Salamo 95 - Buki Tabu Lowaenei 1919

SALAMO 95.

¹ Wa da mai, ta da wari Ieoba ‘enaia: ‘Ada ‘etoseana ‘ina gurewa ‘ena ta da bwau ‘enada maguausoarina ‘enega.

² Ta da mai matanaia lokagutokiega, Salamo ‘ediega ta da bwau ‘enada maguausoarina ‘enega.

³ Ieoba tauna Eaubada sinabwana ta ‘enega, Ta tauna ‘Inapwana sinabwana eaboaine iauiaudi ‘edia.

⁴ Nimanaia bare‘u ‘ina esena ni‘uni‘una si miami; ‘Oeao kesoradi taudi ‘ina iage wate.

⁵ Ora ‘ina iage, ta ‘i mweruruina: Ta nimanao bwa‘a iadaiadana si bubuna.

⁶ Wa da mai, be ta da tapwaroro ta kopukopu; Ieoba ‘ada To Mwerurua matanaia ‘aeda ta da tulasa:

⁷ Tauna ‘ida Eaubada ta ‘enega, Ta ‘abo‘ada ‘ina ‘e‘ai ‘ina tomota, ta nimana ‘ina sipi. Batua, ‘Enana wa da nono eguma!

⁸ ‘Atemi gea‘abo wa da giepa‘ari, ‘atua Meriba ‘enaia, ‘Atua Masa ‘ina asiata mitawaia:

⁹ ‘Ena tamamiao si eiabegu, Si toogu, ta ‘igu guinua si ‘itena.

¹⁰ Iakwara ‘e poti ia dedoi epata tomota gote ‘enega, Ta ia gwae, Taudi tomota nidi si loegesi ‘atedia, Ta ‘igu ‘edao nigea si mwaratonidi:

¹¹ Ta ‘enega ‘igu gamwasoarega ia ona ‘upa‘upa, ‘Aene gea‘abo ‘igu ‘ebeeiawai‘ata ‘ena si da rugu.