Si Apwesa 18 - Buki Tabu Lowaenei 1919

‘UPWA 18.

¹ Ga Ietoro, Midiana ‘ina totaria, Mose bwasiana, iage iauiauna Eaubada ‘i guinua Mose manuna ‘i nonona, ta ‘ina tomota Iseraela manudi, ‘aene Ieoba Iseraela i ‘au‘ewenama Aigupitoega.

² Ta Ietoro, Mose bwasiana, Sipora, Mose mwanena, i ‘au‘ewena, ‘ana ‘etunena murinaia,

³ ta natunao me‘olotodi ‘e rua; ‘e bweuna ‘ana esana Gerisoma; ‘i gwae ta ‘enega, ‘Abo‘agu sugalagala ‘asa to‘u‘umara ‘enaia:

⁴ Ta ‘e ruena ‘ana esana Eliesa; ‘i gwae ta ‘enega, Tamagu ‘ina Eaubada tauna ‘agu leme, ta Parao ‘ina sisi‐saiega i ‘etoseegu:

⁵ Ta Ietoro, Mose bwasiana, ‘i mai natunao me‘olotodi ta mwanena ma‘enao Mose ‘enaia mitawa ‘ena ‘i miami ‘enaia, Eaubada ‘ina ‘oea ‘enaia:

⁶ Ta Mose ‘ena ‘i gwae, ‘Abo‘agu bwasiaio Ietoro ‘emuia ia mai, ta mwaneio, ta natunao me‘olotodi ‘e rua ma‘enao.

⁷ Ta Mose ‘i apwesa bwasiana sabi lobana, ta ‘i kopukopu, ta i ‘awamuina; ta si enaida ‘e bweuna ‘e bweuna mwa‘adega ‘idi miami; ta anua ‘ena si rugu.

⁸ Ta Mose ‘i simana bwasiana ‘enaia iage iauiauna Ieoba ni‘atu ‘i guinua Parao ‘ena ta me Aigupito ‘edia Iseraela manuna, ‘elo‘uia iauiauna ‘i apwesa ‘edia ‘edega, ta mwa‘adega Ieoba i ‘etoseedi.

⁹ Ta Ietoro ‘i guausoara bubuna bobo‘ana iauiauna Ieoba ‘i guinua ni‘atu Iseraela ‘ena manuna, i ‘etoseedi me Aigupito nimadiega ta ‘enega.

¹⁰ Ta Ietoro ‘i gwae, Ieoba ta da ‘awabobo‘anena, tauna ni‘atu i ‘etoseemi me Aigupito nimadiega, ta Parao nimanega; tauna ni‘atu tomota i ‘etoseedi me Aigupito nimadi ‘agaraunega.

¹¹ Gete ‘enega ia mwaratoni ‘aene Ieoba ‘i sinabwa wawasae eaubada iauiaudi ‘edia: tamo, iage nina ‘enega si bubuna gagasa ‘edia.

¹² Ta Ietoro, Mose bwasiana, ‘ebwaeadaita gabugabuna ta tariao i ‘ewedi Eaubada manuna: ta Aarona ‘i mai, ta Iseraela ‘ina ‘inapwanao iauiaudi, be si ‘e‘ai masura Mose bwasiana ma‘enao Eaubada matanaia.

¹³ Ta ulisi gete ‘i apwesa, Mose ‘i miatoa be tomota ‘i da loinedi: ta tomota Mose deinaia si tootooro gonegonega ga asunuanuaia.

¹⁴ Ta ni‘atu Mose bwasiana iage iauiauna ‘i guinua tomota ‘edia i ‘itena, ga ‘i gwae, To‘ase iage gete ‘u guinua tomota ‘edia? To‘ase manuna tebweuio ‘u miatoa, ta tomota iauiauna deimuia si tootooro gonegonega ga asunuanuaia?

¹⁵ Ta Mose ‘i ona bwasiana ‘enaia, Tomota si mai ‘eguia ta ‘enega sabi ‘enaida Eaubada ‘enega:

¹⁶ ‘Ena ‘e bweu iage, ‘eguia si mai; ta tai be gosiana gamwagamwanidia ia loina, ta Eaubada ‘ina loina tomwana, ta ‘ina loina sinabwadi ia e‘ita ‘edia.

¹⁷ Ta Mose bwasiana ‘i ona ‘enaia, Iage ‘u guinua nigea ‘i bobo‘ana.

¹⁸ ‘U da ‘oaperu ‘ai‘aila, ruarua ‘oio, ta ‘imu tomota gete ma‘ieaio wa miami: iage nina ‘i mwauwawasae ‘emuia; nigea ‘u ewaiwai be ‘u guinuena taumumo.

¹⁹ Gete ‘enega ‘enagu ‘u da nonona, nuena ia da ‘ebwaemu, ta Eaubada ‘i da miami ma‘ieaio: ‘oio tomota manudi ‘u da Eaubada‐‘ena, ta iageao ‘u da me‘edi Eaubada ‘enaia:

²⁰ Ta loina tomwanao ta loina sinabwadi ‘u da e‘ita ‘edia, ta ‘eda ‘enega si da tauia ‘u da e‘ita ‘edia, ta guinua si da guinuei.

²¹ Wate tomota iauiaudi ‘ediega tai waiwaidi ‘u da ‘esinuedi, taudi Eaubada si matautena, ona ‘ai‘aila ‘ina tai, ‘ewa nigea paruparuna si da guitoasa; ta nadigega ‘etanidia ‘u da sa‘udi, be tausana ‘adi to‐loinao, anaredi ‘adi to‐loinao, pipiti ‘adi to‐loinao, teni ‘adi to‐loinao:

²² Ta tomota si da loinedi tuta iauiauna: ta gete ‘i da miami, iage sinabwana iauna ‘emuia si da me‘ena, ta iage gidarina iauna si da loina tautaudimo: gote nadigega ‘i da kapekapeana manuio, ta mwau si da ‘a‘ari ma‘emuao:

²³ ‘Abo iage gete ‘u da guinua, ta Eaubada nadigega ‘i eonaio, ga ‘u da ewaiwai be ‘u da ‘arama‘i‘ita, ta tomota iauna gete wate ‘idi esena ‘ena si da tauia guguiega.

²⁴ Ta ‘enega Mose bwasiana ‘enana ‘i nonona, ta iage iauiauna ‘i oneonena ‘i guinuena.

²⁵ Ta Mose tai waiwaidi i ‘esinuedi Iseraela maibo‘anega, ta ‘i bubudi debadi tomota ‘edia, tausanao ‘adi to‐loinao, anaredi ‘adi to‐loinao, pipiti ‘adi to‐loinao, teni ‘adi to‐loinao.

²⁶ Ta tomota si loinedi tuta iauiauna: iage pa‘arina si me‘edi Mose ‘enaia, ta iage gidarina iauna si loina taudimo.

²⁷ Ta Mose bwasiana ‘i tagwarena be ‘i da tauia; ta ‘i tauia ‘ina asa tauna ‘enaia.