Si Apwesa 11 - Buki Tabu Lowaenei 1919

‘UPWA 11.

¹ Ta Ieoba ‘i ona Mose ‘enaia, Wate ‘e bweu le‘oasa ia da me‘ena Parao ‘enaia, ta Aigupito ‘enaia; muriega ‘i da tagwaremi be gete ‘enega wa da tauia: ‘ena ‘i da tagwaremi wa da tauia, maibo‘ami gete ‘enega ‘i da pa‘i ‘ai‘ailimi.

² Gete tuga tomota tenadia ‘u da ona, ta tai ‘e bweuna ‘e bweuna gosiana ‘ebeiiara sileba, ta ‘ebeiiara gola ‘i da eonai, ta waine ‘e bweuna ‘e bweuna gosiana ‘enega.

³ Ta Ieoba tomota ‘i gie‘atenua‘ole‘oleiedi me Aigupito matadia. Wate tai Mose ‘i to‐sinabwa‐sana ‘asa Aigupito ‘enaia, Parao ‘ina toguinua matadia, ta tomota matadia.

⁴ Ta Mose ‘i gwae, Gete nadigega Ieoba ‘i ona, Niuniuwanaia ia da tauiawa Aigupito gamwagamwanaia:

⁵ Ta tomatua iauiaudi ‘asa Aigupito ‘enaia si da mwawasa, Parao tauna ‘ebemi‐esaesa ‘ena ‘i miatoa ‘ina tomatua ‘enega, ga toguinua mewainena gurewa‐‘ebedai guinaia ‘i miamiana ‘ina tomatua; ta bulomakau ‘idi tomatua iauiauna.

⁶ Ta bwau sinabwana ‘i da miami ‘asa Aigupito maibo‘ana ‘enaia, nadigega nigea ‘e bweu ‘i miami lowa, nai nadigega ‘i da miami muriega.

⁷ Ta gea‘abo ‘e bweu kedewa meiana ‘i da lisilisi Iseraela tubunao ‘e bweuna ‘enaia, tai nai bulomakau ‘enaia: be ‘enega wa da mwaratonina ‘aene Ieoba ‘i aweiara me Aigupito ta Iseraela gamwagamwanidia.

⁸ Ta ‘imu toguinua iauiaudi getedi si da mwa‘utama ‘eguia, ta ‘eguia si da kopukopu, si da gwae, ‘U da apwesa, be tomota iauiauna si muriemu: ta muriega ia da apwesa. Ta Parao ‘enega ‘i apwesa gamwasoara iaiiaiega.

⁹ Ta Ieoba ‘i ona Mose ‘enaia, Parao gea‘abo ‘emia ‘i da nonono: be ‘enega ‘igu ‘ebenuaowana si da eiau ‘asa Aigupito ‘enaia.

¹⁰ Ta Mose ta Aarona ‘ebenuaowana iauiauna gete si guinuedi Parao matanaia: ta Ieoba Parao ‘atena ‘i giepa‘arina, ta nigea Iseraela tubunao ‘i tagwaredi be ‘ina ‘asega si da tauia.