Si Apwesa 26 - Buki Tabu Lowaenei 1919

‘UPWA 26.

¹ Wate anua‐tabenakele ‘u da ‘abina ma‘ana ‘auboda kaleko ‘e teni; kaleko ionaiona matagidarina, karakarawina be, papele be, bweabwearina be, ma‘ana ierubima toguinua sinasinapuna ‘ana guinua ‘ediega ‘u da bubudi.

² ‘Auboda‐kaleko ‘e bweuna ‘e bweuna ‘ana dudura kiubita ‘e tweniti‐eta, ta ‘auboda‐kaleko ‘e bweuna ‘e bweuna ‘ana bababa kiubita e poa: ‘auboda‐kaleko iauiauna ‘adi ‘etopwapwa ‘e bweuna.

³ ‘Auboda‐kaleko ‘e nima si da tubwedi ‘e bweuna ‘e bweuna ‘enaia; ta wate ‘auboda‐kaleko ‘e nima si da tubwedi ‘e bweuna ‘e bweuna ‘enaia.

⁴ Ta losinebulu karakarawidi ‘u da bubudi ‘auboda‐kaleko ‘e bweu tupi ‘ebetubwe tupitupina ‘enaia; ta nadigega ‘auboda‐kaleko tupitupina tauna ‘ebelosa‘u ‘ana ‘ebetubwe ‘e ruena ‘enaia ‘u da bubu.

⁵ Losinebulu e pipiti ‘u da bubudi ‘auboda‐kaleko ‘e bweuna ‘enaia, ‘ta losinebulu ‘e pipiti ‘u da bubudi ‘auboda‐kaleko tupitupina tauna ‘ebetubwe ‘e ruena ‘ena ‘i miami; losinebulu nidi si da mia rererea matadia.

⁶ Ta ‘ebeiaina gola ‘e pipiti ‘u da bubudi, ta ‘auboda‐kaleko ‘u da tubwedi ‘e bweuna ‘e bweuna ‘enaia ‘ebegiekapu ‘ediega: ta anua‐tabenakele ‘i da e ‘e bweuna.

⁷ Ta ‘auboda gota unuununa ‘u da bubudi bwasa anua‐tabenakele ‘etanina manuna: ‘auboda ‘e elebeni ‘u da bubudi.

⁸ ‘Auboda ‘e bweuna ‘e bweuna ‘ana dudurana kiubita ‘e tati, ta ‘auboda ‘e bweuna ‘e bweuna ‘ana bababana kiubita ‘e poa: ‘auboda ‘e elebeni nidi ‘idi ‘etopwapwa ‘e bweunamo.

⁹ Ta ‘auboda ‘e nima ‘u da gietubwedi taudimo, ta ‘auboda ‘e sikisi taudimo, ta ‘auboda ‘e sikisi nina ‘u da sa‘u rua anua matanaia.

¹⁰ Ta losinebulu ‘e pipiti ‘u da bubudi ‘auboda ‘e bweuna tauna ‘ebelosa‘u tupitupina ‘ebetubwe ‘enaia, ta losinebulu ‘e pipiti ‘auboda tauna ‘ebelosa‘u tupitupina ‘ebetubwe ‘e ruena ‘enaia.

¹¹ Ta ‘etoiaina barasa e pipiti ‘u da bubudi, ta ‘etoiaina nidi losinebulu ‘edia ‘u da sa‘udi, ta anua ‘u da tubwena, be ‘enega ‘i da ‘e bweuna.

¹² Ta matana ‘i tabetabena tauna anua ‘ana bwasa ‘i tupwa, bwasa nina ‘ana ‘upwarua ‘i tupwanina, anua‐tabenakele guaunega ‘i da tabe.

¹³ Ta kiubita ‘e bweu sena, ta kiubita mariesena, tauna ‘i tupwanina anua ‘ana bwasao ‘idi dudura ‘enega ‘i tupwatupwa, ‘i da tabetabe anua‐tabenakele ‘ina esenao ‘edia gete esena nina ‘ena, ta ‘esena gote ‘ena, be ‘i da bodena.

¹⁴ Ta ‘auboda‘etanaia ‘u da bubuna anua manuna sipi‐me‘olotona bwarana si ‘e‘ureni bweabwearina, ta ‘auboda kulikuliaa bwarana ‘etanaia.

¹⁵ Ta mwadare anua‐tabenakele manuna ‘u da bubudi kaiwe akesia ‘enega, si da tooro.

¹⁶ Kaiwe ‘e bweuna ‘ana dudura kiubita ‘e teni, ta kaiwe ‘e bweuna ‘e bweuna ‘ana bababa kiubita ‘e bweu ta ‘upwarua.

