Si Apwesa 28 - Buki Tabu Lowaenei 1919

‘UPWA 28.

¹ Ta tasio Aarona, ta natunao me‘olotodi ma‘enao ‘u da me‘edi serabemuia, Iseraela tubunao ‘ediega, be ‘enega ‘i da guinua ‘eguia totaria ‘ina guinua ‘ena, tauna Aarona, Nadaba ta Abiu, Elea‘sara ta Itamara, Aarona natunao me‘olotodi.

² Ta ‘oama tabu ‘u da bubudi tasio Aarona manuna, esaesa manuna ta ‘ita bobo‘ana manuna.

³ Ta iauiaudi si ‘atesinasinapu, taudi iaruiarua sinasinapuiega ia loema‘edi, ‘edia ‘u da ona, be Aarona ‘ana ‘oama si da bubudi be si da etabuna, be ‘enega ‘i da guinua totaria ‘ina guinua ‘enaia.

⁴ Ta getedi ‘oama nidi si da bubudi; dona be, taraapwara be, ‘oama dudurana be, katu iomwaiomwarina be, peaula be, gadiwana be: ta ‘oama tabu si da bubudi tasio Aarona manuna, ta natunao me‘olotodi manudi, be ‘eguia ‘i da guinua to taria ‘ina guinua ‘enaia.

⁵ Ta gola si da ‘ewena, karakarawina be, papele be, bweabwearina be, kaleko matagidarina be.

⁶ Ta taraapwara si da bubuna golega, karakarawinega be, papele be, bweabwearina be, kaleko wasiwasina matagidarina be, toguinua panapana‘isina ‘ina guinua.

⁷ Kaleko tomwana ‘e rua ‘arana manuna si da tubwe ruedi ‘arena ta garuna; be ‘enega ‘i da tubwe.

⁸ Ta ‘ebepaima ionaiona ‘ai‘ailina, tauna ‘ena ‘i da miami, be ‘enega ‘i paimina, ‘i da nadigega ‘ina guinua ta ‘e bweuna kaleko tomwana nadigega; golega, karakarawinega, papele be, bweabwearina be, kaleko ionaiona matagidarina be.

⁹ Ta gurewa onikisa ‘e rua ‘u da ‘ewedi, ta Iseraela tubunao ‘adi esana ‘edia ‘u da ‘etoladi:

¹⁰ ‘Adi esanao ‘e sikisi gurewa ‘e bweuna ‘enaia, ta ‘e sikisi si tupwatupwa ‘adi ‘esanao mari gurewa ‘enaia, nadigega ‘idi tubua.

¹¹ To ‘etoladi gurewa ‘ina guinua ‘enega, we‘iwe‘iiaia ‘atua ‘ana ‘etoladi, gurewa ‘e rua nidi ‘u da ‘etoladidi, na‘ieana Iseraela tubunao ‘adi esanao: ‘u da bubudi be ‘ebesa‘u gola ‘edia ‘u da sa‘u gamwa‘usanedi.

¹² Ta gurewa nidi ‘e rua ‘u da sa‘u taraapwara ‘ina ‘ebesaara ‘arana ‘enaia, be si da ‘e gurewa ‘ebenua‘i‘isi Iseraela tubunao manudi: ta Aarona ‘adi esanao ‘i da ‘a‘aridi Ieoba matanaia ‘arana ‘e rua ‘edia ‘ebenua‘i‘isi manuna.

¹³ Ta ‘ebesa‘u gola ‘u da bubudi:

¹⁴ Ta aupa ‘e rua gola esasenega; nadigega barae ‘u da bubudi, guinua ionaiona ‘enega: ta aupa wasiwasina nidi ‘ebesa‘u gola ‘edia ‘u da sa‘udi.

¹⁵ Ta loina ‘ina ‘ailumaluma ‘u da bubuna, toguinua panapana‘isina ‘ina guinua; tara‘apwara ‘ana guinua nadigega ‘u da bubuna; golega, karakarawinega, papeleiega be, bweabwearinega be, kaleko ionaiona matagidarinega be, ‘u da bubuna.

¹⁶ Si da erererea esena e ‘ata ta girua; nimana ‘e bweuna ‘ana dudura, ta nimana ‘e bweuna ‘ana bababa.

¹⁷ Ta gurewa sa‘usa‘udi ‘ena ‘u da sa‘u rugu, raba gurewa ‘e ata: raba ‘e bweuna ‘i da saredia, topasa, gurewa tuiaiarina;

¹⁸ Ta raba ‘e ruena emeralida, sapaira, paku be;

¹⁹ Ta raba ‘e tonina iakina, agate, ta ametusa;

²⁰ Ta raba ‘e atana berula, ta onikisa, ta iasipa: ta ‘idi ‘ebesa‘u ‘edia si da sa‘udi gola gamwanaia.

²¹ Ta gurewa nidi si da nadigega Iseraela tubunao ‘adi esanao, ‘e twelu, ‘adi esanao nadigega; nimakusikusi ‘ana etoladiao nadigega, ‘e bweuna ‘e bweuna ‘ana esana nadigega, si da susu ‘e twelu manudi.

²² Ta ‘ailumaluma ‘enaia aupa barae nadigega ‘u da bubudi, guinua ionaiona gola esasena ‘enega.

²³ Ta ‘ailumaluma ‘enaia giimweiidi gola ‘e rua ‘u da bubudi, ta giimweiidi ‘e rua nidi ‘u da sa‘udi ‘ailumalumana matagaruna ‘e rua ‘edia.

