Si Apwesa 22 - Buki Tabu Lowaenei 1919

‘UPWA 22.

¹ ‘Abo ‘e bweu tai bulomakau ‘i anawarina, nai sipi, ta ‘i loemwawasina, nai ‘i gimwaniena; ‘i da tamapu bulomakau ‘e paibe bulomakau ‘e bweuna manuna, ta sipi ‘e poa sipi ‘e bweuna manuna.

² ‘Abo to‐anawara si lobena ‘i rubwarena, ta si da ununa be ‘i da mwawasa, gea‘abo ‘e bweu rara manuna.

³ ‘Abo sinara ‘i sae ‘enaia, ga manuna rara si da e‘isa: ‘i da etamapu; ‘abo nigea ‘ina gwegwe, ‘ina anawara manuna si da gimwaniena.

⁴ ‘Abo iage ‘i anaanawarina si lobena maiawasina nimanaia, nai bulomakau, nai ase, nai sipi; ‘i da e‘isa ‘e rua.

⁵ ‘Abo tai ‘e bweu bagura nai oine ‘i da bubuna be si ‘e‘ani, ta ‘ina bulomakau ‘i giisinena, ta mari tai ‘ina bagura ‘ena i ‘e‘ai; ‘ina bagura tauna uana bobo‘ana wawasae, ta ‘ina oine tauna uana bobo‘ana wawasae, ‘ediega ‘i da e‘isa.

⁶ ‘Abo awe ‘i sabelulu, ta kwakwakwara ‘edia ‘i tauia, ga witi mabwagilidi, nai witi ‘i tootooro, nai bagura, si ‘arasina; tauna awe ‘ana toloe‘abi ‘i da e‘isa ‘ai‘aila.

⁷ ‘Abo ‘e bweu tai mani nai gwegwe ‘i sa‘u gosiana ‘enaia be ‘i da ‘ita‘i‘isi, ta tai nina ‘ina anuega si anawarina; ‘abo to‐anawara si lobena, ‘i da e‘isa ‘e rua.

⁸ ‘Abo to‐anawara nigea si loba, ga anua ‘ana toosi Eaubada ‘ena ‘i da doroma, be si da ‘ita nai nimana ‘i sa‘u gosiana ‘ina gwegwe ‘edia.

⁹ Iage ‘e bweuna ‘e bweuna ‘ana to‘umalina manuna, nai bulomakau manuna, ase manuna, sipi manuna, ‘oama manuna, iage loseloseanina ‘ana bubuna, ta ‘enega ‘e bweu ‘i gwae, Tauna gete, tai ruadi ‘aredi ‘i da mai Eaubada matanaia; tauna Eaubada i ‘awato‘umaliena ‘i da etamapu ruedi gosiana ‘enaia.

¹⁰ ‘Abo ‘e bweu tai ase, nai bulomakau, nai sipi, nai iobai ‘e bweuna, ‘i sa‘u gosiana ‘enaia, be i ‘ita‘i‘isi; ta ‘i mwawasa, nai ‘i esilae, nai si pa‘ina, ta nigea ‘e bweu i ‘itena:

¹¹ Ieoba ‘ina ona‘upa‘upa ‘i da mia ruarua gamwagamwanidia, nai nimana ‘i sa‘una gosiana ‘ina gwegwe ‘edia nai nigea; ta toni‐iage ‘i da iarena, ta gea‘abo ‘i da e‘isa.

¹² Ta ‘abo ‘enega si anawarina, toni‐iage ‘ena ‘i da e‘isa.

¹³ ‘Abo sabusabu lelewanina, ‘i da me‘ena ‘ebe‘ita manuna; iage sabusabuna gea‘abo ‘i e‘isa.

¹⁴ Ta ‘abo tai gosiana ‘enega ‘e bweu iage ‘i sidena, ta ‘i esilae, nai ‘i mwawasa, ‘ana toosi nigea ma‘ieana si miami, ‘i da e‘isa ‘ai‘aila.

¹⁵ ‘Abo ‘ana toosi ma‘ieana, gea‘abo ‘i da e‘isa; ‘abo iage e‘isa‘isana, ‘i mai ‘ana e‘isa manuna.

¹⁶ Ta ‘abo tai gomagweine nigea sawasawaiaina ‘i eonena ta ma‘ieana i ‘eno‘eno, oesiega ‘i da tamapu ‘ai‘aila be ‘i da mwanena.

¹⁷ ‘Abo tamana geanuana sinabwana ‘i da ‘ebwaea‘ena ‘enaia, ‘i da etamapu mani na‘ieana gomagweine ‘adi oesi.

¹⁸ Werabana gea‘abo ‘u tagwara be si bobo‘ana.

¹⁹ Tauna iobai ma‘ieana i ‘eno‘eno wa da loemwawasa ‘ai‘aila.

²⁰ Tauna ‘i taria mari eaubada ‘enaia, ta nigea Ieoba tebweuna tuga ‘enaia, wa da loesaoorina.

²¹ Ta to‘u‘umara gea‘abo ‘ena ‘u da bubuna geiogeioi, ta gea‘abo ‘u da didigena: ‘omi wa to‘u‘umara ‘asa Aigupito ‘ena ta ‘enega.

²² Kwabura gea‘abo wa da giedeedeedonina nai goama nigea tamanamo.

²³ ‘Abo ‘e bweu iage ‘enega ‘u giedeedeedonidi, ta si bwau gidarina ‘eguia, ‘idi bwau ia da nono ‘ai‘aila;

²⁴ Ta ‘igu gamwasoara ‘i da iaiiai, ta sisi‐saiega ia da loemwawasimi; ta mwanemiao si da elokwaburao, ta natumiao si da elopesieda.

²⁵ ‘Abo mani ‘u iotura ‘igu tomota ‘e bweuna ‘enaia ma‘ieaio wa miami tauna gomabeso, gea‘abo ‘u nadigega to‐iotura ‘enaia; ta gea‘abo tamapu ‘ena ‘u da sa‘u.

²⁶ ‘Abo gosiaio ‘ana ‘oama u ‘ewena we‘iwe‘iiaia manuna, ‘u da ‘ebwaea limana ‘enaia ‘ena sinara ‘i sugua;

²⁷ Tauna tebweuna ‘ana ‘aubodaboda, bwarana ‘ana ‘oama: mane ‘enega ‘i da ‘eno? Ta gete ‘i da apwesa, ‘ena ‘eguia ‘i bwau, ga ia da nono; ‘Abo‘agu to ‘atenua‘ole‘ole ta ‘enega.

²⁸ Gea‘abo Eaubada ‘u da ‘awato‘umaliena, nai ‘imu tomota ‘idi to loina ‘u da eliena.

²⁹ ‘Imu uana ‘ana sinabwana, ta ‘imu iage ‘u numedi, ‘u da ‘ebwaeadaita ta gea‘abo ‘u so‘iso‘i. ‘Imu tomatua me‘olotodi ‘eguia ‘u da ‘ebwaea.

³⁰ Nadigega ‘u da guinua ‘imu bulomakau ‘edia, ta ‘imu sipiao; asiata ‘e sebeni masinana ‘i da miami; asiata ‘e etanina ‘eguia ‘u da ‘ebwaea‘ena.

³¹ Ta wa da e tai tabu ‘eguia: ta ‘enega gea‘abo esio ‘i sabusabuna bomitawa ‘ediega ‘enega ‘u da ‘e‘ai; wa da ‘ulena kedewa ‘edia.