Si Apwesa 21 - Buki Tabu Lowaenei 1919

‘UPWA 21.

¹ Ta gete loina nidi ‘u da sa‘u matadia.

² ‘Abo ‘e bweu toguinua goma Eberu ‘u gimwani ‘emuia, iakwara ‘e sikisi ‘i da guinua: ta e sebeni nina ‘i da apwesa daita li‘ali‘amina.

³ ‘Abo ‘i ruguma tebweuna, ‘i da apwesa tebweuna tuga: ‘abo ‘i ai, ga mwanena ‘i da apwesa ma‘ieana.

⁴ ‘Abo ‘ina ‘inapwana mwanena i ‘ebwaena, ta natunao me‘olotodi nai mewainedi ‘ena ‘i enatunedi; mwanena ta natunao ‘ina ‘inapwana ‘ina tomota, ta tauna ‘i da apwesa tebweuna tuga.

⁵ Ta ‘abo toguinua ‘i ona ‘ai‘aila, ‘Igu ‘inapwana ia obobomena, mwanegu be, natuguao be; gea‘abo ia apweapwesa li‘ali‘amigu:

⁶ Ga ‘ina ‘inapwana ‘i da me‘ena Eaubada ‘enaia, ta ‘auboda ‘ena ‘i da me‘ena, nai ‘auboda ‘ana ‘ora ‘enaia; ta ‘ina ‘inapwana tenana ‘i da ‘etobwarena ‘ebe‘etobwarenega; ta ‘ena ‘i da guinua ‘ataia.

⁷ Ta ‘abo ‘e bweu tai natuna me wainena ‘i gimwaniena be ‘i e toguinua, gea‘abo ‘i da apwesa toguinua me‘olotodi nadigega.

⁸ ‘Abo nigea ‘i bobo‘ana ‘ina ‘inapwana matanaia, tauna ni‘atu ‘i sawaeaiena ‘enaia, ga ‘i da tagwarena be si da e‘isa: gimwaniena tomota to‘u‘umara ‘edia gea‘abo ‘i da guinua, ‘i bubuna kabokabo ‘enaia ta ‘enega.

⁹ Ta ‘abo ‘i sawaeaiena natuna ‘enaia, ‘ena ‘i da guinua natunao mewainedi ‘ana bubuna ‘atua.

¹⁰ ‘Abo wate ‘e bweu waine i ‘au‘ewa ‘enaia; ‘ana masura, ‘ana ‘oama, ta ‘ina ai ‘ana bubuna, gea‘abo ‘i da giimwa‘ute.

¹¹ Ta ‘abo iage getedi ‘e toi nigea ‘i guinua ‘enaia, ga ‘i da apwesa daita, ta nigea ‘ina maninamo.

¹² Tauna tai ‘i ununa, ga ‘enega ‘i mwawasa, si da loemwawasina.

¹³ Ta ‘abo tai nigea i ‘enokwaia, ta Eaubada ‘i tagwarena nimanaia; ga esena ‘e bweuna ia da aseiena be ‘ena ‘i da dena.

¹⁴ Ta ‘abo tai ‘i mai ma‘ina nuanua gosiana ‘enaia, sabi ununa kaboega; ‘igu ‘ebetariega ‘u da ‘ewena, be ‘i da mwawasa.

¹⁵ Ta tauna tamana, nai sinana ‘i ununa, wa da loemwawasa‘ai‘ailina.

¹⁶ Ta tauna tai i ‘ipwarina, ta ‘i gimwaniena, nai ‘abo si lobena nimanaia, wa da loemwawasa‘ai‘ailina.

¹⁷ Ta tauna tamana, nai sinana ‘i eliena, wa da loemwawasa‘ai‘ailina.

¹⁸ Ta ‘abo tai si e‘upwa, ta ‘e bweu ‘e ruena ‘i ununa gurewega, nai nimanega, ta nigea ‘i mwawasa, ta ‘ebe‘eno ‘ena i ‘enoia:

¹⁹ ‘Abo ‘i tooro limana, ta ‘ina gunega ‘i lopilidadana, ga tauna ‘i ununa ‘i da bobo‘ana: ta ‘ina tuta ‘i loseena manuna ‘i da e‘isa, ta ‘i da lemena be ‘i da bobo‘ana ‘ai‘aila.

