Si Apwesa 25 - Buki Tabu Lowaenei 1919

‘UPWA 25.

¹ Ta Ieoba ‘i ona Mose ‘enaia, ‘i gwae,

² Iseraela tubunao ‘edia ‘u da ona, ‘ebwaeadaita ‘e bweuna manugu si da ‘ewa: tai ‘e bweuna ‘e bweuna ‘atena ‘i tagwarena ‘enega ‘agu ‘ebwaeadaita wa da ‘ewena.

³ Ta gete ‘ebwaeadaita ‘ediega wa da ‘ewai; gola be, sileba be, barasa be;

⁴ Karakarawina be, papele be, bweabwearina be, kaleko matagidarina be, gota uiauiana be;

⁵ sipi me‘olotodi bwaradi si ‘e‘urenina bweabwearina be, kulikuliaa bwaradi be, kaiwe akesia be;

⁶ Oila ma‘edana manuna be, mu‘ana oila ‘ebebunama manuna, ta maina bobo‘ana manuna be:

⁷ Gurewa onikisa, ta gurewa si da sa‘uiaina, tara‘apwara manuna, ta ‘ailumaluma manuna.

⁸ Ta anua tabu si da ‘abina ‘eguia; be ‘enega gamwagamwanidia ia da miami.

⁹ Nadigega iage iauiauna ia e‘itemu, anua ‘ana ma‘ama‘aiau, ta ‘ana gwegwe iauiauna ‘ana ma‘ama‘aiau, nadigega tuga wa da bubuna.

¹⁰ Ta dedewaga ‘e bweuna si da bubuna kaiwe akesiega: ‘ana dudura kiubita ‘e rua ta tupwana ‘upwa‐rua, ta ‘ana bababa kiubita ‘e bweuna ta tupwana ‘upwarua, ta ‘ana ketosora kiubita ‘e bweuna ta tupwana ‘upwarua.

¹¹ Ta gola esasenega ‘u da bodena, gamwana ta guauna ‘u da bodedi, ta golega tupitupina ‘u da bubu sakowasie ‘enaia.

¹² Ta gola mweimweidi ‘e ata ‘u da siwa manuna, ta ‘aena ‘e ata ‘edia ‘u da sa‘udi; ta mweimweidi ‘e rua ‘e bweu esena ‘ena ‘i da miami, ta wate giimweiedi ‘e rua mari esena ‘enaia.

¹³ Ta ‘ewa‘ewa ‘u da bubudi kaiwe akesiega, ta golega ‘u da bodedi.

¹⁴ Ta ‘ewa‘ewa nidi giimweiidi ‘edia ‘u da e‘etoruguiedi dedewaga naanaanaia, be dedewaga ‘ana ebe‘a‘ara.

¹⁵ ‘Ewa‘ewa dedewaga ‘ana giimweiiao ‘edia si da miami: gea‘abo ‘enega si da ‘ewa‘ewadi.

¹⁶ Ta dedewaga gamwanaia ‘ebee‘ita ia da ‘ebwaeio ‘ena ‘u da sa‘u.

¹⁷ Ta ‘auboda‐nua‘ole‘ole gola esasenega ‘u da bubuna: ‘ana dudura kiubita e rua ta tupwana ‘upwa‐rua, ta ‘ana bababa kiubita ‘e bweuna ta tupwana ‘upwa‐rua.

¹⁸ Ta ierubima e rua ‘u da bubudi golega; guinua tutu ‘enega ‘u da bubudi, ‘auboda‐nua‘ole‘ole matanao ‘e rua ‘edia.

¹⁹ Ta ieruba ‘e bweuna ‘u da bubuna ‘e bweu mata ‘enaia, ta ieruba ‘e bweu marimata ‘enaia: ‘auboda‐nua‘ole‘oleiega ierubima ‘u da bubudi matana ‘e rua ‘edia.

²⁰ Ta ierubima nidi papedi si da tuneiasi ‘etanaia, ‘auboda‐nua‘ole‘ole si da lobodebodena papediega, si mia e‘awatanesinesi; ‘auboda‐nua‘ole‘ole ‘enaia ierubima matadi si da ebaridi.

²¹ Ta ‘auboda‐nua‘ole‘ole ‘u da sa‘u dedewaga debanaia; ta ‘ebee‘ita ia da ‘ebwaeio be dedewaga ‘ena ‘u da sa‘u.

