Si Apwesa 23 - Buki Tabu Lowaenei 1919

‘UPWA 23.

¹ Simana kabokabo gea‘abo ‘u da ‘ewena: gea‘abo nimaio ‘u sa‘u to‐to‘umalina ma‘ieana be ‘u to‘ita nigea paruparuna.

² Gea‘abo pwaru ‘u da murimuriedi be wa guinua to‘umalina; wate gea‘abo ‘u da onaona ‘e bweu iage ‘ena be pwaru ‘edia ‘u da tauia dumaduma be loina ‘u gieboko;

³ wate gea‘abo tai gomabeso ‘u da gimi ‘awabobo‘anena ‘ina iage ‘enaia.

⁴ ‘Abo ‘amu tarauwara ‘ina bulomakau nai ‘ina ase ‘u da lobena ‘i tautauia gesi, ‘u da ‘ila limane ‘ai‘aila ‘enaia.

⁵ ‘Abo tauna ‘i guitoasemu ‘ina ase ‘u ‘itena i ‘eno‘eno ‘ana ‘a‘ara ‘agaraunaia, ta nuaio ‘aene gea‘abo ‘u da lemena, ‘u da leme ‘ai‘aila ma‘ieana.

⁶ ‘Imu gomabeso ‘ina iage ‘ena gea‘abo loina ‘u da giebokobokona.

⁷ Iage kabokabo ‘edasorega ‘u da miami; ta tauna nigea ‘i to‘umalina ta to‐paruparuna gea‘abo ‘u da loemwawasi: to‐to‘umalina gea‘abo ia da ‘awaparuparuiei.

⁸ Ta ‘ebwaeadaita gea‘abo ‘e bweu ‘u da ‘ewena: ‘ebwaeadaita taudi matadi bobo‘ana ‘i giekebodi ta ‘enega, ta to‐paruparuna ‘idi ona ‘i giebokodi.

⁹ To‘u‘umara gea‘abo ‘u da giedeedeedoni: to‘u‘umara ‘atena wa mwaratoni ta ‘enega, ‘omi wa to‘u‘umara ‘asa Aigupito ‘ena ta ‘enega.

¹⁰ Ta tuta iakwara ‘e sikisi ‘imu bwa‘a ‘u da dauni, ta ‘ina sinabwa ‘enega ‘u da egogona;

¹¹ Ta tuta iakwara ‘e sebeni nina ‘i da sa‘u be ‘i miami be ‘i iakwara; be ‘enega ‘imu tomota ‘idi gomabeso si da ‘e‘ai: ta to‘ase nai si pilisinena bomitawa si da ‘e‘ani. Nadigega ‘u da bubuna ‘imu baguraoine ‘enaia, ta ‘imu bagura‐olibe ‘enaia.

¹² Asiata ‘e sikisi ‘imu guinua ‘u da bubuna, ta asiata ‘e sebeni nina ‘enega ‘u da miadaita: be ‘enega ‘imu bulomakau ta ‘imu ase si da miadaita, ta ‘imu toguinua mewainena natuna, ta ‘imu to‘u‘umara, iawasidi si da bobo‘ana.

¹³ Ta iage iauiauna ‘ediega ‘emia ni‘atu ia oneone wa da nono‘i‘isi: ta mari eaubadao ‘adi esana gea‘abo wa ‘inana, wate gea‘abo ‘awamiega si da nonona.

¹⁴ Iakwara ‘e bweuna ‘enega tuta ‘e toi ‘u da losagari ‘eguia.

¹⁵ Palaua nigea lolebeninamo ‘ina sagari ‘u da ‘ita‘i‘isi: asiata ‘e sebeni palaua nigea lolebeninamo ‘u da ‘e‘ani, na‘ieana ia ona ni‘atu ‘emuia, tuta ‘ase‘aseiana ‘enega nawarae Abiba ‘enaia (‘Ena Aigupitoega ‘u mai ta ‘enega); ta gea‘abo ‘e bweu mataguia ‘i da apwesama kakaena:

¹⁶ Ta sesoi ‘ana sagari, ‘imu guinuao ‘idi gimiuanao, taudi ‘u lolelewanedi baguraia; ta egogona ‘ana sagari, iakwara ‘ana ‘ebelosaroniega, ‘ena ‘imu guinuao ‘u egogonedi bagurega.