²⁴ Ta aupa gola wasiwasidi ‘e rua ‘u da sa‘u giimweiidi ‘e rua ‘edia ‘ailumaluma ‘ina ‘ebelosa‘u ‘enaia.

²⁵ Ta aupa wasiwasidi ‘e rua ‘adi ‘ebelosa‘u ‘e rua ‘ebesa‘u gola ‘e rua ‘edia ‘u da sa‘udi, ta tara‘apwara ‘ana ‘ebesaarao tomwanao ‘edia ‘u da sa‘udi, manininega.

²⁶ Ta giimweiidi gola ‘e rua ‘u da bubudi, ta ‘ailumaluma matagaruna ‘e rua ‘edia ‘u da sa‘udi, tupitupina ‘enaia, tauna tara‘apwara ‘esena matanega gamwana.

²⁷ Ta giimweiidi gola ‘e rua ‘u da bubudi, ta tara‘apwara ‘ana ‘ebesaara tomwanao ‘agaraunaia ‘u da sa‘udi, esena matanaia, ‘ana ‘ebetubwe deinaia, tara‘apwara ‘ana taraiaina ionaiona ‘ai‘aila debanaia.

²⁸ Ta ‘ailumaluma nina si da taraiaina ‘ana giimweiiao ‘ediega tara‘apwara ‘ana giimweiina ma‘enao wasiwasi karakarawinega, be ‘enega tara‘apwara ‘ana ‘e taraiaina wasiwasi ‘ai‘ailena ‘ena ‘i da miami, ta ‘enega gea‘abo ‘ailumaluma ‘i da eli‘ami tara‘apwara ‘enega.

²⁹ Ta Aarona Iseraela tubunao ‘adi esanao ‘i da taramagae loina ‘ana ‘ailumaluma ‘enaia ‘atenaia, ‘ena esena tabu ‘ena ‘i rugu, ‘ebenua‘i‘isi ataia Ieoba matanaia.

³⁰ Ta loina ‘ana ‘ailumaluma ‘enaia Urima ta Tumima ‘ena ‘u da sa‘u; ta Aarona ‘atenaia si da miami, ‘ena ‘i rugu Ieoba matanaia: ta Aarona Iseraela tubunao ‘idi loina ‘i da taramage ‘ataia ‘atenaia Ieoba matanaia.

³¹ Ta tara‘apwara ‘ana ‘oama dudurana ‘u da bubuna karakarawinega maibo‘ana.

³² Ta gamwagamwanega gaula ‘u da sa‘u deba manuna: tupitupina guiguinua wasiwasina gaula ‘ena ‘i da mia sakowasiena, ‘atua tauna ‘i kotu tuiaiarina ‘ana gaula, be gea‘abo ‘i da esabu.

³³ Ta ‘ana dobe ‘enaia gemula ‘u da bubudi karakarawinega, papeleiega be, bweabwearinega be, ‘ana dobe ‘i da tabe sakowasiena; ta pate gola mwatuidia si tabe sakowasi:

³⁴ Pate gola ta gemula, pate gola ta gemula, ‘oama dudurana ‘ana dobe ‘i sakowasi.

³⁵ Ta ‘i da miamia Aarona ‘enaia sabi guinua: ta ‘enana si da nono ‘ena esena tabu ‘ena ‘i rugu Ieoba matanaia, ta ‘ena ‘i apwesama, be gea‘abo ‘i mwawasa.

³⁶ Ta gaeba bababana ‘u da bubuna gola esasenega, ta ‘ena ‘u da ‘etoladi, nimakusikusi ‘ana ‘etoladi nadigega, TABU IEOBA ‘ENAIA.

³⁷ Ta lesi karakarawina ‘ena ‘u da sa‘u, ta peaula ‘ena ‘i da miami; peaula matanaia ‘i da miami.

³⁸ Ta Aarona debasawanaia ‘i da miami, ta Aarona iage tabu ‘idi to‘umalina ‘i da ‘a‘aridi, tauna Iseraela tubunao si da etabuna ‘idi ‘ebwaeadaita tabu iauiaudi ‘edia; ta debasawanaia ‘ena ‘i da miami tuta iauiauna, be ‘enega Ieoba matanaia nua‘ole‘ole si da loba.

³⁹ Ta kotu ‘u da ionina ‘ebeguinua saisailina ‘enega kaleko matagidarinega, ta peaula ‘u da bubuna kaleko matagidarinega, ta gadiwana ‘u da bubuna, to eiara ‘ina guinua.

⁴⁰ Ta Aarona natunao me‘olotodi manudi kotu ‘u da bubudi, ta manudi gadiwana ‘u da bubudi, ta peaula ‘u da bubudi manudi, esaesa manuna ta ‘ita‐bobo‘ana manuna.

⁴¹ Ta tasio Aarona ‘ena ‘u da ‘e‘otena, ta natunao me‘olotodi ‘edia ma‘enao; ta ‘u da bunamidi, ta nimadi ‘u da loemae be si da taria, ta ‘u da etabudi, be ‘enega ‘eguia si da guinua to taria ‘ina guinua ‘enaia.

⁴² Ta tarausesa kaleko ‘u da bubudi ‘edia be mabubugewadi esiona si da bodena; tolobwadiega si da mwa‘uta ga bwadagadia;

⁴³ Ta si da miami Aarona ‘ena, ta natunao me‘olotodi ‘edia, ‘ena anua egogona ‘ena si rugu, nai ‘ena si mai ‘ebetaria deinaia be esena tabu ‘ena si guinua; be ‘enega gea‘abo to‘umalina si da ‘a‘ara, ta si mwawasa: tauna ‘i da ‘e loina ataia ‘enaia ta tubunao ‘edia murinaia.