Si Apwesa 19 - Buki Tabu Lowaenei 1919

‘UPWA 19.

¹ Iseraela tubunao ‘asa Aigupitoega si apwesawa nawarae ‘etonina ‘enega, Asiata gote si mai Sinai mitawina ‘enaia.

² Ta ni‘atu Repidimega si tauia, ta si mai Sinai mitawina ‘enaia, ga si ‘abi anua mitawa ‘enaia; ta nada Iseraela si miami ‘oea matanaia.

³ Ta Mose ‘i tu‘e Eaubada ‘enaia, ta Ieoba ‘oega ‘i bwau ‘enaia, ‘i gwae, Gete nadigega ‘u da ona Iakobo ‘ina susu ‘enaia, ta Iseraela tubunao ‘edia ‘u da simana;

⁴ iage ia guinua me Aigupito ‘edia ni‘atu wa ‘itena, ta ia ‘a‘arimi magisubu papedi ‘edia, ta ia ‘au‘ewemima ‘eguia.

⁵ Gete ta ‘enega, ‘abo ‘enagu wa da nono ‘ai‘aila, ta ‘igu ona‘upa‘upa wa ‘ita‘i‘isi, ga wa da egwegwe bobo‘ai‘ailina ‘eguia tomota iauiaudi ‘ediega: gabura maibo‘ana ‘igu iage ta ‘enega:

⁶ Ta wa da e‘ebeloina totariao ‘eguia, ta ‘asa tabu. Gete ona nidi ‘u da oneone Iseraela tubunao ‘edia.

⁷ Ta Mose ‘i mai ta tomota ‘idi ‘inapwanao manudi ‘i bwau, ta matadia ona gete iauiaudi ni‘atu Ieoba ‘i ona ‘enaia matadia ‘i sa‘una.

⁸ Ta tomota iauiaudi si ona limana rererea, ta si gwae, Iage iauiauna Ieoba ‘i oneonena ‘a da guinua. Ta Mose tomota ‘idi ona ‘i e simanedi Ieoba ‘enaia.

⁹ Ta Ieoba ‘i ona Mose ‘enaia, U ‘ita, ‘emuia ia mai poana badonega, be ‘enega tomota si da nono ‘ena ia onaona me‘ieaio, ta wate si da iaremu ‘ataia. Ta Mose tomota ‘idi ona ‘i esimanedi Ieoba ‘enaia.

¹⁰ Ta Ieoba ‘i ona Mose ‘enaia, Tomota ‘edia ‘u da tauia, ta batua ta gibua‘i ‘u da etabuiedi, ta ‘adi ‘oama si da ‘utui,

¹¹ Ta asiata ‘etonina manuna si da mia ‘ai‘aila: asiata ‘etonina ta ‘enega Ieoba ‘i da mwa‘utama tomota iauiaudi matadia ‘oea Sinai ‘enaia.

¹² Ta raba ‘u da sa‘u ‘oabu‘oabuie tomota ‘edia, ‘u da gwae, Wa da ‘ita‘i‘isimi, be gea‘abo wa da tu‘e ‘oeaia, nai tupitupina wa da gitoo: tauna ‘oea ‘i gitoona si da loemwawasi ‘ai‘ailina:

¹³ Gea‘abo ‘e bweu ‘i da gitoona, ta si da lo‘ibwa‘ibwa ‘ai‘ailina, nai gitega si da esasa‘a; nai bulomakau nai tomota, gea‘abo ‘i da bobo‘ana: ‘ena ioguli ‘i dedo dudurana, ‘ena si da tu‘ema ‘oeaia.

¹⁴ Ta Mose ‘oega ‘i mwa‘utawa tomota ‘edia, ta tomota ‘i etabuiedi; ta ‘adi ‘oama si e‘utudi.

¹⁵ Ta ‘i gwae tomota ‘edia, Asiata ‘etonina manuna wa da mia‘ai‘aila: gea‘abo waine ‘ena wa dorodoro deinaia.

¹⁶ Ta asiata ‘etonina gete ‘i apwesa, ni‘atu ‘i gonagona, ga wepararaiao ta namarao si apwesa, ta poana badona ‘oeaia; ta ioguli ‘enana tosinabwasana; ta tomota iauiauna ‘asa ‘ena si miami si dedera.

¹⁷ Ta Mose tomota i ‘au‘ewedima ‘asega be Eaubada si da loba; ta ‘oea digidiginaia ‘ubunaia ‘ena si tooro.

¹⁸ Ta ‘oea Sinai i ‘asu‘asu maibo‘ana, Ieoba ‘ena ‘i mwa‘uta aweiega ta ‘enega: ta ‘asuna ‘i tu‘etu‘e umura ‘asuna ‘atua, ta ‘oea maibo‘ana ‘i dedera sinabwana.

¹⁹ Ta ni‘atu ioguli ‘enana ‘i sinabwa ta ‘i sinabwa, ga Mose ‘i ona, ta Eaubada ‘ena ‘i onalimana ‘enana ‘e bweunega.

²⁰ Ta Ieoba ‘i mwa‘utama ‘oea Sinai ‘enaia, ‘oea debana ‘enaia: ta Ieoba Mose ‘i bwauiena ‘oea debana ‘enaia; ta Mose ‘i tu‘ewa.

²¹ Ta Ieoba ‘i ona Mose ‘enaia, ‘U da mwa‘uta, tomota ‘u ba‘edi, nai si rubwarenama Ieoba ‘ena sabi dunedune, ta ‘ediega iaudi si da saoora.

²² Ta to‐tariao wate, taudi Ieoba ‘ena si mai serabena, si da tabuiedi taudimo, nai Ieoba ‘i rubwarena ‘edia.

²³ Ta Mose ‘i ona Ieoba ‘enaia, Tomota nigea kapekapena si da tu‘ema ‘oea Sinai ‘enaia: ‘oio ‘u ba‘ema ta ‘enega, ‘u gwae, ‘Oea ‘ena wa da loraba sakowasi, ta ‘ana tabu wa da sa‘u.

²⁴ Ta Ieoba ‘i eonena, ‘U da tauia, ‘u da mwa‘uta; ta ‘u da tu‘ema, ‘oio, ta Aarona ma‘ieaio: ta to‐tariao be tomota gea‘abo si da rubwarenama sabi tu‘ema Ieoba ‘enaia, nai ‘i da rubware ‘edia.

²⁵ Nadigega Mose ‘i mwa‘utawa tomota ‘edia, ta ‘edia ‘i simana.