Si Apwesa 14 - Buki Tabu Lowaenei 1919

‘UPWA 14.

¹ Ta Ieoba ‘i ona Mose ‘enaia, ‘i gwae,

² Iseraela tubunao ‘edia ‘u da ona, ‘aene si da ‘ilawa ta Pi‐airota matanaia si da miami, Migadola ta ora ta gamwagamwanaia, Baala‐sepona matanaia: miaparuparuna ‘enaia wa da miami ora deinaia.

³ Ta Parao ‘i da ona Iseraela tubunao manudi, Si kwanikwani esena nina ‘enaia, mitawa ni‘atu ‘i lobodebodedi.

⁴ Ta Parao ‘atena ia da giewaiwai, ta ‘i da muriedima; ta ‘agu amaiaba ia da ‘ewa Parao ‘enega, ta ‘ina boda maibo‘ana ‘enega; ta me Aigupito si da mwaratoni ‘aene ‘Abo‘agu Ieoba. Ta si guinua nadigega.

⁵ Ta si simana Aigupito ‘ana king ‘enaia ‘aene tomota ni‘atu si dena: ta Parao ta ‘ina ‘ari‘eiao nuadi ‘i ebunina tomota ‘edia, ta si gwae, To‘ase gete ta guinua, Iseraela ‘idi guinua ‘edaia ta giisinedi?

⁶ Ta ‘ina wagalisilisi ‘i sa‘u, ta ‘ina tomota i ‘au‘ewedi ma‘enao:

⁷ ta wagalisilisi ‘esi‘esinuadi e sikisi anaredi i ‘ewedi, ta Aigupito ‘ana wagalisilisiao iauiauna, ta to loinao si nuganedi iauiaudi.

⁸ Ta Ieoba Parao Aigupito ‘ana king ‘atena ‘i giewaiwaina, ta Iseraela tubunao ‘i pili muridiega: Iseraela tubunao si apwesa nima gilagatega ta ‘enega.

⁹ Ta me Aigupito si pilimuridiega, Parao ‘ina ose ta ‘ina wagalisilisi iauiaudi, ‘ina togeruoseao be, ‘ina bodasaiao be, ta si apwesa ‘edia ora deinaia si miami, Pi‐airota deinaia, Baala‐sepona matanaia.

¹⁰ Ta ni‘atu Parao ‘i dorodoro serabedia, Iseraela tubunao si ‘ita tu‘e, ta, wa ‘ita, me Aigupito si tautauia muridiega: ta si ‘atesa‘ara sinabwana: ta Iseraela tubunao Ieoba ‘ena si bwau.

¹¹ Ta Mose ‘ena si ona, Nigea nai ‘ari‘ari Aigupito ‘ena, ta ‘enega u ‘au‘ewema be ‘a da mwawasa mitawaia? To‘ase manuna nadigega ‘imu bubuna ‘emaia, ga ‘u me‘ema Aigupitoega?

¹² Gete nigea nai ona nina ‘a oneone ‘emuia Aigupito ‘ena, ‘a gwae, ‘U da sa‘uma, be me Aigupito ‘edia ‘a da guinua? I bobo‘ana ‘emaia ta ‘enega me Aigupito ‘edia ‘a da guinua, ta gea‘abo ‘a da mwawasa mitawaia.

¹³ Ta Mose ‘i ona tomota ‘edia, Gea‘abo wa da matauta, wa da tooromo, ta Ieoba ‘ina ‘etoseana wa da ‘ita, tauna ‘i da guinua manumi batua: me Aigupito nidi taudi ni‘atu wa ‘itedi batua, gea‘abo wate wa da ‘italimedi ga tuta ataia ta ‘enega.

¹⁴ Ieoba ‘i da losaia manumi, ta wa da enono.

¹⁵ Ta Ieoba ‘i ona Mose ‘enaia, Toase manuna ‘u bwau ‘eguia? Iseraela tubunao ‘edia ‘u da ona, be si da tauiawa.

¹⁶ Ta ‘imu keweliwelili ‘u da gilagasi, ta nimaio ‘u da iasitotona ora debanaia, ta ‘u da ‘auweara ruena: ta Iseraela tubunao si da tauia ora gamwagamwanega bwa‘a iadaiadana ‘enega.

