Salamo 92 - Buki Tabu Lowaenei 1919

SALAMO 92.

¹ Iage bobo‘ana ‘a da lo tuputupu Ieoba ‘enaia, Be ‘a da wari tuputupu ‘amu esana ‘ena, ‘oio To Lo‘etana Sana:

² Be ‘imu oboboma nua‘ole‘ole ‘a da e‘ita apwesa gonagonaia, Ta ‘imu bubuna ‘ai‘aila boiboi iauiauna,

³ Binobino‘o ma‘ana nosanosa ‘e sanau ‘enega, ta api ‘enega; ‘Enana mwaumwau api ‘ena ‘enega,

⁴ ‘Oio Ieoba, ‘imu guinuega ‘agu guausoara ni‘atu ‘u sa‘una ta enega: Nimaio ‘idi guinuao ‘edia ia da ewaiwai.

⁵ Ieoba ie, ‘imu guinuao to sinabwa sadi! ‘Imu nuanua si ni‘u wawasae.

⁶ Tai ‘ina bubuna iobai ‘atua nigea ‘i mwaramwaratoni; Wate to euwauwa iage gete nigea ‘i sinapuna:

⁷ ‘Ena to to‘umalidi si tabwa nedu ‘atua, Ta ‘ena bubuna bokobokona ‘ana toguinuao iauiaudi si sinabwa; Taudi si da saoora ataia:

⁸ Ta ‘oio, Ieoba ie, ‘u mia tu‘e ataia.

⁹ U‘ita ta ‘enega, ‘amu tarauwarao, Ieoba ie, U ‘ita ta ‘enega, ‘amu tarauwarao si da saoora; Bubuna bokobokona ‘ana to guinua iauiaudi si da sawara.

¹⁰ Ta ‘igu ioguli ni‘atu ‘u gitu‘eiena bulomakau bomitawa kunana ‘atua: Bunama auauna ‘enega si e‘oroigu.

¹¹ Wate matagu ni‘atu ‘igu nuena i ‘itena ‘agu tarauwarao ‘edia, Tenagu ni‘atu ‘igu nuena to guinua to‘umalinao taudi si tooro mataguia si nonona.

¹² To bubu paruparu ‘i da niawana niu ‘atua: ‘I da sinabwa maruana Lebanona ‘ena ‘atua.

¹³ Taudi ni‘atu si aso‘idi Ieoba ‘ina anuaia Si da uiawana Eaubada ‘ina atamana ‘edia.

¹⁴ Si da uaua ‘ataia ‘idi tuta dudurana ‘enega; Si da maa aionega ta mama‘inega:

¹⁵ Be si da e‘ita ‘aene Ieoba ‘ina bubuna ‘i paruparu; Tauna ‘igu gurewa, ta nigea ‘e bweu bubuna nigea paruparu ‘enaia.