Salamo 94 - Buki Tabu Lowaenei 1919

SALAMO 94.

¹ Ieoba ie, ‘Oio Eaubada e‘isa ‘imu iage, ‘Oio Eaubada e‘isa ‘imu iage, ‘u da saema.

² ‘U da gitu‘eiemu, ‘oio bare‘u ‘ana to loina: To gagasa iage sawesawedia ‘u da ‘ebwaea.

³ Ieoba, tuta eisa to‐to‘umalidi, Tuta eisa to‐to‘umalidi si da ewaiwai?

⁴ Si onalimalimana, si ona gagasa; Bubuna bokobokona ‘ana toguinua iauiaudi si gagasa taudi.

⁵ Ieoba ie, ‘imu tomota si weara leelewanedi, Ta ‘amu ‘egu‘eguia si gie‘elo‘uiena.

⁶ Kwabura ta to‘uumara si loemwawasidi, Ta tamatamagenidi si unuunudi.

⁷ Ta si gwae, Ieoba gea‘abo ‘i da ‘ita, Nai Iakobo ‘ina Eaubada ‘i da nuanua.

⁸ Wa da nuanua, omi bubuna bomitawa tomota gamwagamwanidia: Ta ‘omi ‘eeuwauwami, maisa wa da sinasinapu?

⁹ Tauna tena ‘i sa‘u, gea‘abo nai ‘i da nono? Tauna mata ‘i bubuna, gea‘abo nai ‘i da ‘ita?

¹⁰ Tauna ‘ebeloinao ‘i sapidi, gea‘abo nai ‘i da sa‘u ‘ai‘aili, Tuga tauna sinasinapu ‘i e‘ita tai ‘enaia?

¹¹ Ieoba tai ‘ina nuenao ‘i mwaramwaratonidi, Iageiage besobesodi ta ‘enega.

¹² Ieoba ie, tauna ‘u sapina, Ta ‘u e‘itena ‘imu bukiloinega, tauna ‘i bobo‘ana;

¹³ Be ‘enega to‘umalina ‘ana asiatao ‘ediega eiawai‘ata u ‘ebwaena, Ga siusiu si salena to‐to‘umalidi manudi.

¹⁴ Ieoba ‘ina tomota gea‘abo ‘i da ‘ewaiauledi ta ‘enega, Nai ‘ana ‘egu‘eguia ‘i da e‘idi‘idia.

¹⁵ Loina ‘i da ‘ila bubuna paruparu ‘enaia ta ‘enega: Ta iauiaudi ‘atediega si paruparu si da muriena.

¹⁶ Iaita ‘i da tooro manugu toguinua to‘umalidi ‘edia? Iaita ‘i da tooro manugu taudi bubuna bokoboko si guinua ‘edia?

¹⁷ ‘Abo Ieoba nigea ‘agu lema, Iaruiaruagu enono ‘ena ‘i mia manini.

¹⁸ ‘Ena ia gwae, ‘Aegu ‘i newanewa; Ieoba ie, ‘imu nua‘ole‘ole ‘i giiaigu.

¹⁹ ‘Igu nuenao ‘adi iau gamwagamwaniguia ‘edia ‘Imu ‘ebeuiawanao iaruiaruagu si gieguausoarina.

²⁰ To‘umali ‘ina ‘ebemi ma‘ieaio wa da egosigosiana nai, Tauna wasegigi ‘i bubuna loina tomwanega?

²¹ Si egogonedi taudi to‐paruparu iaruiaruana matanaia, Ta rara nigea to‘umalinamo si ‘awato‘umaliena.

²² Ta Ieoba Tauna ni‘atu ‘igu anua ‘ebe‘ita‘i‘isi ‘etosora; Ta ‘igu Eaubada ‘igu ‘ebedena ‘ina gurewa.

²³ Ta taudi ‘idi bubuna bokobokona ni‘atu ‘i me‘ena ‘edia, Ta taudi ‘idi to‘umalina ‘ena ‘i da ‘upwaiauledi; Ieoba ‘ida Eaubada ‘i da upwaiauledi.