Si Apwesa 12 - Buki Tabu Lowaenei 1919

‘UPWA 12.

¹ Ta Ieoba ‘i ona Mose ta Aarona ‘edia ‘asa Aigupito ‘enaia, ‘i gwae,

² Nawarae gete ‘i da nawarae ‘adi nugana ‘emia: tauna ‘i da iakwara ‘ana gimi nawarae ‘emia.

³ Boda Iseraela maibo‘ana ‘ena wa da ona, wa da gwae, Nawarae gete ‘ana asiata e teni nina tai ‘e bweuna ‘e bweuna lami ‘e bweu si da ‘ewa ‘edia, na‘ieana tamadi ‘idi anuao, lami ‘e bweuna anua ‘e bweuna ‘ina tomianao manudi:

⁴ Ta ‘abo to‐mia‐anua pu‘epu‘ena lami ‘e bweuna manuna, ga tauna ta gosiana ‘ina anua serabenaia ‘e bweuna ‘i da ‘ewena nadigega tomota maiawasidi ‘adi iau; na‘ieana tai ‘e bweuna ‘e bweuna ‘ina e‘ai na‘ieana wa da sawa lami manuna.

⁵ ‘Imi lami gea‘abo ‘e bweu ‘ina to‘umalinamo, me‘olotona iakwara ‘e bweuna ‘enega: sipi ‘ediega wa da ‘ewena, nai gota ‘ediega:

⁶ Ta wa da guinua ataia ga asiata e potini nina nawarae tauna ‘enega: ta boda Iseraela ‘ina deriegogona maibo‘ana ‘enaia si da ununa asunuanuaia.

⁷ Ta rara ‘enega si da ‘ewena, ta ‘ora esena ‘e rua ta sa‘ubarabara ‘edia si da sa‘ui, anua ‘edia si da ‘enina.

⁸ Ta boiboi nina esiona si da ‘ani, gabugabuna aweiega, ta palaua nigea malebeninamo; pai darerena ma‘ieana si da ‘enina.

⁹ Gea‘abo mama‘ina ‘enega wa ‘e‘ani, nai ‘e‘ureni boasiega, ta gabugabuna aweiega; bulubuluna ta ‘aena be diana ma‘enao.

¹⁰ Ta gea‘abo ‘e bweu wa ‘esine be ‘i miami ga gonagonaia; ta tauna tupwana ‘i miami ga gonagonaia wa da gabu aweiega.

¹¹ Ta gete nadigega wa da ‘enina; tolobwami wa da taraiai, ‘ami ‘aeiapaiapa ‘aemia, ta ‘imi guna nimamia: ta wa da ‘e‘a manimaniena: tauna Ieoba ‘ina pasoba.

¹² Boiboi gote ‘enega ‘asa Aigupito ia da rubwarena ta ‘enega, ta tomatua iauiaudi ‘asa Aigupito ‘enaia ia da unudi, tai be bulomakau ruarua; ta Aigupito ‘ina eaubada iauiaudi ‘edia loinao ia da guinuedi: ‘Abo‘agu Ieoba.

¹³ Ta rara ‘i da we‘iwe‘iiaia manuna anua ‘edia ‘ena wa miami: ta ‘ena rara ia ‘itena, ia da ‘asinemi, ta gea‘abo ‘e bweu le‘oasa ‘emia ‘i da miami be ‘i da giesawarimi, tuta ‘enega ‘asa Aigupito ia ununa.

¹⁴ Ta asiata gete ‘i da ‘ebenua‘i‘isi manuna ‘emia, ta wa da ‘ita‘i‘isina sagari Ieoba ‘enaia: ‘imi epata‐tomotaiao ‘ediega wa da ‘ita‘i‘isina sagari loina ‘enega ta gea‘abo ‘i da gumwagumwara.

¹⁵ Asiata e sebeni palaua nigea malebeninamo wa da ‘e‘ai; gimi asiata ‘enega lebeni wa da ‘ewa iaulei ‘imi anua ‘ediega: tauna palaua malebeni i ‘e‘ani gimi asiata ‘enega ga asiata e sebeni nina, tai maiawasina gote Iseraelega si da ‘upwaiaulena.

¹⁶ Ta gimi asiata ‘enega deriegogona tabu ‘e bweu ‘i da miami ‘emia, ta asiata ‘e sebeni nina deriegogona tabu ‘e bweuna; gea‘abo ‘e bweu guinua ‘edia si da guinua, tauna tuga tai iauna si da ‘e‘ai, tauna tuga wa da guinuei.

