Si Apwesa 13 - Buki Tabu Lowaenei 1919

‘UPWA 13.

¹ Ta Ieoba ‘i ona Mose ‘enaia, ‘i gwae,

² To gimi tubua iauiaudi ‘eguia wa da etabudi, to‘ase nai ‘ebetubua ‘i gigegena Iseraela tubunao ‘edia, tai ‘enega be bulomakau ‘enega: ‘igu iage.

³ Ta Mose ‘i ona tomota ‘edia, Asiata gete wa da nua‘i‘isi, tauna ‘enega Aigupitoega wa apwesama, ioniionidi ‘idi anuega; nima waiwaiiega Ieoba esena gete ‘enega i ‘au‘ewemi ta ‘enega: gea‘abo palaua malebeni wa ‘e‘ani.

⁴ Asiata gete wa tauiawa nawarae Abiba ‘enega.

⁵ Ta gete ‘ena Ieoba ‘i da ‘au‘ewemi me Kanania ‘idi ‘asa ‘enaia, me Eta be, me Amori be, me Ibite be, me Iebusi be, taudi ‘i ona‘upa‘upa‘edi tamamiao ‘edia ‘aene ‘i da ‘ebwaemu, ‘asa ‘i daudau susu ta oni ‘ediega, ga guinua gete ‘u da bubuna nawarae gete ‘ena.

⁶ Asiata ‘e sebeni palaua nigea malebeninamo ‘u da ‘e‘ani, ta asiata ‘e sebeni nina ‘i da sagari Ieoba ‘enaia.

⁷ Palaua nigea malebeninamo si da ‘e‘ai ‘asiata ‘e sebeni ‘ediega; ta gea‘abo ‘e bweu palaua malebenina si da ‘ita ‘emuia, wate gea‘abo lebeni si da ‘ita ‘emuia, ‘imu raba maibo‘adi ‘edia.

⁸ Ta asiata gote ‘enega natuio me‘olotona ‘ena ‘u da simana, ‘u da gwae, Gete iage nina ‘i apwesa tauna Ieoba manugu ‘i guinua ta ‘enega ‘ena Aigupitoega ia apwesama.

⁹ Ta ‘i da we‘iwe‘iiaia ‘emuia nimaio ‘enaia, ta ‘ebenua‘i‘isi manuna mataio gamwagamwanidia, be ‘enega Ieoba ‘ina loina ‘awaio ‘ena ‘i da miami: nima waiwaiiega Ieoba i ‘au‘ewemu Aigupitoega ta ‘enega.

¹⁰ Loina gete ‘u da ‘ita‘i‘isi ‘ana tuta ‘enaia iakwara ga iakwara.

¹¹ Ta ‘ena Ieoba ‘i da ‘au‘ewemu ‘asa Kanania ‘enaia, na‘ieana ‘i ona‘upa‘ups ‘emuia ta tamamiao ‘edia, ta ‘i da ‘ebwaea‘ena ‘emuia,

¹² Ga iauiaudi ‘ebetubua si gigegena ‘u da sa‘u dumedumedi Ieoba ‘enaia, wate ‘imu iage iauna to gimi tubua bulomakau ‘enega si mai; me‘olotodi si da Ieoba ‘ina iage.

¹³ Ta ase ‘ina tomatua ‘u da tamapu gota natuna ‘enega; ta ‘abo nigea ‘u da e‘isai, ga ‘otona ‘u da gilasena: ta tai ‘ina tomatua iauna natumuao me‘olotodi ‘edia ‘u da e‘isa.

¹⁴ Ta ‘ena natuio me‘olotona tuta ‘i memai ‘enega ‘i eonaio, ‘i gwae, To‘ase gete? ga ‘u da ona ‘enaia, Nima waiwaiiega Ieoba i ‘au‘eweda Aigupitoega, ioniionidi ‘idi anuega:

¹⁵ Ta gete ‘i apwesa, Parao i ‘atepatu be gea‘abo ‘i da tagwarema be ‘a da tauia, ga Ieoba tomatua iauiaudi ‘asa Aigupito ‘ena ‘i loemwawasidi, tai ‘ina tomatua, ta bulomakau ‘ina tomatua ruarua; ta ‘enega iauiaudi ‘ebetubua si gigegena Ieoba ‘ena ia taria, me‘olotodi taudi; ta natuguao me‘olotodi ‘idi tomatua ia ‘e‘isai.

¹⁶ Ta ‘i da we‘iwe‘iiaia manuna nimaio ‘ena, ta ‘ebeloesanana mataio gamwagamwanidia: nima waiwaiiega Ieoba i ‘au‘ewedama Aigupitoega ta ‘enega.

¹⁷ Ta gete ‘i apwesa, ni‘atu Parao tomota ‘i tagwaredi be si da tauia, ga Eaubada nigea i ‘au‘ewedi me Pilisitia ‘idi ‘asa ‘ana ‘edega, ta gote serabenaia tuga; Eaubada ‘i gwae ta ‘enega, ‘Abona nai tomota si nua‐ebuni ‘ena saia si ‘itena, ta si ‘ila Aigupito ‘enaia;

¹⁸ Ta Eaubada tomota i ‘au‘au‘ewadadanedi, ‘eda mitawega Ora Bweabwearinega: ta Iseraela tubunao ‘asa Aigupito ‘enega si tu‘e ma‘idi ‘ebelosaia.

¹⁹ Ta Mose Iosepa luluna i ‘ewedi ma‘ieana: tauna ‘i ona‘upa‘upa ‘ai‘aila Iseraela tubunao ‘edia ta ‘enega, ‘i gwae, Eaubada ‘i da ‘ita ‘ai‘ailimi; ta gete ‘enega lulugu wa da ‘a‘ara tu‘eiena ma‘emi.

²⁰ Ta si tauia Sukota ‘enega, ta Etama ‘ena si miami, mitawa tupitupinaia.

²¹ Ta Ieoba matadia ‘i tauia asiataia ‘ora‐poanega, sabi nuganedi ‘edega; ta boiboi ‘ora‐aweiega, sabi tuema‘edana ‘edia; be ‘enega si da tautauia asiata be boiboi:

²² ‘Orapoana asiataia, ta ‘ora‐awe boiboia, nigea si losawara tomota matadiega.