Salamo 9 - Buki Tabu Lowaenei 1919

SALAMO 9.

¹ Ia da lokagutoki Ieoba ‘enaia ‘ategu maibo‘anega; ‘Imu guinua to sinabwa sana iauiauna ia da e‘ita.

² Ia da guausoara ta ia da uiawana manuio: Ia da wari tuputupu ‘amu esana ‘ena, ‘Oio To Etanasana.

³ ‘Ena ‘agu tarauwarao si ‘ilawa, Si esetupedi ta si saoora matamu manuna.

⁴ ‘Oio ‘igu paruparuna, ta ‘igu etara ‘arena ‘u giepa‘ari; ‘Ebemi esaesa ‘ena ‘u miatoa ta ‘u loina paruparuna.

⁵ ‘Ebeloinao ni‘atu ‘u ba‘edi, to‐to‘umalina ni‘atu ‘u gi‘esaooridi, ‘Adi esana ni‘atu ‘u kweu ‘ataena.

⁶ Tarauwarao ni‘atu ‘u losaronidi, ga si waborebore ataia; Ta ‘asa ni‘atu u ‘ula‐mwa‘utedi, ‘Adi ‘ebenua‘i‘isi nina ni‘atu si saoora.

⁷ Ta Ieoba ‘i miatoa ta ‘i king ataia: Ni‘atu ‘ina ‘ebemi‐esaesa ‘i sa‘u ‘ai‘ailina loina manuna.

⁸ Ta gabura ‘i da loine bubuna paruparunega, Loina ‘i da guinue tomota ‘edia bubuna ‘ai‘ailega.

⁹ Ieoba wate ‘i da anua‐‘ebe‘ita‘i‘ita ‘etosorana taudi si didigedi ‘edia, Anua ‘ebe‘ita‘i‘ita ‘etosorana ‘eto ‘uia ‘ana tutao ‘ediega;

¹⁰ Ta taudi ‘amu esana si mwaratoni ‘emuia si da ‘emisa; ‘Oio ta ‘enega, Ieoba, taudi si ‘ebesemu nigea ‘u pilipilisinedi.

¹¹ Ieoba ‘ena wa da wari tuputupu, tauna Siona ‘ena ‘i miami: Tomota ‘edia ‘ina guinuao wa da simanedi.

¹² Tauna rara manuna i ‘etara ‘i nua‘i‘isidi; Gomabeso ‘idi dedo nigea ‘i nuanuapupure.

¹³ Ieoba ie, ‘u da ‘atenua‘ole‘oleiegu; ‘Igu ‘elo‘uia taudi si guitoasegu ‘ediega ‘u da ‘itena, ‘Oio mwawasa ‘ina ‘auboda ‘enega ‘u lisi tu ‘eiegu;

¹⁴ Be ‘enega ‘amu tuputupu maibo‘ana ia da e‘ita: Siona natuna‐me‐wainena ‘ina ‘awa ‘edia, ‘Imu ‘etoseana ‘ena ia da guausoara.

¹⁵ ‘Ebeloina si mwa‘uta gaula si bubuna ‘enaia: Gomana si sa‘u kwaiena taudi ‘aedi ‘enega ‘i ionina.

¹⁶ Ieoba ni‘atu ‘i e‘ita‘ena tauna, ni‘atu loina ‘i iagena: To to‘umalina tauna nimana ‘idi guinuao si sikwena. (Higaiona. Sela.)

¹⁷ To‐to‘umalidi Seola ‘ena si da ‘ila, Tugama ‘ebeloina iauiaudi Eaubada si nuapupurena.

¹⁸ Taudi nigea ‘idi iagemo gea‘abo si da nuanuapupuredi tuta iauiauna ta ‘enega, Nai gomabeso ‘ina nuaiaina ‘i da saoora ataia.

¹⁹ ‘U da tooro, Ieoba ie; tai gea‘abo ‘i da ewaiwai: ‘Ebeloinao matamuia si da ‘etara.

²⁰ Ieoba ie, Matauta ‘ena ‘u da sa‘udi: ‘Ebeloinao si da mwaratonidi taudi ‘aene taidimo. (Sela.)