¹⁷ Ta palaua nigea malebeninamo wa da nua‘i‘isi; asiata tauna gete ‘enega ‘imi bodao ni‘atu ia ‘au‘ewedima ‘asa Aigupito ‘enega: ta ‘enega asiata gete wa da nua‘i‘isi ‘imi epata‐tomotaiao ‘ediega loina gea‘abo ‘i da gumwagumwara ‘enega.

¹⁸ Gimi Nawarae ‘enega, nawarae ‘ana asiata ‘e potini nina ‘enega asunuanuaia, palaua nigea malebeninamo wa da ‘e‘ani, ga nawarae ‘ana asiata ‘e tweniti wani asunuanuaia.

¹⁹ Asiata ‘e sebeni gea‘abo lebeni si da lobaloba ‘imi anua ‘edia: tauna iage lolebenina i ‘enina, tauna tomota‐maiawasina nina boda Iseraela ‘enega si da ‘upwa‐iaulena ta ‘enega, nai tomia to‘u‘umara, nai tauna ‘i tubua ‘asa ‘enaia.

²⁰ Gea‘abo ‘e bweu iage malebenina wa da e‘ani; ‘imi anua iauiauna ‘edia palaua nigea malebeninamo wa da ‘e‘ani.

²¹ Ga Mose Iseraela ‘ana ‘inapwana iauiaudi manudi ‘i bwau, ta ‘i eonedi, Wa da apwesa, ta lami wa da ‘ewedi ‘imi susu nadigega, ta pasoba wa da loemwawasi.

²² Ta isopa mabwagilina wa da ‘ewa, ta rara gaeba ‘ena ‘i miami ‘ena wa da epwasena, ta sa‘ubarabara be esena ‘e rua ‘ora ‘edia wa da e‘auia‘oase rara gaeba ‘ena ‘i miamiana ‘enega; ta gea‘abo ‘e bweu ‘emiega anua ‘ana ‘auboda ‘enega ‘i da apwesa ga gonagonaia.

²³ Ieoba ‘i da rubwarena sabi unudi me Aigupito ta ‘enega; ta ‘ena rara i ‘itena sa‘ubarabara ‘enaia, ta esena e rua ‘adi ‘ora ‘edia, ga Ieoba ‘auboda nina ‘i da ‘asinena, ta nigea ‘i da tagwara be tounua ‘imi anua ‘edia ‘i da rugu be ‘i unumi.

²⁴ Ta iage gete wa da nua‘i‘isina loina manuna ‘emuia ta natumuao me‘olotodi ‘edia ga gea‘abo ‘i gumwagumwara.

²⁵ Ta gete ‘i da apwesa, ‘ena wa mai ‘asa Ieoba ‘i da ‘ebwaemi ‘enaia, na‘ieana ‘i ona‘upa‘upa, guinua gete wa da ‘ita‘i‘isi.

²⁶ Ta gete ‘i da apwesa, ‘ena natumiao si da eonemi, Guinua gete toase ‘ana bubuna ‘emia?

²⁷ Ga wa da ona, Tauna Ieoba ‘ina pasoba ‘ana taria, tauna Iseraela tubunao ‘idi anua Aigupito ‘ena i ‘asinedi, ‘ena me Aigupito ‘i unudi, ta ‘ida anua i ‘etoseedi. Ta tomota debadi si sanamwa‘uta ga si bwagobwago.

²⁸ Ta Iseraela tubunao si tauia ta si guinua nadigega; na‘ieana Ieoba Mose ta Aarona ‘i eonadi, nadigega si guinua.

²⁹ Ta niuniuwanaia gete ‘i apwesa, Ieoba tomatua iauiaudi ‘asa Aigupito ‘enaia ‘i unudi, Parao tauna ‘ebemi esaesa ‘ena ‘i miatoa ‘ina tomatua ‘enega ga ioniionidi gogoraia ‘idi tomatua; ta bulomakau ‘idi tomatua iauiauna.

³⁰ Ta Parao ‘i tooro boiboi, tauna, ta ‘ina toguinuao iauiaudi, ta me Aigupito iauiaudi; ta bwau sinabwana ‘i miami Aigupito ‘enaia; nigea ‘e bweu anua daita ta ‘enega ‘ena nigea ‘e bweu to kwaia.

³¹ Ta boiboi Mose ta Aarona manudi ‘i bwau, ta ‘i gwae, Wa da tooro, ‘igu tomota ‘ediega wa da apwesa, ‘omi ta Iseraela tubunao ruarua; ta wa da tauia, Ieoba ‘ena wa da guinua, na‘ieana wa ona ni‘atu.

