Salamo 98 - Buki Tabu Lowaenei 1919

SALAMO 98.

¹ Wari auauna wa da wariei Ieoba ‘enaia; Iage ‘ebenuaowana ni‘atu ‘i guinuedi ta ‘enega; Ataina, ta nimana tabu, ni‘atu si bubu ‘etoseana manuna.

² Ieoba ‘ina ‘etoseana ni‘atu ‘i gieapwesa: ‘Ina bubuna paruparu ni‘atu ‘i e‘ita apwesaia ‘ebeloinao matadia.

³ ‘Ina nua‘ole‘ole ta ‘ina bubuna ‘ai‘aila Iseraela ‘ina anua ‘ena ni‘atu ‘i nua‘i‘isina; Bare‘u ‘ana ‘ebelosaroni iauiaudi ni‘atu ‘ida Eaubada ‘ina ‘etoseana i ‘itena.

⁴ Ieoba ‘ena ‘u da bwau ‘enaio maguausoarina ‘enega, bare‘u maibo‘ana: ‘U da apwesawa ta guausoara manuna ‘u da wari, tamo, ‘u da wari tuputupu.

⁵ ‘U da wari tuputupu Ieoba ‘enaia apiega; Apiega ta ‘ewa‘ewa ‘ai‘aila ‘enanega.

⁶ Ioguli ‘ediega ta ‘ebegwane barasa ‘enanega ‘U da bwau ‘enaio maguausoarina ‘enega King matanaia, Tauna Ieoba.

⁷ Ora ‘i da dududu, ta maamaana; Gabura, ta taudi ‘ena si miami;

⁸ Muruao madini si da pwasipwasi; ‘Oea gidaridi si da wari rererea guausoara manuna;

⁹ Ieoba matanaia, tauna ‘i mai sabi loina bare‘u ta ‘enega: Gabura ‘i da loinei bubuna paruparuiega, Ta tomotai bubuna ‘ai‘ailega.