Salamo 99 - Buki Tabu Lowaenei 1919

SALAMO 99.

¹ Ieoba ‘i loiloina; tomotai si da dedera: Ierubima mwatuidi ‘i miatoa; bare‘u ‘i da loniu.

² Ieoba ‘i sinabwana Siona ‘enaia: Ta tauna lo‘etana sana tomota iauiauna ‘edia.

³ ‘Amu esana sinabwana ta didigana si da tupuna: Tauna ‘i tabu.

⁴ King ‘ina pa‘ara wate loina ‘i nuanuana; Bubuna ‘ai‘aila ‘u giepa‘arina, Loina ta bubuna paruparu ‘u bubudi Iakobo ‘enaia.

⁵ Ieoba ‘ida Eaubada wa da gitu‘e, Ta ‘aena ‘ana ‘ebesa‘u ‘ena wa da bwagobwago: Tauna ‘i tabu.

⁶ Mose ta Aarona ‘ina to taria gamwagamwanidia, Ta Samuela taudi ‘ana esana si ‘inana gamwagamwanidia; Ieoba ‘ena si bwau, ta ‘i ona limana ‘edia.

⁷ Poana ‘ora ‘ena ‘i eonedi: ‘Ina ‘ebee‘itao si ‘ita‘i‘isidi, ta loina nina i ‘ebwaedi.

⁸ Ieoba ‘ima Eaubada ‘edia ‘u onalimana: ‘Oio Eaubada tauio ‘idi to‘umalina ‘u kweuna, Ta ‘idi guinuao ‘u e‘isena tugai.

⁹ Ieoba ‘ida Eaubada wa da gitue‘iei, Ta ‘ina ‘oea tabu ‘ena wa da bwagobwago; Ieoba ‘ida Eaubada ‘i tabu ta ‘enega.