Si Apwesa 24 - Buki Tabu Lowaenei 1919

‘UPWA 24.

¹ Ta Mose ‘ena ‘i gwae, Ieoba ‘ena wa da tu‘ema, ‘oio, Aarona ta, Nadaba, Abiu ta, Iseraela ‘ina to‐guinuao ‘e sebeniti ta; ta ‘omi ‘edasoraia wa da bwagobwago:

² Ta Mose tebweuna ‘i da mai Ieoba serabenaia; ta taudi gea‘abo si da mai serabenaia; wate tomota gea‘abo si da tu‘ema ma‘enao.

³ Ta Mose ‘i mai ta Ieoba ‘ina ona iauiauna, ta loina iauiauna tomota ‘edia ‘i esimanedi: ta tomota iauiauna si ona limana ‘enadi ‘e bweunega, ta si gwae, Ona iauiauna taudi Ieoba ‘i oneonedi ‘a da guinua.

⁴ Ta Mose Ieoba ‘ina ona iauiauna i ‘etoladidi, ta gonagonaia ‘i tooro, ta ‘ebetaria ‘i bubuna ‘oea ‘agaraunaia, ta ‘ora ‘e twelu, nadigega Iseraela ‘ina susu ‘e twelu.

⁵ Ta Iseraela tubunao ‘idi tubuauiao i ‘etunedi, taudi ‘ebwaeadaita gabugabudi si ‘ebwaea, ta ‘ebwaeadaita‐guguia bulomakau si taria‘edi Ieoba ‘enaia.

⁶ Ta Mose rara ‘ana weara rua i ‘ewena, ta gaeba ‘edia ‘i siwena; ta rara ‘ana weara‐rua ‘ebetaria ‘ena ‘i loseuseula‘ena.

⁷ Ta ona‐‘upa‘upa ‘ana buki i ‘ewena, ta tomota tenadia ‘i sawena: ta si gwae, Iage iauiauna Ieoba ni‘atu ‘i oneonedi ‘a da guinua, ta ‘a da ematamatana.

⁸ Ta Mose rara i ‘ewena, ta tomota ‘edia ‘i loseuseula‘ena, ta ‘i gwae, Ona‐‘upa‘upa rarana wa da ‘itena, tauna Ieoba ni‘atu ‘i bubuna ma‘emi ona iauiauna getedi manudi.

⁹ Ga Mose ‘i tu‘e, Aarona ta, Nadaba, Abiu ta, Iseraela ‘ina tonuganao ‘e sebeniti ta:

¹⁰ Ta Iseraela ‘ina Eaubada si ‘itena; ta ‘aena ‘agaraunaia ‘atua gurewa sapire si sa‘u enonokwaikwaina, ta ‘atua garewa ‘arena tauna ‘ina esasena.

¹¹ Ta Iseraela tubunao ‘idi ‘inapwanao nimana nigea ‘edia ‘i sa‘u: ta Eaubada si ‘itena, ta si ‘e‘ai ta si numa.

¹² Ta Ieoba ‘i ona Mose ‘enaia, ‘Oea ‘ena ‘eguia ‘u da mai, ta ‘ena ‘u da miami: ta tebeli gurewa ia da ‘ebwaemu, ta loina be ona, taudi ni‘atu ia ‘etoladidi, be ‘enega ‘u da e‘ita‘edi.

¹³ Ta Mose ‘i tooro, ta ‘ina ‘ari‘ei Iosua: ta Mose ‘i tu‘e Eaubada ‘ina ‘oea ‘enaia.

¹⁴ Ta tonuganao ‘edia ‘i gwae, Bada wa da iamwaiamwama, ga ‘a mai ‘ila limanama ‘emia: ta, wa ‘ita, Aarona ta Ura ma‘emi: tauna ‘ina iage ‘e bweu, ‘edia ‘i da mai serabedia.

¹⁵ Ta Mose ‘oeaia ‘i tu‘e, ta poana ‘oea ‘i lobodebodena.

¹⁶ Ta Ieoba ‘ina esaesa ‘oea Sinai ‘ena ‘i miami, ta poana ‘i lobodebodena asiata e sikisi: ta asiata e sebeni nina Mose ‘ena ‘i bwau poana gamwanega.

¹⁷ Ta Ieoba ‘ina esaesa ‘ana ‘ita ‘atua ‘awesabelulu ‘ara‘arasina ‘oea debanaia Iseraela tubunao matadia.

¹⁸ Ta Mose poana gamwanaia ‘i rugu, ta ‘oeaia ‘i tu‘e: ta Mose asiata e poti ta guguioi e poti ‘oeaia ‘i miami.