Si Apwesa 10 - Buki Tabu Lowaenei 1919

‘UPWA 10.

¹ Ta Ieoba ‘i ona Mose ‘enaia, Parao ‘ena ‘u da rugu: ‘atena ni‘atu ia giemwau ta ‘enega, ta ‘ina toguinua ‘atedi, be ‘enega ‘igu we‘iwe‘iiaia getedi ia da e‘ita gamwagamwanidia:

² Ta ‘aene ‘u da simana natuio me‘olotona tenanaia, ta natuio natuna me‘olotona, iage ni‘atu ia guinuedi Aigupito ‘enaia, ta ‘igu we‘iwe‘iiaia ni‘atu ia guinuedi ‘edia; be ‘enega wa da mwaratoni ‘aene ‘abo‘agu Ieoba.

³ Ta Mose be Aarona si rugu Parao ‘enaia, ta si eonena, Gete nadigega Ieoba me Eberu ‘idi Eaubada ‘i gwae, Tuta ‘eisa gimwa‘uteio mataguia ‘u da guitoasa? ‘igu tomota ‘u da tagwaredi be si da tauia, be ‘enega ‘eguia si da guinua:

⁴ Nai, ‘abo geanuaio ‘igu tomota ‘u tagwaredi be si da tauia, u ‘ita, gibua‘i bilolo ia da me‘edi ‘imu esena ‘enaia:

⁵ Ta bare‘u matana si da lobodebode, be ‘enega nigea ‘e bweu bare‘u ‘i da ‘ita: ta gimwe‘isina ‘i lobobo‘ana, tauna ‘i miamiana ‘emia ‘usana‐patunega, si da ‘e‘ani, ta kaiwe iauna ‘i tabwatabwa bagurega manumi si da ‘enidi:

⁶ Ta ‘imu anua si da loemae, ‘imu toguinua ‘idi anua iauiauna be, me Aigupito iauiaudi ‘idi anuao be; na‘ieana tamamiao nai tamamiao tamadiao nigea si ‘itena, Asiata ‘enega bare‘uia si miami ga batua. Ta ‘i sana‘ila, ta Parao ‘enega ‘i tauiawa.

⁷ Ta Parao ‘ina toguinuao si eonena, Tuta eisa tai gete ‘i da sikwa ‘edaia? tai ‘u da tagwaredi be si da tauia, be ‘enega Ieoba ‘idi Eaubada ‘ena si da guinua; nigea nai ‘u mwaratoni ‘aene Aigupito ni‘atu ‘i saoora?

⁸ Ta Mose be Aarona si ‘au‘ewalimedima Parao ‘enaia: ta ‘i eonedi, Wa da tauia, Ieoba ‘imi Eaubada ‘ena wa da guinua: ta iaisigei si da tauia?

⁹ Ta Mose ‘i ona, ‘A da tauia ‘ima gogama ma‘emao ta ‘ima ‘ina‘inapwanao ma‘emao, natumao me‘olotodi ta mewainedi ma‘emao, ‘ima sipi iau ta ‘ima bulomakau iau ma‘emao ‘a da tauia; ‘a da losagari Ieoba ‘enaia ta ‘enega.

¹⁰ Ta ‘i eonedi, Ieoba ‘i da miami nadigega ma‘emi, na‘ieana ia da tagwaremi be wa da tauia, ta ‘imi gogamao: ‘ena wa da ‘ita; to‘umalina matamia ta ‘enega.

¹¹ Gea‘abo nadigega: ‘omi tai gete ‘enega wa da tauia, ta Ieoba ‘ena wa da guinua; gote wa nuanuana ta ‘enega. Ta Parao matanega si pa‘idi.

¹² Ta Ieoba ‘i ona Mose ‘enaia, Nimaio ‘u da iasitoto ‘asa Aigupito debanaia bilolo manudi, be si da tu‘ema ‘asa Aigupito ‘enaia, ta ‘asa ‘ina pwatura iauna si da ‘e‘ani, iauiauna tuga ‘usanapatuna ‘i unulosa‘una.

¹³ Ta Mose ‘ina keweliwelili ‘i e‘etonao‘ena ‘asa Aigupito debanaia, ta Ieoba bomatu ‘i me‘ena ‘asa ‘enaia ‘asiata maibo‘ana gote ‘enega, ta boiboi maibo‘ana; ta ni‘atu gonagona, ga bomatu bilolo ‘i me‘edi.

