Salamo 97 - Buki Tabu Lowaenei 1919

SALAMO 97.

¹ Ieoba ‘i loiloina; bare‘u ‘i da guausoara; Saru ‘adi iau si da uiawana.

² Poanaiao ta guguioi si mia ‘oabu‘oabuiena; Bubuna paruparu ta loina siterua ‘ina ‘ebemi esaesa ‘ana ‘autu.

³ Matanaia awe sabelulu ‘i tauia, Ta ‘ana tarauwarao i ‘arata dadanedi.

⁴ ‘Ana namarao bare‘u si giema‘edanena: Bare‘u i ‘itena, ta ‘i dededera.

⁵ ‘Oea gidaridi si doga iage salisalina ‘atua Ieoba matanaia, Gabura maibo‘ana ‘ana ‘Inapwana matanaia.

⁶ Garewao ‘ina bubuna paruparuna si simanena, Ta tomota iauiauna ni‘atu ‘ina esaesa si ‘itena.

⁷ Iauiaudi tokwarui daiadaiagina ‘ena si guiguinua si da omaiamaia, Taudi si ona gagasa taudimo goamamea manudi; ‘Ena wa da bwagobwago, ‘omi eaubadao iauiaumi.

⁸ Siona ‘i nonona ta ‘i guausoara, Ta Iuda natunao me wainedi si uiawana; ‘Imu loinao manudi, Ieoba ie.

⁹ ‘Oio Ieoba, ‘oio to lo‘etana sana gabura maibo‘ana ‘enaia: ‘Oio ‘u miatu‘e wawasae eaubadao iauiaudi ‘edia.

¹⁰ ‘Omi Ieoba wa obobomena, to‘umalina wa da guitoasa; Taudi ‘ina tomota iaruiarua ‘esasedi iaruiaruadi ‘i egagaredi; To to‘umalina nimanega i ‘etoseedi.

¹¹ Ma‘edana ‘i lelewanena to‐bubuparuparu manudi, Ta uiawana taudi ‘atediega si paruparu manudi.

¹² ‘Omi ‘imi bubuna paruparuna, Ieoba ‘ena wa da guausoara; Ta ‘ana esana tabu ‘ena wa da lokagutoki.