u da ‘ewena, ta ‘u da lo‘uio‘ena ‘ebwaeadaita lo‘uio Ieoba matanaia manuna: ta tauna ‘i da ‘imu tomwana.

²⁷ Ta ‘ebwaeadaita lo‘uio ‘ina lumaluma ‘u da etabuna, ta ‘ebwaeadaita gitu‘e ‘ina bwadaga, tauna si lo‘uio‘ena ta si gitu‘eiena, sa‘u dumaduma ‘ana sipi me‘olotona ‘enega, tauna ‘enega Aarona manuna, ta tauna ‘enega natunao manudi:

²⁸ Ta tauna Aarona ta natunao manudi ‘i da ‘e iotura ataia nadigega Iseraela tubunao ‘ediega: tauna ‘ebwaeadaita gitu‘e ta ‘enega: ta tauna ‘i da ‘ebwaeadaita gitu‘e Iseraela tubunao ‘ediega ‘idi ‘ebwaeadaita guguia ‘adi taria ‘ediega, tauna ‘idi ‘ebwaeadaita gitu‘e Ieoba ‘enaia.

²⁹ Ta Aarona ‘ana ‘oama tabu si da natunao manudi murinaia, be si da e‘oroa ‘edia, ta si da sa‘udumaduma ‘edia.

³⁰ Asiata ‘e sebeni natuna me‘olotona tauna ‘i etotaria ‘ana lopa‘eru ‘i da e‘otedi, ‘ena ‘i mai anua egogona ‘enaia sabi guinua esena tabu ‘enaia.

³¹ Ta sa‘udumaduma ‘ina sipi me‘olotona ‘u da ‘ewena, ta esiona ‘u da e‘ureni esena tabu ‘e bweuna ‘enaia.

³² Ta Aarona ta natunao sipi nina esiona si da ‘e‘ai, palaua kodo ‘ena ‘i miami ta, anua egogona ‘ana ‘awa ‘enaia.

³³ Ta iage gotedi ‘ediega taria si bubuna si da ‘e‘ai, be si sa‘udumedumedi ta si etabudi: ta to‘u‘umara gea‘abo ‘enega ‘i da ‘e‘ai, si tabu ta ‘enega.

³⁴ Ta ‘abo sa‘udumaduma esiona ‘enega, nai palaua ‘enega ‘e bweuna ‘i miami ga gonagonaia, ga tupwana nina ‘u da gabuna aweiega: gea‘abo si da ‘e‘ani, tauna ‘i tabu ta ‘enega.

³⁵ Ta nadigega ‘u da guinua Aarona ‘enaia, ta natunao ‘edia, nadigega iauiauna ia onaona ‘emuia: asiata ‘e sebeni ‘u da sa‘udumedumedi.

³⁶ Ta asiata ‘e bweuna ‘e bweuna ‘ebwaeadaita bubuna to‘umalina manuna ‘ina bulomakau ‘u da ‘ebwaea ginua‘ebweu manuna: ta ‘ebetaria ‘u da gieesasena, ‘ena manuna ‘u ginua‘ebweu; ta ‘u da bunamina, be ‘u da etabuna.

³⁷ Asiata ‘e sebeni ‘u da ginua‘ebweu ‘ebetaria manuna, ta ‘u da etabuna: ta ‘ebetaria ‘i da etabu wawasae; to‘ase nai ‘ebetaria ‘i gitoona ‘i da tabu.

³⁸ Ta gete tauna ‘u da ‘ebwaea ‘ebetaria ‘enaia; lami ‘e rua ‘adi iakwara ‘ebweunamo asiata ta asiata tuta iauiauna.

³⁹ Lami ‘e bweuna ‘u da ‘ebwaea gonagonaia; ta lami ‘e ruena ‘u da ‘ebwaea asunuanuaia:

⁴⁰ Ta lami ‘e bweuna ma‘ieana palaua matagidarina epa ‘ana ‘upwaruena si ilienoenowena bunama tututuna iina ‘ana ‘upwa ‘e atana; ta oine iina ‘ana ‘upwa ‘e atana ‘ebwaeadaita numanuma manuna.

⁴¹ Ta lami ‘e ruena ‘u da ‘ebwaea ‘asunuanuaia, ta ‘ena ‘u da guinua nadigega gonagona ‘ana ‘ebwaeadaita palaua, ta nadigega ‘ana ‘ebwaeadaita numanuma, maina dibidibi manuna, ‘ebwaeadaita si bubuna ‘aweiega Ieoba ‘enaia.

⁴² Ta ‘i da ‘ebwaeadaita gabugabuna tuta iauiauna ‘imi epata‐tomota ‘edia anua egogona ‘ana ‘awaia Ieoba matanaia: tauna ‘ena ia da lobemu, be ‘ena ia da ona ‘emuia.

⁴³ Ta ‘enaia Iseraela tubunao ia da lobedi; ta Anua ‘i da etabuna ‘igu esaesa ‘enega.

⁴⁴ Ta anua egogona ia da etabuna, ‘ebetaria be: Aarona ta natunao me‘olotodi ia da etabudi, be si da guinua ‘eguia to taria ‘ina guinua ‘enaia.

⁴⁵ Ta Iseraela tubunao ‘edia ia da miami, ta ia da e ‘idi Eaubada.

⁴⁶ Ta si da mwaratoni ‘abo‘agu Ieoba ‘idi Eaubada, tauna ‘asa Aigupitoega ia ‘au‘ewedima, be ‘enega ia da miami ‘edia: ‘Abo‘agu Ieoba ‘idi Eaubada.