Salamo 91 - Buki Tabu Lowaenei 1919

SALAMO 91.

¹ Tauna To Lo ‘Etana Sana ‘ina esena kwaia ‘ena ‘i miamia Tauna Toewaiwai Sana iauiaukwana ‘ena ‘i da mia baula.

² Ieoba manuna ia da gwae, Tauna ‘igu ‘ebedena ta ‘igu anua pa‘arina; ‘Igu Eaubada, tauna ‘ena ia ‘emisa.

³ To ai‐manua ‘ina sikwa ‘enega ‘i da ‘etoseemu, Ta muia ‘ebemwawasa ‘enega.

⁴ Dagurinega ‘i da tara‘apwariio Ta papena ‘agaraudia ‘u da dena; ‘Ina ona‘ai‘aila lawa ta lobodaboda.

⁵ Didiga boiboi manuna gea‘abo ‘u da matauta, Nai gita asiata ‘i taetaea manuna:

⁶ Muia ‘i lopilidadana guguioi ‘ena manuna, Nai saoora ‘i loegumwara asuoreorea manuna.

⁷ Tausana si da be‘u deimuia, Ta teni tausana ‘ataimuia; Ta gea‘abo ‘i da mai serabemuia.

⁸ Tuga matamuiega ‘u da ‘ita, Ta to to‘umalidi ‘adi e‘isa ‘u da ‘itena.

⁹ Ieoba ie, ‘Oio ‘igu ‘ebedena ta ‘enega! To Lo ‘Etana Sana ni‘atu ‘u bubuna ‘imu anua;

¹⁰ Gea‘abo ‘e bweu to‘umalina ‘i da unuio, Nai ‘e bweu muia ‘i da mai ‘imu anua serabenaia.

¹¹ ‘Ina aneloseao ‘i da emataruedi manuio, Be si da ‘ita‘i‘isiio ‘imu ‘eda iauiaudi ‘edia.

¹² Nimadiega si da ‘a‘ariio, ‘Abona nai ‘aemuiega gurewa ‘u esetupe.

¹³ Laione ta moata didiga ‘u da ‘aiaidi; Laione menonoiana ta moata ‘u da ‘abilabiladi ‘aeio ‘agaraudia.

¹⁴ ‘Ina oboboma ‘eguia ‘i sa‘u, ta ‘enega ia da ‘etoseena: Ia da sa‘u tu‘eiena, ‘agu esana ‘i mwaratonina ta ‘enega.

¹⁵ ‘Eguia ‘i da bwau, ta ‘ena ia da ona limana; ‘Ena ‘i elo‘uia ‘abo‘agu ma‘ieana: Ia da ‘etoseena, ta ‘ana amaiabe ia da sa‘u.

¹⁶ Iawasina dudurana ‘enega ia da loemaena, Ta ‘agu ‘etoseana ‘ena ia da e‘ita.