¹⁷ ‘Imu ‘olotoiao iauiaudi tuta ‘e toi iakwara ‘enega si da apwesama ‘Inapwana Eaubada matanaia.

¹⁸ ‘Agu taria rarana gea‘abo ‘u da ‘ebwaea palaua lolebeninina ma‘ieana; wate ‘igu sagari iapana gea‘abo ‘i da miamiamasari ga gonagonaia.

¹⁹ ‘Imu bare‘u ‘ina gimi‐uana ‘e bweuna ‘u da me‘ena Ieoba ‘imu Eaubada ‘ina anua ‘enaia. Gota natuna gea‘abo sinana susuna ‘ena u ‘e‘ureni.

²⁰ U ‘ita, anelose ia ‘etunena matamuia, be ‘i da ‘ita‘i‘isio ‘edega, ta ‘i da me‘eio esena nina ni‘atu ia sa‘u ‘enaia.

²¹ Wa da nono‘i‘isina, ta ‘enana wa da nonona; gea‘abo wa da toona: ‘imi to‘umalina gea‘abo ‘i da kweuna; ‘agu esana ‘ena ‘i miami ta ‘enega.

²² Ta ‘abo ‘enana wa da nono ‘ai‘aila, ta iage iauiauna ia oneonedi wa da guinua; ga ia da etarauwara ‘amu tarauwarao ‘edia, ta to‐losaia taudi si losaia ‘emuia ‘edia.

²³ ‘Igu anelose matamuia ‘i da tauia ta ‘enega, ta ‘i da me‘emu me Amori be, me Eta be, me Perisi be, me Kanania be, me Ibite be, me Iebusi be, ‘edia: ta ia da ‘upwa‐iauledi.

²⁴ Gea‘abo ‘idi eaubadao ‘edia ‘u da kopukopu, nai ‘edia ‘u da guinua, nai ‘idi guinuao nadigega ‘u da bubu: ta ‘u da ula‐mwa‘utedi ‘ai‘aila, ta idi ‘oragurewa ‘u da lasa lelewanedi.

²⁵ Ta Ieoba ‘imi Eaubada ‘ena wa da guinua, ta ‘amu palaua, ta ‘amu boasi ‘i da giebobo‘anedi; ta le‘oasa gamwagamwanimuiega ia da ‘ewa‐iaulei.

²⁶ Nigea ‘e bweu ‘i da tupwasi, nai ‘i da me gagara, ‘imu ‘asa ‘enaia; ‘imu asiata ‘adi sawa ia da loegumwarina.

²⁷ ‘Agu didiga ia da ‘etunena matamuia, ta tomota iauiauna ‘edia ‘u da mai ia da gie‘atesa‘aridi, ta ‘amu tarauwarao iauiauna ia da giesanaguiguidi ‘emuia.

²⁸ Ta gumo ia da ‘etunena matamuia, taudi me Ibite, me Kanania, ta me Eta si da pa‘i iauledi matamuiega.

²⁹ Nigea ia da pa‘i iauledi matamuiega iakwara ‘e bweuna ‘enega; nai ‘asa ‘i waborebore, ta bomitawa si da eiau matamuia.

³⁰ Ma gidagidarinega ia da pa‘i iauledi matamuiega, ga ‘u da sinabwa, ta ‘asa u ‘ewena.

³¹ Ta ‘imu raba ia da sa‘u Ora Bweabwearinega ga me Pilisitia ‘idi ora ‘enaia, ta mitawega ga Boasi ‘awana ‘enaia; ‘asa ‘ana tomia ia da tagwaredi nimamia ta ‘enega; ta ‘u da pa‘i iauledi matamuiega.

³² Ta gea‘abo ‘u da ona‘upa‘upa ma‘edi, nai ‘idi eaubadao ma‘edi.

³³ Gea‘abo ‘imu ‘asa ‘ena si da miami, ‘abona nai ‘eguia si gieloegesiemi; ‘abo ‘idi eaubadao ‘edia ‘u guinua ta ‘enega, ‘emuia ‘i da e sikwa ‘ai‘aila.