Si Apwesa 2 - Buki Tabu Lowaenei 1919

‘UPWA 2.

¹ Ta tai ‘e bweuna ‘ina susu me Lebi, ‘i tauia ta waine ‘e bweuna me Lebi natuna ‘i aina.

² Ta waine nina i ‘euwana, ta natuna me‘olotona ‘i enatunena: ta ni‘atu i ‘itena gomagomabwainina, ga ‘i kwaiena ga nawarae ‘e toi.

³ Ta ni‘atu nigea wate ‘i da kwaiena, ga manuna waga kodo ‘i bubuna, ta ‘i pomena bwada nuanega ta bwada pa‘arinega; ta goama gamwanaia i sa‘una, ta kodo ‘edia boasi tupitupinega ‘i sa‘una.

⁴ Ta nuuna ‘edasoraia ‘i tootooro, be ‘i da ‘itena nai to‘ase ‘i da apwesa ‘enaia.

⁵ Ta Parao natuna me wainena ‘i mwa‘utama sabi esiwe boasi ‘awa ‘enaia; ta ‘ina gomagweineao boasi tupitupinaia si lopilidadana; ta waga kodo ‘edia i ‘itena, ta ‘ina ‘ari‘ei i ‘etunena be ‘i da me‘ena.

⁶ Ta ‘i gigegena, ga goama i ‘itena: ta, wa ‘ita, goama ‘i dedoi. Ta i ‘atenuaoleoleiena, ta ‘i ona, Gete ‘e bweu me Eberu natudiao ‘ediega.

⁷ Ga nuuna ‘i ona Parao natuna me wainena ‘enaia, Ia da tauia nai ta me Eberu ‘idi iine to‐amwamwa ‘e bweuna ia da bwauiena ‘emuia, be ‘enega goama ‘i da amwamwena manuio?

⁸ Ta Parao natuna me wainena ‘i eonena, ‘U da tauia. Ta gomagweine ‘i tauia ta goama sinana ‘i bwauiena.

⁹ Ta Parao natuna me wainena ‘ena ‘i ona, Goama gete ‘u da ‘au‘ewa, ta manugu ‘u da ‘amwamwena, ta ‘amu e‘isa ia da ‘ebwaeio. Ta waine goama ‘i ‘au‘ewena, ta i ‘amwamwena.

¹⁰ Ta goama ‘i sinabwa, ta i ‘au‘ewenama Parao natuna me wainena ‘enaia, ta tauna ‘i natuna me‘olotona. Ta ‘i eesena Mose, ta ‘i ona, Boasiega ia ioiioina ta ‘enega.

¹¹ Ta asiata gotedi gete ‘i apwesa, ni‘atu Mose ‘i sinabwa, ga ‘i apwesa tasinao ‘edia, ta ‘idi ‘a‘ara ‘i duneduneiedi: ta goma Aigupito ‘e bweuna i ‘itena goma Eberu ‘i unuina, tasinao ‘ediega ‘e bweuna.

¹² Ta ‘i lo‘itadadana, ta ni‘atu i‘ita nigea ‘e bweu tai, ga goma Aigupito nina ‘i ununa, ta kaukau ‘ena ‘i sa‘u kwaiena.

¹³ Ta asiata ‘e ruena ‘i apwesa, ta, wa ‘ita, tai ‘e rua me Eberu si e‘upwa; ta tauna ‘i loegesi ‘ena ‘i ona, To‘ase manuna ‘amu ‘arauna ‘u unuunu?

¹⁴ Ta ‘i ona, Iaita ‘i aseiemu ‘u e ‘inapwana ta to loina ‘emaia? ‘aene ‘u da loemwawasigu, na‘ieana goma Aigupito ‘u ununa? Ta Mose ‘i matauta, ta ‘i gwae, Iage nina ni‘atu ‘i apwesa ‘ai‘aila.

¹⁵ Ta Parao ni‘atu iage gete ‘i nonona, ga ‘i ebe‘ebesa be Mose ‘i da ununa. Ta Mose Parao matanega ‘i dena, ta ‘asa Midiana ‘ena ‘i miami: ta boasi gaula ‘ena ‘i miatoa.

¹⁶ Ta Midiana ‘ina to‐taria natunao me wainedi ‘e sebeni: ta si mai ta boasi si goni, ta gaeba si loemae be tamadi ‘ina sipiao si da enumedi.

¹⁷ Ta to‘ita‘i‘isi‐sipi si mai ta si pa‘idi: ta Mose ‘i tooro ta ‘i lemedi, ta ‘idi sipiao ‘i enumedi.

¹⁸ Ta ni‘atu si mai tamadi Reuela ‘enaia, ga ‘i gwae, Mwa‘adega wa lomaninima batua?

¹⁹ Ta si gwae, Goma Aigupito ‘e bweuna to‘ita‘i‘isi‐sipi nimadiega i ‘etoseiema, ta wate manuma boasi ‘i gonina, ta sipi ‘i enumedi.

²⁰ Ta natunao me wainedi ‘edia ‘i ona, Ta tauna mwa‘o? To‘ase manuna tai nina wa pilisinena? Wa da bwauiena, be ‘enega masura ‘i da ‘e‘ai.

²¹ Ta Mose nuanuana tai nina ma‘ieana ‘i da miami: ta Sipora natuna me wainena Mose ‘ena i ‘ebwaea‘ena.

²² Ta me‘olotona ‘i enatunena, ta ‘i eesena Gerisoma: ‘i gwae ta ‘enega, ‘Abo‘agu ‘asa to‘u‘umara ‘ena ia miami.

²³ Ta asiata iauna gotedi ‘ediega gete ‘i apwesa, Aigupito ‘ana king ‘i kwaia: ta Iseraela tubunao si eiawasilagalaga iona manuna, ta si bwaubwau, ta ‘idi bwau ‘i tu‘ema Eaubada ‘enaia iona manuna.

²⁴ Ta Eaubada ‘idi dedoi ‘i nonona, ta Eaubada ‘ina ona‘upa‘upa Aberaamo ma‘ieana, Isaako ma‘ieana, Iakobo ma‘ieana, ‘i nua‘i‘isina.

²⁵ Ta Eaubada Iseraela natunao ‘edia i ‘ita, ta Eaubada ‘i mwaratonidi.