Salamo 90 - Buki Tabu Lowaenei 1919

SALAMO 90.

¹ Ieoba, ‘Oio ni‘atu ‘ima ‘ebemia Epatatomota iauiauna ‘ediega.

² ‘Oeao nigea si apwesama, Nai bare‘u ta gabura ‘u mweruruidi, Tuga tuta nigea ‘i apwesa ga tuta nigea ‘i da gumwara, ‘Oio Eaubada.

³ Tai ‘u gibunina saoora ‘enaia; Ta ‘u ona, Wa da ‘ilawa, ‘omi tai natudiao.

⁴ Iakwara tausana matamuia ‘Atua boga tuga ‘ena ‘i gumwara ta ‘enega, Ta ‘atua tuta tomwana boiboi.

⁵ U ‘au‘ewediwa ‘atua muruega; taudi ‘eno‘eno nadigega: Gonagonaia si nadigega nedu ‘i tabwatabwa.

⁶ Gonagonaia ‘ana ‘ita ‘i bobo‘ana, ta ‘i tabwa tu‘e; Asuinuanuaia si ‘upwa mwa‘utena, ta i ‘oaperu.

⁷ ‘Imu gamwasoara i ‘ara‘arasima ta ‘enega, Ta ‘imu egamwagamwagu ‘enega ‘a loniu.

⁸ ‘Ima bubuna bokobokodi ni‘atu ‘u sa‘una matamuia, ‘Ima loegesi kwaiaiao maniniio ‘ana ma‘edana ‘enaia.

⁹ ‘Ama asiata iauiaudi si sawara ‘imu gamwasoara ‘ena ta ‘enega: ‘Ama iakwarao ‘a losaronidi ‘atua ‘emwasara.

¹⁰ ‘Ama iakwarao ‘adi asiatao iakwarao tomoto ta sanau, Nai waiwai manuna iakwara tomo‘ata; Ta ‘adi gagasa guinua mwau ta dedoi; ‘I gumwara manini ta ‘enega, ta ‘a taeawa.

¹¹ ‘Imu gamwasoara ‘ina waiwai iaita ‘i mwaratonina, Ta ‘imu egamwagamwagu na‘ieana matauta ‘i sawesawemuia?

¹² ‘U da e‘itema be ‘ima asiatao ‘a da sawedi nadigega, Be ‘enega ‘emaia ‘atesinasinapu ‘a da ‘ewena.

¹³ Ieoba ie, ‘U da ‘ilama; tuta ‘eisa? Ta ‘imu ‘ari‘eao manudi ‘u da nuaebuni.

¹⁴ Gonagonaia ‘imu nua‘ole‘oleiega ‘u da loemaema; Be ‘enega ‘a da guausoara ta uiawana ‘ima asiata iauiauna.

¹⁵ ‘U da gieguausoarima na‘ieana ‘asiatao ni‘atu ‘ama ‘elo‘uia ‘u sa‘una, Ta iakwarao ‘ediega to‘umalina a ‘itena ni‘atu.

¹⁶ ‘Imu guinua ‘i da apwesa ‘imu ‘ari‘eao ‘edia, Ta ‘imu esaesa natudiao ‘edia.

¹⁷ Ta Ieoba ‘ima Eaubada ‘ana ‘ita bobo‘ana ‘i da miami ‘emaia: Nimamao ‘idi guinua ‘u da giepa‘ara ‘emaia; Tamo, nimamao ‘idi guinua ‘u da giepa‘ara.