Salamo 96 - Buki Tabu Lowaenei 1919

SALAMO 96.

¹ Ieoba ‘ena wari auauna ‘u da wariei: Bare‘u maibo‘ana, Ieoba ‘ena ‘u da wari.

² Ieoba ‘ena ‘u da wari, ‘ana esana ‘u da tupuna; ‘Ina ‘etoseana ‘u da e‘ita asiata ta asiata.

³ ‘Ina esaesa ‘u da simana ‘ebeloinao gamwagamwanidia, ‘Ina guinuao ‘ebenuaowana tomota iauiaudi gamwagamwanidia.

⁴ Ieoba tauna sinabwana ta ‘enega, ta sawesawenaia ta da tupuna wawasae: Tauna ta da matautena sinabwana ta eaboaine iauiaudi gea‘abo.

⁵ Tomota ‘idi eaubada iauiaudi si iage besobeso ta ‘enega: Ta Ieoba garewao ‘i mweruruidi.

⁶ Amaiabe ta esaesa matanaia si miami: Waiwai ta ‘ita bobo‘ana ‘ina anua tabu ‘ena si miami.

⁷ Ieoba ‘ena wa da ‘ebwaea, omi tomota ‘idi susuiao, Ieoba esaesa ta waiwai ‘ena ‘wa da ‘ebwaea.

⁸ Esaesa ‘ana esana sawesawenaia, Ieoba ‘ena wa da ‘ebwaea: ‘Ebwaeadaita wa da me‘ena, ta ‘ina ‘atamanao ‘edia wa da mai.

⁹ ‘Esasena tabu ‘ana ‘ita bobo‘ana ‘enega Ieoba ‘ena wa da tapwaroro: Bare‘u maibo‘ana, matanaia ‘u da dedera.

¹⁰ ‘Ebeloinao gamwagamwanidia wa da ona, Ieoba ‘i loiloina; Bare‘u wate ‘i pa‘ara be gea‘abo ‘i da loniu; Tomota ‘i da loinedi bubuna ‘ai‘ailega.

¹¹ Garewao si da guausoara, ta bare‘u ‘i da uiawana; Ora ‘i da dududu, ta ‘ana maamaana;

¹² Bagura ‘i da uiawana, ta iage iauiauna ‘ena ‘i miami; Ga mitawa ‘ina kaiweao si da wari guausoarega;

¹³ Ieoba matanaia, ‘i memai ta ‘enega; ‘I memai sabi loina bare‘u ta ‘enega; Bare‘u ‘i da loina bubuna paruparuiega, Ta tomota ‘ina ona‘ai‘ailega.