²² Ta ‘ena ia da lobaio, ta ia da onaona ma‘ieaio ‘auboda‐nua‘ole‘ole ‘etanega, ierubima ‘e rua, taudi ‘ebe‘e‘ita ‘ana dedewaga ‘ena si miami, gamwagamwanidia ediega, iage iauiauna manudi taudi ia da ‘ebwaemu ona ‘enega Iseraela tubunao ‘edia.

²³ Ta tebeli ‘u da bubuna kaiwe akesiega: ‘ana dudura kiubita ‘e rua, ta ‘ana bababa kiubita ‘e bweuna, ta ‘ana ‘etosora kiubita ‘e bweuna ta tupwana ‘upwa‐rua.

²⁴ Ta gola esasenega ‘u da bodena, ta golega ‘u da bubu sakowasie tupitupina.

²⁵ Ta tupitupina ‘i sakowasi ‘ana bababa nima ‘atua ‘u da bubu ‘enaia, ta tupitupina debanaia gola ‘u da bubu sakowasie.

²⁶ Ta giimweiidi gola ‘e ata ‘u da bubudi manuna, ta giimweiidi nidi ‘u da sa‘udi tupitupina ‘e ata taudi ‘aenao ‘e ata ‘edia si miami.

²⁷ Tupitupina serabenaia giimweiidi ‘ena si da miami, ‘ewa‘ewa idi ‘ebesa‘u be tebeli ‘ana ‘ebe‘a‘ara.

²⁸ Ta ‘ewa‘ewa ‘u da bubudi kaiwe akesiega, ta golega ‘u da bodedi, be ‘enega tebeli si da ‘a‘ari ‘ediega.

²⁹ Ta ‘ana gaeba ‘u da bubudi, ta ‘ana sipuni, ta ‘ana keiga, ta ‘ana keiga bababadi, be ‘u da siwa ‘ediega: gola ‘esasenega ‘u da bubudi.

³⁰ Ta palaua‐‘ebe‘ita tebeli ‘ena ‘u da sa‘u mataguia tuta iauna.

³¹ Ta maieare ‘u da bubuna gola esasenega: maieare nina ‘u da bubuna guinua ‘ebe sapi ‘enega, tuga ‘arena, ta bwadagana; ‘ina keigaiao, tupwanao, ta ‘ina kaiweseninao, si da bubudi ‘e bweuna iage ‘enega:

³² Ta narinao e sikisi si da apwesa ‘ina esenao ‘ediega; maieare narina ‘e toi ‘e bweu sena ‘enega, ta maieare narina ‘e toi mariesenega:

³³ Keiga ‘e toi si da bubudi saido‐seninao ‘atua narina ‘e bweuna ‘ena, tupwana ‘e bweu ta senina ‘e bweu; ta keiga ‘e toi si da bubudi saido‐seninao ‘atua mari nari ‘enaia, tupwana ‘e bweu ta senina ‘e bweu: nadigega narina ‘e sikisi maieareiega si apwesa manudi;

³⁴ Ta maieare ‘ena keiga ‘e ata si bubudi saido‐seninao ‘atua, tupwanao, ta seninao:

³⁵ Ta tupwana ‘e bweu narina ‘e rua ‘ubunaia ‘e bweuna iage ‘enega, ta tupwana ‘e bweu narina ‘e rua ‘ubunaia ‘e bweuna iage ‘enega, ta tupwana ‘e bweu narina ‘e rua ‘ubunaia ‘e bweuna iage ‘enega, narinao ‘e sikisi manudi maieareiega si apwesa.

³⁶ ‘Idi tupwanao ta ‘idi narinao si da e ‘e bweuna iage tuga: maibo‘ana guinua sapisapina ‘e bweuna gola esasenega.

³⁷ Ta ‘ana maieare ‘u da bubudi, ‘e sebeni; ta ‘ana maieareao si da loe‘abidi, be si da tu‘ema‘edana matanaia.

³⁸ Ta ‘ana ‘ebegiai, ta sumwana ‘ana gaeba, gola esasenega.

³⁹ Taleni gola esasena ‘e bweuna ‘enega si da bubuna, keiga iauiaudi gete ma‘edi.

⁴⁰ Ta u ‘ita be ‘u bubudi ‘idi ma‘ama‘aiau nadigega, tauna ia e‘ita ‘emuia ‘oeaia.