³² ‘Imi sipi iau ta ‘imi bulomakau iau wa da ‘au‘ewedi, na‘ieana wa ona ni‘atu, ta wa da sawara; ta wa da onaobobomegu wate.

³³ Ta me Aigupito si ewaiwai tomota ‘edia, ‘aene si da ‘etune maniniedi ‘asega; si gwae ta ‘enega, ‘Abo‘ada ta ‘e tokwaia iauiauda.

³⁴ Ta tomota ‘adi palaua mapwasana si ‘ewena nigea ‘i lolebeninamo, ‘adi gaeba ‘ebebibi si bwagilidi ‘adi ‘oama ma‘edi ‘a‘aradia.

³⁵ Ta Iseraela tubunao si guinua nadigega Mose ‘ina ona; ta me Aigupito ‘ediega si sida iiaiiara sileba, ta iiaiiara gola, ta ‘oama;

³⁶ Ta Ieoba tomota ‘i gienua‘ole‘oleedi me Aigupito matadia, ta ‘enega to‘ase nai si ‘awanoi si tagwara ‘edia. Ta me Aigupito si ‘oaedi.

³⁷ Ta Iseraela tubunao si tautauia Ramese ‘enega ga Sukota ‘enaia, tai si tautauia e sikisi anaredi tausana serabenaia, wate gogama.

³⁸ Ta pwaru dumadumadi wate si tu‘e ma‘ediao; ta sipi iau, ta bulomakau iau, tamo, bulomakau toiausana.

³⁹ Ta palaua pwasana tauna si ‘ewena Aigupitoega, ‘enega puli nigea malebeninamo si gabuna, nigea ‘i lolebeni ta ‘enega; Aigupitoega si pa‘idi ta ‘enega, ta nigea kapekapeana si da miami, ta nigea ‘e bweu masura si ‘ewa‘ewa manudi.

⁴⁰ Ta Iseraela tubunao ‘idi miami, tauna ‘enega si miami Aigupito ‘enaia, iakwara ‘e poa anaredi ta tati.

⁴¹ Ta iakwara e poa anaredi ta tati ‘adi ‘ebelosaroni ga gete ‘i apwesa, asiata tauna ‘ai‘aila gete ‘i apwesa, Ieoba ‘ina bodao iauiaudi ‘asa Aigupito ‘enega si tauiawa.

⁴² Gete boiboi si da ‘ita‘i‘isi Ieoba ‘enaia ‘ina ‘au‘ewedima ‘asa Aigupito ‘enega manuna: gete Ieoba ‘ina boiboi nina, Iseraela tubunao iauiaudi si da ‘ita‘i‘isina ‘adi ‘epata‐tomota maibo‘anega.

⁴³ Ta Ieoba ‘i ona Mose ta Aarona ‘edia, Gete Pasoba ‘ana loina: gea‘abo ‘e bweu to‘u‘umara ‘enega i ‘e‘ai:

⁴⁴ Ta tai iauna ‘ina ‘ari‘e ‘i gimwani maniega, ni‘atu ‘u lodabena, ga ‘enega ‘i da ‘e‘ai.

⁴⁵ To‘u‘umara ta toguinua e‘ie‘isana gea‘abo ‘enega si da ‘e‘ai.

⁴⁶ Anua ‘e bweuna ‘ena si da ‘e‘ai; gea‘abo esio lopiduna ‘e bweuna ‘u da apweapwese anuega; wate gea‘abo luluna ‘u gilasa.

⁴⁷ Iseraela ‘ina boda maibo‘ana si da guinuena.

⁴⁸ Ta ‘ena to‘u‘umara ma‘ieaio wa miami, ta tauna pasoba ‘i da bubuna Ieoba ‘enaia, ‘ina ‘oloto iauiaudi si da lodaba, ga ‘i da doroma ta ‘i da bubuna; ta ‘i da na‘ieana ‘e bweu ‘i tubua ‘asa ‘enaia: ta gea‘abo ‘e bweu nigea ‘i lodabenamo ‘enega ‘i da ‘e‘ai.

⁴⁹ Loina ‘e bweuna tauna ‘i tubua ‘asaia ‘enaia, ta to‘u‘umara ma‘emi wa miami ‘enaia.

⁵⁰ Gote nadigega Iseraela tubunao iauiaudi si guinua; na‘ieana Ieoba ‘i ona Mose ta Aarona ‘edia, na‘ieana si guinua.

⁵¹ Ta asiata ‘ai‘aila nina gete ‘i apwesa, Ieoba Iseraela tubunao ‘asa Aigupito ‘enega i ‘au‘ewedima boda ta boda ‘ediega.