¹⁷ Ta ‘Abo‘agu, ‘u ‘ita, me Aigupito ‘atedi ia da giepatu, ta si da rugu muridiega: ta ‘igu ‘amaiaba ia da ‘ewena Parao ‘enega, ta ‘ina boda maibo‘ana ‘enega, ‘ina wagalisilisi ‘ediega, ta ‘ina togeruoseao ‘ediega.

¹⁸ Ta me Aigupito si da mwaratoni ‘aene ‘Abo‘agu Ieoba, ‘ena ‘igu ‘amaiaba ia ‘ewena Parao ‘enega, ‘ina wagalisilisi ‘ediega, ta ‘ina togeruoseao ‘ediega.

¹⁹ Ta Eaubada ‘ina anelose, tauna Iseraela ‘ina ‘ebemia matanaia ‘i tauia, ‘i logara ta muridiega ‘i tauia; ta ‘orapoana ‘i logarama matadia, ta ‘i tooro muridiega:

²⁰ Ta ‘i mai ga Aigupito ‘ina ‘ebemia ta Iseraela ‘ina ‘ebemia ta gamwagamwanaia; ta poana nina ‘i miami ta guguioi nina, ta ‘i giema‘edana boiboi: ta ‘e bweuna nigea ‘i mai ‘e ruena serabenaia boiboi maibo‘anega.

²¹ Ta Mose nimana ‘i iasitotona ora debanaia; ta Ieoba ora ‘i gi‘ilena bomatu pa‘arinega boiboi maibo‘ana ‘enaia, ta ora ‘i bubuna be ‘i da e bwa‘a iadaiadana, ta ora ‘i weara ruena.

²² Ta Iseraela tubunao ora gamwagamwanega si tauia bwa‘a iadaiadana ‘enega: ta ora ‘i pita rueruedi ataidiega, ta gegeumidiega.

²³ Ta me Aigupito si ‘epa‘ia, ga muridiega si rugu ora gamwagamwanaia, Parao ‘ina ose iauiaudi, ‘ina wagalisilisiao, ta ‘ina togeruoseiao.

²⁴ Ta ‘ita‘i‘ita ‘ana tuta gonagonaia gete ‘i apwesa, Ieoba ‘ora‐awe ta ‘orapoana ‘ediega Aigupito ‘ina boda ‘edia i ‘ita apwesa, ga me Aigupito ‘idi boda ‘i gie‘ate‐sa‘aridi.

²⁵ Ta ‘idi wagalisilisi ‘aedi ‘i egigewena, ta ‘enega si loina mwaumwauiedi: ta ‘enega me Aigupito si gwae, Iseraela matanega ta da dena; Ieoba manudi ‘i losaia me Aigupito ‘edia ta ‘enega.

²⁶ Ta Ieoba ‘i ona Mose ‘enaia, Nimaio ‘u da iasitoto ora debanaia, be ‘enega ora si da loepopo limana me Aigupito ‘edia, ‘idi wagalisilisiao ‘edia, ta ‘idi togeruoseao ‘edia.

²⁷ Ta Mose nimana ‘i iasitotona ora debanaia, ta ‘ena gonagona ‘i apwesa ga ora i ‘ila ‘ina waiwai ‘enaia; ta me Aigupito si denadena matanaia; ta Ieoba me Aigupito i ‘ula mwa‘utedi ora gamwanaia.

²⁸ Ta ora si ‘ila, ga wagalisilisi si ‘e‘aubodedi, ta togeruoseiao, Parao ‘ina boda maibo‘ana si rugurugu muridiega ora ‘enaia; nigea ‘e bweu ‘edia ‘i miami:

²⁹ Ta Iseraela tubunao bwa‘a iadaiadana ‘ena si tautauia ora gamwagamwanega; ta ora ‘i pita rueruedi ‘ataidiega, ta gegeumidiega.

³⁰ Nadigega Ieoba Iseraela i ‘etoseena asiata gote me Aigupito nimadiega; ta Iseraela me Aigupito si ‘itedi si mwawasa ora dabaraia.

³¹ Ta Iseraela guinua sinabwana tauna Ieoba ‘i guinuena me Aigupito ‘edia, si ‘itena ta tomota Ieoba si ‘amaiabena: ta Ieoba ‘ena si iareiare, ta Mose ‘ina toguinua ‘enaia.