¹⁴ Ta bilolo si tu‘e ‘asa Aigupito maibo‘ana ‘enaia, ta Aigupito ‘ina esena iauiauna ‘edia si toa; si didiga wawasae; nuganuganidi nigea bilolo nadigega taudi, ta murimuriadi gea‘abo nadigega.

¹⁵ Gabura maibo‘ana matana si lobodebodena, ta ‘enega ‘asa ‘i guguioi; ta ‘asa ‘ina pwatura iauna si ‘e‘ani, ta kaiwe uana iauiauna ‘usana patuna ‘i unuunu sa‘udi: ta nigea ‘e bweu iage karakarawina ‘i miami, nai kaiwe nai bagura pwaturina, ‘asa Aigupito maibo‘ana ‘enaia.

¹⁶ Ga Parao Mose ta Aarona manudi ‘i bwau manini; ta ‘i ona, ‘Abo‘agu ni‘atu ia loegesi Ieoba ‘imi Eaubada ‘enaia, ta ‘emia.

¹⁷ Gete ‘enega ‘igu to‘umalina ‘u da ‘ewa iaulei gete ma‘ebweuna tuga ta ‘enega, Ia sideio, ta Ieoba ‘imi Eaubada ‘ena wa da sida, be ‘enega mwawasa gete namo ‘eguiega ‘i da ‘ewa‐iaulei.

¹⁸ Ta Parao ‘enega ‘i tauiawa, ta Ieoba ‘ena ‘i sida.

¹⁹ Ta Ieoba ‘ebwaga topa‘arasana ‘i giesana‘ilena, tauna bilolo i ‘au‘ewedi, ta Ora Bweabwearina ‘ena ‘i sieeiedi; nigea ‘e bweu bilolo ‘i miami Aigupito ‘ina esena maibo‘ana ‘enaia.

²⁰ Ta Ieoba Parao ‘atena ‘i giepa‘arina, ta Iseraela tubunao nigea ‘i tagwaredi be si da tauia.

²¹ Ta Ieoba Mose ‘ena ‘i ona, Nimaio ‘u da iasitoto garewa ‘enaia, be ‘enega guguioi ‘asa Aigupito ‘enaia ‘i da miami, guguioi nina ‘enega si da gidadana.

²² Ta Mose nimana ‘i iasitotona garewa ‘enaia; ta guguioi ‘ubwa‘ubwa ‘asa Aigupito maibo‘ana ‘enaia ‘i miami ga asiata ‘e toi;

²³ Nigea si da ‘itedi ‘e bweuna ‘e bweuna, ta nigea ‘e bweu ‘ina esenega ‘i tooro ga asiata ‘e toi: ta Iseraela tubunao iauiaudi ma‘idi maedana ‘idi anua ‘edia.

²⁴ Ta Parao Mose ‘ena ‘i bwau, ta ‘i gwae, Wa da tauia, Ieoba ‘ena wa da guinua; ‘imi sipi iau ta ‘imi bulomakau iau taudimo si da miami: ‘imi gogamao wate ma‘emiao wa da tauia.

²⁵ Ta Mose ‘i gwae, Tariao be ‘ebwaeadaita gabugabudi wate nimamaia ‘u da sa‘u, be ‘enega ‘a da taria Ieoba ‘ima Eaubada ‘enaia.

²⁶ Wate ‘ima bulomakau ma‘emao ‘a da tauia; gea‘abo ‘e bweu ‘ae‘edu‘eduna ‘a da pilisinena murimaia; taudi ‘ediega ‘a da ‘ewa be Ieoba ‘ima Eaubada ‘ena ‘a da guinua; ta nigea ‘a mwaratoni nai to‘ase ‘enega Ieoba ‘ena ‘a da guinua, ga gote ‘ena ‘a da apwesa.

²⁷ Ta Ieoba Parao ‘atena ‘i giepa‘arina, ta nigea ‘i tagwaredi be si da tauia.

²⁸ Ta Parao ‘i eonena, ‘Eguiega ‘u da tauia, ‘u da ‘ita‘i‘isio, matagu gea‘abo wate u ‘ita‘ita; asiata ‘enega matagu u ‘itena ‘u da mwawasa ta ‘enega.

²⁹ Ta Mose ‘i gwae, ‘U ona bobo‘ana ni‘atu; mataio gea‘abo wate ia da ‘ita limena.