Si Apwesa 15 - Buki Tabu Lowaenei 1919

‘UPWA 15.

¹ Ga Mose ta Iseraela tubunao wari gete si wariena Ieoba ‘enaia, ta si gwae, si onaona, Ieoba ‘ena ia da wari, ni‘atu ‘i tu‘e wawasae: Ose ta ‘ina togeru ni‘atu i ‘uledi oraia.

² Ieoba ‘igu waiwai ta ‘igu wari, Ta Tauna ni‘atu ‘agu ‘etoseana: Gete ‘igu Eaubada, ta ia da tupuna; Tamagu ‘ina Eaubada, ta ia da gitu‘eiena.

³ Ieoba saia ‘ana tai: Ieoba ‘ana esana.

⁴ Parao ‘ina wagalisilisiao ta ‘ina boda ni‘atu i ‘uledi oraia: Ta ‘ina to‐nuganao ‘esi‘esinuadi ni‘atu si darara Ora Bweabwearina ‘enaia.

⁵ Ni‘u si ‘aubodedi: Ni‘uia si mwa‘uta gurewa ‘atua.

⁶ Ieoba ie, ‘ataio ‘i esaesa waiwai ‘ena, Ieoba ie, ‘ataio tarauwara i ‘e‘auwearidi.

⁷ Ta ‘imu bobo‘ai‘ailina ‘ana sinabwa ‘enega taudi ‘emuia si tootooro u ‘ula mwa‘utedi: ‘Imu gamwasoara u ‘ulena, ga i ‘arasidi sumwana ‘atua.

⁸ ‘Ubusu gaugaulio ‘idi wedilia ‘enega ora ‘i lokoeakoea. Murua si tooro paruparu ‘atua sa‘uepopo; Ni‘u si patu ora ‘atenaia.

⁹ Tarauwara ‘i gwae. Ia da muria, Ia da ‘ewa, gwegwe ia da ‘eguiai: ‘Igu gewagewana ‘i da maa ‘edia; ‘Igu sisi‐saia ia da lisilolona, nimagu ‘i da giesaooridi.

¹⁰ ‘Imu iagilega ‘u toa, ora ‘i siwataotaodi. Si darara kainumu ‘ebemwau ‘atua ora waiwai ‘edia.

¹¹ Ieoba ie, iaita ‘oio nadigega eaubadao ‘edia? Iaita ‘oio nadigega, esaesa bubuna esasena ‘enaia, Didiga tuputupu ‘edia, iage tosinabwasadi ‘u guinuedi?

¹² ‘Ataio ‘u iasitotona, Bare‘u ‘i tonedi.

¹³ ‘Oio ‘imu ‘atenua‘ole‘oleiega tomota taudi manudi u ‘e‘isa ‘u nuganedi: ‘Imu waiwaiiega u ‘au‘ewedi ‘imu ‘ebemia tabu ‘enaia.

¹⁴ Tomota si nonona, ga si dededera: Elo‘uia goma Pilisitia si giiaidi.

¹⁵ Ga Edoma ‘ina ‘inapwanao nuadi ‘i owana; Moaba ‘ina toewaiwai, dedera ‘i giiaidi: Goma Kanania iauiaudi si doga.

¹⁶ ‘Atesa‘ara ta matauta ‘edia si be‘u; Nimaio ‘ina sinabwana ‘enega si miaenono gurewa ‘atua; Ga ‘imu tomota si taona, Ieoba Ie. Ga tomota taudi u ‘ewedi si da taona.

¹⁷ ‘U da ‘au‘ewedima, ta ‘imu esena ‘ina ‘oea ‘ena ‘u da asodi, Esena nina, Ieoba ie, tauna ni‘atu ‘u mweruruina be ‘ena ‘u da mia, Esena tabu, Ieoba ie, tauna nimaio si giepa‘ara.

¹⁸ Ieoba ‘i da loina tuta ataia ta tuta ataia.

¹⁹ Parao ‘ina ose si rugu oraia ma‘ina wagalisilisiao ta ma‘ina togeruiao, ta Ieoba ora ‘ina boasi ‘edia ‘i me‘e limedi; ta Iseraela tubunao bwa‘a iadaiadana ‘ena si tauia gamwagamwanega.

²⁰ Ta Miriama paropita mewainena, Aarona nuuna, sinaa i ‘ewena nimanega; ta iine iauiaudi si muriena ma ‘idi sinaa ta si ‘eo‘eosi.

²¹ Ta Miriama ‘edia ‘i onalimana. Ieoba ‘ena wa da wari, tauna ni‘atu ‘i tu‘e wawasae ta ‘enega; Ose ta ‘ana togeruiao ni‘atu i ‘uledi oraia.

²² Ta Mose Iseraela ‘i nuganediwa Ora Bweabwearinega, ta si tauiawa mitawa Sura ‘enaia; ta asiata ‘e toi si tautauia mitawaia, ta nigea ‘e bweu boasi si lobaloba.

²³ Ta ni‘atu si mai Mara ‘enaia, ga Mara ‘ana boasiao nigea kapekapeana ‘enega si da numa, dareredi ta ‘enega: ta ‘enega si eesena Mara.

²⁴ Ta tomota si onaolilisana Mose ‘enaia, si gwae, To‘ase ‘a da numa?

²⁵ Ta Ieoba ‘ena ‘i bwau; ta Ieoba kaiwe ‘e bweu ‘i e‘itena, ta boasi ‘edia i ‘ulena, ta boasi si dibidibi. Gote ‘ena loina ta loina tomwana ‘i bubuna manudi, ta gote ‘ena ‘i toodi;

²⁶ Ta ‘i gwae, ‘Abo Ieoba ‘imu Eaubada ‘enana ‘ena ‘u da nono waiwai, ta iage paruparuna matanaia ‘u da guinua, ta ‘ina ona ‘edia ‘u da nono, ta ‘ina loina ‘u da ‘ita‘i‘isidi, ga le‘oasa, taudi me Aigupito ‘edia ia sa‘u, gea‘abo ‘emuia ia da sa‘u: ‘Abo‘agu Ieoba tauna ‘i giebobo‘anemu ta ‘enega.

²⁷ Ta si mai Elima ‘enaia, ‘ena boasi wewerupwa ‘e twelu si miami, ta kaiwe magimagi ‘e teri sikoa ta teni: ta nada boasi deidi si miami.