²⁰ Ta ‘abo ‘e bweu tai ‘ina toguinua me‘olotona, nai mewainena, ‘i ununa keweliweliliega, ta nimanega ‘i mwawasa; si da e‘isa ‘ai‘aila ‘enaia.

²¹ Ta, ‘abo asiata ‘e bweu nai ‘e rua ‘i miami, ga gea‘abo si da e‘isa ‘enaia; tauna ‘ina mani ta ‘enega.

²² Ta ‘abo tai si ‘e e‘upwa, ta waine ‘eu‘euwanina si ununa, ga uana ‘i loseena, ta nigea wate ‘e bweu ‘ina to‘umalina muriega: ‘i da etamapu, na‘ieana waine mwanena ‘ena ‘i da sa‘u; ta ‘i da tamapu na‘ieana to‐loinao si da ona.

²³ Ta ‘abo to‘umalina ‘i muria, ga ‘u da ‘ebwaea iawasina iawasina manuna,

²⁴ Mata mata manuna, sara sara manuna, nima nima manuna, ‘ae ‘ae manuna,

²⁵ Gabu gabu manuna, kiiakiiama kiiakiiama manuna, sapi sapi manuna.

²⁶ Ta ‘abo tai ‘ina toguinua matana i ‘aupisarina, nai ‘ina toguinua mewainena matana, ta ‘i gieto‘umaliena; ‘i da tagwarena be ‘i da tauia daita matana manuna.

²⁷ Ta ‘abo ‘ina toguinua me‘olotona sarana i ‘aubwage iaulena, nai ‘ina toguinua mewainena sarana; ‘i da tagwarena be ‘i da tauia daita sarana manuna.

²⁸ Ta ‘abo bulomakau tai nai waine ‘i badina, ga si mwawasa, bulomakau wa da lo‘ibwe‘ibwena, ta esiona gea‘abo si da ‘e‘ani; ta toni bulomakau ‘i da bobo‘ana.

²⁹ Ta ‘abo bulomakau nina ‘ina bubuna lowa tomota ‘i badibadi, ta si simana ‘ana toosi ‘enaia, ta nigea i ‘etobodena, ta ‘enega tai nai waine ‘i loemwawasina; bulomakau si da lo‘ibwe‘ibwena, ta ‘ana toosi wate si da loemwawasa‘ai‘ailina.

³⁰ ‘Abo ‘ana e‘isa si sa‘ui, ga to‘ase nai ‘ena si sa‘ui ‘i da ‘ebwaea iawasina ‘ana e‘isa manuna.

³¹ Nai tai natuna me‘olotona, nai mewainena ‘i badina, loina nadigega gete si da guinua ‘enaia.

³² ‘Abo bulomakau toguinua me‘olotona nai toguinua mewainena ‘i badina; ‘idi ‘inapwana ‘ena sekeli sileba e tati ‘i da ‘ebwaea, ta bulomakau si da lo‘ibwe‘ibwena.

³³ Ta ‘abo tai gaula ‘i gigegena, nai ‘abo tai gaula ‘i tai ta nigea i ‘aubodena, ta bulomakau nai ase ‘ena ‘i be‘u,

³⁴ Gaula ‘ana toosi ‘i da etamapu bobo‘ana; mani ‘i da ‘ebwaea ‘adi toosi ‘enaia, ta bulomakau mwawamwawasina tauna ‘ina iage.

³⁵ Ta ‘abo tai ‘e bweu ‘ina bulomakau mari tai ‘ina bulomakau ‘i ununa, ga ‘i mwawasa; ga bulomakau maiawasina si da gimwani, ta ‘ana e‘isa si da ‘upwa rua; ta mwawamwawasina wate si da ‘upwarua.

³⁶ Nai ‘abo si mwaratoni ‘aene bulomakau ‘ina bubuna lowa ‘i badibadi, ta ‘ana toosi nigea i ‘au‘aubodena; ga ‘i da etamapu ‘ai‘aila bulomakau bulomakau manuna, ta mwawamwawasina tauna ‘ina iage.