Si Apwesa 20 - Buki Tabu Lowaenei 1919

‘UPWA 20.

¹ Ta Eaubada ona iauiauna getedi ‘i eonena, ‘i gwae,

² ‘Abo‘agu Ieoba ‘imu Eaubada, tauna ‘asa Aigupitoega i ‘au‘ewemu, ioniionidi ‘idi anuega.

³ Gea‘abo wate ‘e bweu ‘imu Eaubada, tebweugu.

⁴ Gea‘abo tokwarui daiagina ‘emuia ‘u da bubuna, nai maamaaiau ‘e bweu nadigega ‘e bweu iage garewa lo‘etana ‘enaia, nai bare‘u lo‘ubuna ‘enaia, nai ora bare‘u ‘ubunaia ‘enaia;

⁵ Gea‘abo ‘edia ‘u da bwagobwago, nai ‘edia ‘u da guinua: ‘Abo‘agu Ieoba ‘imu Eaubada ‘abo‘agu Eaubada e‘ipi‘ipi ta ‘enega, tamadiao ‘idi to‘umalina ia e‘isa natudiao ‘edia, epata‐tomota ‘etonina ‘enaia ta ‘eatana ‘enaia taudi si guitoasegu ‘edia.

⁶ Ta tausanao si obobomegu ta ‘igu ona si ‘ita‘i‘isidi ia ‘atenua‘ole‘oleiedi.

⁷ Ieoba ‘imu Eaubada ‘ana esana gea‘abo u ‘inana besobeso; Ieoba tauna ‘ana esana i ‘inana besobeso gea‘abo ‘i da ‘awabobo‘anena.

⁸ Asiata sabate ‘u da nua‘i‘isina, be ‘u da ‘etabuna.

⁹ Asiata ‘e sikisi ‘u da guinua, ta ‘imu guinua iauna ‘u da guinuedi:

¹⁰ Ta asiata ‘e sebeni nina ‘i sabate Ieoba ‘imu Eaubada ‘enaia: ‘ena gea‘abo ‘e bweu guinua ‘u da guinua, ‘oio, nai natuio me‘olotona, nai natuio me wainena, ‘imu toguinua me‘olotona, nai ‘imu toguinua mewainena, nai ‘imu bulomakau, nai ‘imu to‘u‘umara ‘imu ‘asa gamwanaia ‘i miami:

¹¹ Asiata ‘e sikisi ‘enega Ieoba garewa ta bare‘u ‘i mweruruidi, ora, ta iage iauiauna ‘edia si miami, ta asiata ‘e sebeni nina ‘i miadaita: ta ‘enega Ieoba asiata sabate ‘i ‘awabobo‘anena, ta ‘i etabuna.

¹² Tamaio be sinaio ‘u da ‘amaiabedi: be ‘enega ‘amu tuta si da dudurana ‘asa nina Ieoba ‘imu Eaubada i ‘ebwaemu ‘enaia.

¹³ Gea‘abo ‘u da loemwawasi.

¹⁴ Gea‘abo ‘u da loelata.

¹⁵ Gea‘abo ‘u da anawara.

¹⁶ Gosiaio gea‘abo ‘u da e‘ewa kabokaboena.

¹⁷ Gosiaio ‘ina anua gea‘abo ‘u da iato‘ai, gosiaio mwanena gea‘abo ‘u da iato‘ai, nai ‘ina toguinua me‘olotona, nai ‘ina toguinua mewainena, nai ‘ina bulomakau, nai ‘ina ‘ase, nai gosiaio ‘ina iage ‘e bweuna.

¹⁸ Ta tomota iauiauna wepararao be, namarao be, ioguli ‘enana be, ‘oea i ‘asu‘asu be, si ‘itedi: ta ni‘atu tomota si ‘itena, ga si loniu, ta si tooro ‘edasoraia.

¹⁹ Ta si ona Mose ‘enaia, ‘Oio ‘u da ona ‘emaia, ta ‘a da nono: ta gea‘abo Eaubada ‘i da ona ‘emaia, nai ‘a da mwawasa.

²⁰ Ta Mose ‘i ona tomota ‘edia, Gea‘abo wa ‘atesa‘ara: Eaubada ‘i mai sabi toomi ta ‘enega, ta ‘aene ‘ana matauta matamia ‘i da miami, be ‘enega gea‘abo wa da loegesi.

²¹ Ta tomota si tooro ‘edasoraia, ta Mose guguioi ‘ubwa‘ubwa ‘ena Eaubada ‘i miami ‘ena ‘i doro.

²² Ta Ieoba ‘i ona Mose ‘enaia, Gete nadigega ‘u da ona Iseraela tubunao ‘edia, Taumi ni‘atu wa ‘itena ia onaona ma‘emi garewega.

²³ Gea‘abo mari eaubadao wa bubu ma‘ieagu; eaubadao sileba, nai eaubadao gola, gea‘abo wa bubu ‘emia.

²⁴ ‘Ebetaria bwa‘a ‘u da bubuna ‘eguia, ta ‘ena ‘imu ‘ebwaeadaita gabugabudi ‘u da taria, ‘imu ‘ebwaeadaitao guguia, ‘imu sipiao, ta ‘imu bulomakau: esena ‘e bweuna ‘e bweuna ‘ena ‘agu esana ‘ana nua‘i‘isi ia da sa‘u ‘ena ia da mai ‘emuia ta ia da ‘awabobo‘aneio.

²⁵ Ta ‘abo ‘ebetaria gurewa ‘eguia ‘u da bubuna, gea‘abo gurewa sapisapina ‘enega ‘u bubu: ‘abo ‘imu ‘ebesapi ‘ena ‘u sa‘una, ni‘atu ‘u gieto‘umaliena.

²⁶ Wate gea‘abo waisanega ‘u da tu‘e ‘igu ‘ebetaria ‘enaia, be ‘enega mabubugewaio gea‘abo ‘ena ‘i da apweapwesa.