Si Apwesa 27 - Buki Tabu Lowaenei 1919

‘UPWA 27.

¹ Ta ‘ebetaria ‘u da bubuna kaiwe akesiega, ‘ana dudura kiubita ‘e nima, ta ‘ana bababa kiubita ‘e nima; ‘ebetaria nina ‘i da erererea senanao e ‘ata: ta ‘ana ‘etosora kiubita ‘e teri.

² Ta tupitupina ‘e ata ‘edia kunanao ‘u da bubudi: kunanao si da nadigega ‘e bweuna; ta barasega ‘u da bodena.

³ Ta ‘ina gaeba ‘u da bubudi be karikau ‘ana ‘ebe‘ewa, ‘ana ‘ebesalao be, ‘ana basoniao be, ‘ana ‘esio ‘ana diluiao be, ‘ana ‘awe ‘ana gaebao be: ‘ana gaeba iauiauna ‘u da bubudi barasega.

⁴ Ta barasa saisailina lomasamasasarina ‘u da bubuna manuna; ta kainumu saisailina ‘enaia giimweiina barasa ‘e ata ‘u da bubudi tupitupina ‘e ata ‘edia.

⁵ Ta ‘ebetaria tupitupina ‘agaraunaia ‘ena ‘u da sa‘u, be ‘enega kainumu saisailina nina ‘i da mia rererea ‘ebetaria ‘ana upwaruena ‘enaia.

⁶ Ta ‘ewa‘ewa ‘u da bubudi ‘ebetaria manuna, ‘ewa‘ewa kaiwe akesiega, ta barasega ‘u da bodedi.

⁷ Ta ‘ewa‘ewa nidi si da e‘etoruguiedi giimweiidi ‘edia, ta ‘ewa‘ewa nidi ‘ebetaria senanao ‘e rua ‘edia si da miami, be ‘ana ‘ebe‘a‘ara.

⁸ Mwadareiega ma‘agomwagomwana ‘u da bubuna: na‘ieana u ‘itena ‘oeaia, nadigega ‘u da bubuna.

⁹ Ta anua‐tabenakele ‘ana ‘atamana ‘u da bubuna: esena iarasi ‘ena iarasi matanaia kaleko sanesanena si da miami ‘atamana manuna kaleko ionaiona matagidarinega ‘ana dudura kiubita ‘e wan anaredi ‘esena ‘e bweu manuna:

¹⁰ Ta ‘ana ‘ora si da ‘e tweniti, ta ‘ana gaula ‘e tweniti, barasega; ‘ora ‘adi ‘ebeloesaniao ta ‘adi ‘ebetubwe si da sileba ‘enega.

¹¹ Ta wate nadigega esena iaarata ‘ana dudura manuna kaleko sanesanena si da miami ‘ana dudura kiubita ‘e wan anaredi, ta ‘ana ‘ora ‘e tweniti, ta ‘adi gaula ‘e tweniti barasega; ta ‘adi ‘ebeloesanana ta ‘adi ‘ebetubwe sileba ‘enega.

¹² Ta ‘atamana ‘ana bababa manuna ‘esena ‘ebwaga ‘enaia kaleko sanesanena si da miami kiubita ‘e pipiti: ‘adi ‘ora ‘e teni, ta ‘adi gaula ‘e teni.

¹³ Ta ‘atamana ‘ana bababa bomatu ‘ana esena bomatu matanaia ‘i da kiubita ‘e pipiti.

¹⁴ Kaleko sanesanena esena ‘e bweuna manuna ‘i da kiubita ‘e pipitini: ‘adi ‘ora ‘e toi, ta ‘adi gaula ‘e toi.

¹⁵ Ta mariesena manuna kaleko‐sanesanena si da miami kiubita e pipitini: ‘adi ‘ora ‘e toi, ta ‘adi gaula ‘e toi.

¹⁶ Ta ‘atamana ‘ana ‘auboda manuna kaleko sanesanena ‘i da miami kiubita ‘e tweniti, karakarawinega, papele ta, bweabwearina ta, kaleko wasiwasina matagidarina, to eiara ‘ina guinua: ‘adi ‘ora ‘e ata, ta ‘adi gaula ‘e ata.

¹⁷ ‘Atamana ‘ana ‘ora iauiauna sakowasi si da tubwe sileba ‘enega; ‘adi ‘ebeloesanana silebega, ta ‘adi gaula barasega.

¹⁸ ‘Atamana ‘ana dudura ‘i da kiubita ‘e wan anaredi, ta ‘ana bababa ‘e pipiti esena iauiauna ‘edia, ta ‘ana ‘etosora kiubita ‘e nima, kaleko wasiwasina matagidarina, ta ‘adi gaula barasega.

¹⁹ Anua‐tabenakele ‘ana ‘ebeguinua iauiauna ‘ana guinua maibo‘ana ‘enaia, ta ‘ana ‘etoiaina iauiauna, ta ‘atamana ‘ana ‘etoiaina iauiauna, si da barasega.

²⁰ Ta Iseraela tubunao ‘edia ‘u da ona, ‘aene bunama olibe esasena si da me‘ena ‘emuia tututuna ‘etoma‘edana manuna, be maieare ‘i da sabesabelulu ga tuta iauiauna.

²¹ Anua ‘ebeegogona ‘enaia, ‘auboda guaunaia tauna ‘ebee‘ita matanaia, Aarona ta natunao me‘olotodi si da sa‘u ‘ai‘ailina asuinuenuega ga gonagonaia Ieoba matanaia: tauna ‘i da loina ataia ‘idi epata‐tomota ‘edia Iseraela tubunao manudi.