¹⁷ Kaiwe ‘e bweuna ‘e bweuna ta meiadi ‘e rua, si da tubwe ruedi: iauiaudi nadigega ‘u da bubudi anua‐tabenakele ‘ana kaiwe iauiauna manudi.

¹⁸ Ta kaiwe ‘u da bubudi anua‐tabenakele manuna, kaiwe ‘e tweniti esena iarasi manuna iarasi ‘enaia.

¹⁹ Ta gaula sileba ‘e poti ‘u da bubudi kaiwe e tweniti ‘aredia: gaula ‘e rua kaiwe ‘e bweuna ‘arenaia meiana ‘e rua manudi, ta gaula ‘e rua mari kaiwe ‘arenaia meiana ‘e rua manudi:

²⁰ Ta anua‐tabenakele senana ‘e ruena manuna, iaarata ‘ana esenega, kaiwe e tweniti:

²¹ Ta ‘adi gaula sileba e poti; gaula ‘e rua kaiwe ‘e bweuna ‘arenaia, ta gaula ‘e rua mari kaiwe ‘ubunaia.

²² Ta anua‐tabenakele guauna ‘ebwaga ‘enaia kaiwe ‘e sikisi ‘u da bubudi.

²³ Ta kaiwe ‘e rua ‘u da bubudi anua‐tabenakele tupitupinao manudi guaunaia.

²⁴ Ta si da e rua ‘ubunaia, ta nadigega bubuna nina si da maibo‘ana ga debanaia giimweiena ‘e bweuna ‘enaia; gote nadigega si da ruarua manudi; taudi si da tupitupina ‘e rua manudi.

²⁵ Ta kaiwe ‘e eta si da miami, ta ‘idi gaula sileba, gaula ‘e sikitini; gaula ‘e rua kaiwe ‘e bweuna ‘ubunaia, ta gaula ‘e rua mari kaiwe ‘ubunaia.

²⁶ Ta kaiwe‐sa‘u‐barabara ‘u da bubudi kaiwe akesiega; ‘e nima anua‐tabenakele ‘ina esena ‘e bweu ‘ina kaiwe manudi,

²⁷ ta sa‘u‐barabara ‘e nima anua‐tabenakele mariesena ‘ina kaiwe manudi, ta sa‘u‐barabara ‘e nima anua‐tabenakele ‘ina esena guaunaia ‘ebwaga ‘enaia ‘ina kaiwe manudi.

²⁸ Ta sa‘ubarabara gamwagamwanaia kaiwe gamwagamwanidia ‘si da rubware ‘arena ga garuna.

²⁹ Ta kaiwe ‘u da lobodedi golega, ta ‘idi giimweiena gola wa da bubudi sa‘ubarabara ‘idi ‘ebesa‘u manudi: ta sa‘ubarabara ‘u da lobodedi golega.

³⁰ Ta anua‐tabenakele ‘u da gietooro na‘ieana bubuna nina ni‘atu ia e‘itemu ‘oeaia.

³¹ Ta loboda ‘u da bubuna karakarawinega be, papeleiega be, bweabwearinega be, kaleko wasiwasi matagidarina ‘enega be: ierubimega to guinua panapana‘isina ‘ina guinuega si da bubuna:

³² Ta ‘ora akesia e ‘ata si lobodedi golega ‘edia ‘u da losanena, ‘idi ‘ebetabe si da golega, gaula sileba ‘e ata ‘edia.

³³ Ta loboda nina ‘u da loesani ‘etoiaina ‘ubunidia, ta loboda nina gamwanaia ‘ebee‘ita ‘ina dedewaga ‘ena ‘u da me‘ena: ta loboda nina ‘emia ‘i da weara esena tabu ta esena tabu wawasae gamwagamwanaia.

³⁴ Ta ‘ebemia‐nua‘ole‘ole ‘u da sa‘u ‘ebee‘ita ‘ina dedewaga tabwanaia anua‐tabu‐wawasae ‘enaia.

³⁵ Ta tebeli ‘u da sa‘u loboda guaunaia, ta maiare tebeli matanaia anua‐tabenakele ‘ina esena iarasi ‘enaia: ta tebeli ‘u da sa‘u esena iaarata ‘enaia.

³⁶ Ta loboda ‘u da bubuna Anua ‘ina ‘awa manuna, karakarawinega, papeleiega be, bweabwearinega be, kaleko wasiwasi matagidarina ‘enega be, to gieiiara ‘ina guinua.

³⁷ Ta loboda nina manuna ‘ora akesia ‘e nima ‘u da bubudi, ta golega ‘u da lobodedi; ‘idi ‘ebetabe ‘i da golega; ta gaula barasa ‘e nima ‘u da ‘e‘ureni manudi.